༢༠༡༨ ཟླ་ ༡ ཚེས་ ༢༩ རེས་གཟའ་ཟླ་བ།

༄༅། །ཕྱི་ལོ་ ༢༠༡༨ ཟླ་ ༡ ཚེས་ ༢༦ ཉིན་དབུས་དང་ཤར་ཡུ་རོབ་ཀྱི་སྐུ་ཚབ་དོན་གཅོད་དངོས་གྲུབ་རྡོ་རྗེ་ལགས་ཀྱིས་ཉེ་ལམ་ཧངྒྷཱ་རི་ Hungary གྲོས་ཚོགས་ནང་བོད་དོན་རྒྱབ་སྐྱོར་ཤུགས་ཆེ་གནང་མཁན་ལྕམ་སྐུ་ MP Dr Szél Bernadett མཆོག་དང་མཇལ་འཕྲད་ཞུས་ནས་བོད་མི་མང་སྤྱི་འཐུས་ཚོགས་གཙོ་མཆོག་གི་འཚམས་འཕྲིན་འབུལ་ལམ་ཞུས་པ་དང་སྦྲགས་ཡུལ་དེའི་གྲོས་ཚོགས་ནང་བོད་དོན་རྒྱབ་སྐྱོར་ཚོགས་པ་འཛུགས་ཐབས་གནང་དགོས་པའི་འབོད་སྐུལ་ཡང་ཞུས་འདུག

ཐེངས་འདིར་དོན་ཁང་གིས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ Mr. Tibor Handrey ལགས་དང་ཀརྨ་རྡོ་རྗེ་ལགས་གཉིས་བརྒྱུད་ནས་མཇལ་འཕྲད་གོ་སྒྲིག་ཞུ་ཐུབ་པ་བྱུང་འདུག  མཇལ་འཕྲད་སྐབས་དངོས་གྲུབ་རྡོ་རྗེ་ལགས་ཀྱིས་རྒྱ་ནག་གཞུང་གི་དབང་སྒྱུར་འོག་བོད་ནང་གི་ད་ལྟའི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཇི་ཙམ་ཛ་དྲག་པོ་ཆགས་ཡོད་པ་དང་། ལྷག་པར་འཛམ་གླིང་ནང་བོད་བརྒྱུད་ནང་བསྟན་སློབ་གཉེར་གནང་ཡུལ་བསྟི་གནས་ཁང་ཆེ་ཤོས་སུ་གྲགས་པ་གསེར་རྟ་བླ་རུང་སྒར་གཏོར་བཤིག་བཏང་དང་གཏོང་མུས་ཡིན་པ་མ་ཟད།  རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་ཞི་རྒོལ་བྱེད་མཁན་བོད་མི་རྣམས་འཛིན་བཟུང་བཀག་ཉར་བྱས་དང་བྱེད་བཞིན་པ། དེ་བཞིན་ཕྱི་ལོ་ ༢༠༠༩ ནས་ད་བར་བོད་ནང་དུ་བོད་མི་ ༡༥༡ རང་ལུས་མེར་སྲེག་བཏང་ནས་རྒྱ་ནག་གཞུང་གི་སྲིད་བྱུས་ལ་ཞི་རྒོལ་གནང་ཡོད་སྐོར་སོགས་ཞུས་འདུག

མཇལ་འཕྲད་ལེགས་པར་གྲུབ་མཚམས་སུ་དོན་གཅོད་དངོས་གྲུབ་རྡོ་རྗེ་ལགས་ཀྱིས་ལྕམ་སྐུ་མཆོག་ལ་སྟོན་པའི་ཞལ་ཐང་གཅིག་ཕུལ་བ་དང་སྦྲགས། ད་ཕན་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་དང་འབྱུང་འགྱུར་མུ་མཐུད་བོད་དོན་ཐོག་རྒྱབ་སྐྱོར་གནང་རྒྱུའི་འབོད་སྐུལ་ཡང་ཞུས་འདུག་པར་ལྕམ་སྐུ་མཆོག་ནས་མ་འོངས་པར་བོད་མི་དང་བོད་དོན་ལ་མཐའ་གཅིག་ཏུ་རྒྱབ་སྐྱོར་ཞུ་རྒྱུ་ཡིན་ཞེས་ཁས་ལེན་ཡང་གནང་འདུག་པ་བཅས།།