ཕྱི་ལོ་ ༢༠༡༨ ཟླ་ ༡ ཚེས་ ༥ རེས་གཟའ་པ་སངས།
༄༅། །ཕྱི་དྲིལ་བོད་ཡིག་ཚན་པའི་འགན་འཛིན་ངག་དབང་ཐོགས་མེད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༨ ཟླ་ ༡ ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་རྒྱ་གར་གྱི་དད་ལྡན་ཆོས་ཞུ་བ་གཙོ་བོར་གྱུར་བའི་དད་ལྡན་ཆོས་ཞུ་བ་གྲངས་ཁྲི་ལྔ་ཙམ་ལ་བདེན་པ་བཞི་དང་སཱ་ལུའི་ལྗང་པའི་མདོའི་ཆོས་འབྲེལ་དབུ་འཛུགས་མཛད་ཡོད།
དེ་ཡང་མགོན་པོ་གང་ཉིད་མཆོག་གསུང་ཆོས་ར་བར་༸ཞབས་སོར་འཁོད་བསྟུན་ས་སྐྱ་ཁྲི་འཛིན་མཆོག་དང་། དགའ་ལྡན་ཁྲི་རིན་པོ་ཆེ་མཆོག་གི ས་གཙོས་བླ་ཆེན་དང་མཁན་བླ་དགེ་འདུན། དེ་བཞིན་རྒྱ་གར་གྱི་དད་ལྡན་ཆོས་ཞུ་བ་དང་། ཕྱི་རྒྱལ་ཡུལ་གྲུ་ཁག་དང་རྒྱ་ནག་སྐམ་ས་ཆེན་མོ། བོད་བཅས་ནས་བཅར་བའི་ཆོས་ཞུ་བ་རྣམས་ལ་བཀའ་སློབ་སྩལ་དོན། ནམ་རྒྱུན་ཡོངས་གྲགས་ང་རང་ཚོ་ནང་པའི་གནས་ཆེན་རྡོ་རྗེ་གདན་ཞེས་ནང་པའི་གཞུང་ནས་སངས་རྒྱས་བཅོམ་ལྡན་འདས་ཀྱིས་ལོ་དྲུག་དཀའ་སྤྱད་མཛད་ནས་མཐར་བདག་མེད་པའི་ལྟ་བ་ཞེས་སྟོན་ནས་གྲིབ་གཉིས་བག་ཆགས་དང་བཅས་པ་སྤངས་ནས་མངོན་པར་རྫོགས་པ་སངས་རྒྱས་པའི་མཛད་པ་མཛད་ས་འདི་རེད།
གནས་འདི་ཁྱད་པར་ཅན་ཞིག་ཆགས་ཡོད། དེ་རིང་འདིར་གནམ་གཤིས་ཧ་ཅང་གྲང་མོ་འདུག འོན་ཀྱང་བྱིན་རླབས་ཆེ་བསམ་ནས་སྡོད་ཨང་། ཞེས་ཞལ་ཤོབ་མཛད་ནས་མུ་མཐུད་བཀའ་སློབ་སྩལ་དོན། དེ་རིང་དང་སང་ཉིན་གནངས་ཉིན་བཅས་ཉིན་གྲངས་གསུམ་རིང་གཙོ་བོ་ཆེད་དུ་བྱ་བའི་གདུལ་བྱ་ནི་རྒྱ་གར་ཡུལ་པའི་སློབ་ཕྲུག་དང་ནང་ཆོས་ལ་དོ་སྣང་ཡོད་མཁན་གང་ཙམ་ཞིག་རུབ་རུབ་བྱས་ཡོད། ཁོང་རྣམས་དེ་རིང་ཆེད་དུ་བྱ་བའི་གདུལ་བྱ་ཆགས་ཡོད། ཅེས་བཀའ་སློབ་སྩལ་རྗེས་རྒྱ་གར་བ་ཚོས་པཱ་ལི་དང་ལེགས་སྦྱར་སྐད་ནས་གཤིས་བརྗོད་གསུང་འདོན་གནང་།
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། བཅོམ་ལྡན་འདས་ཀྱིས་མངོན་པར་རྫོགས་པ་སངས་རྒྱས་ནས། ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་མཁོ་བོས་རྙེད། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་གནས་སུ་གནས་པར་བྱ། །ཞེས་རེ་ཞིག་ཆོས་མ་གསུང་པར་བཞུགས་པ་རེད། རྒྱུ་མཚན་ནི་དེའི་ཚེ་དེའི་དུས་རྒྱ་གར་ཡོངས་གྲགས་ལ་བདག་ཏུ་ལྟ་བ་ཞེས་ཕུང་པོ་ལས་དོན་གཞན་པའི་བདག་གཅིག་འདོད་ཀྱི་ཡོད། གང་ཡིན་བརྗོད་ན་སྐྱེ་བ་སྔ་ཕྱི་འདོད་པ་དང་འཇིག་རྟེན་བཀོད་པ་པོ་མི་འདོད་པ་བྱས་ནས་སྐྱེ་བ་སྔ་ཕྱི་འདོད་སྟབས། སྐྱེ་བ་སྔོན་མ་ནས་འདིར་འོང་མཁན། འདི་ནས་ཕྱི་མར་འགྲོ་མཁན་གཅིག་འདུག་བསམ་པ་དྲན་པ་རེད། ལུས་པོ་འདི་དང་སེམས་འདི་འགྲོ་ཡི་མེད་པ་ཧ་ཅང་གསལ་པོ་རེད། དེར་བརྟེན་ཕུང་པོ་ལས་དོན་གཞན་པའི་བདག་གཅིག་དགོས་འདུག་བསམས་ནས་གང་ལྟར་རིག་པས་བསྒྲུབ་ཡོད། བསམ་བློ་ཧ་ཅང་བཏང་འདུག དེ་ཡོངས་གྲགས་ཆགས་ཡོད། བཅོམ་ལྡན་འདས་ཀྱིས་ལོ་དྲུག་དཀའ་བ་སྤྱད་ནས་དགོངས་པ་མང་པོ་བཞེས་སྐབས་བདག་ཏུ་ལྟ་བ་དེས་ཉོན་མོངས་པའི་རྩ་བ་བྱེད་བཞིན་ཡོད་པ་མཁྱེན། དེར་བརྟེན་དེའི་ཚེ་དེའི་དུས་སུ་ཡོངས་སུ་གྲགས་པའི་ལྟ་གྲུབ་དང་མི་འདྲ་བ་ཞིག་བདག་མེད་པའི་ལྟ་བ་འདི་གསུངས་པ་རེད།
སངས་རྒྱས་ཀྱི་བསྟན་པ་རིག་པའི་ལམ་ནས་གཏན་ལ་ཕབ་ནས་གསུང་མཁན་དེ་ལེགས་སྦྱར་ཆོས་གཞུང་དེ་དག་གཙོ་བོ་རེད་འདུག ངོས་ཀྱིས་ནམ་རྒྱུན་ནཱ་ལེནྡྲའི་པཎ་གྲུབ་བཅུ་བདུན་ཞེས་ཤོད་བཞིན་པའི་གཞུང་དེ་དག་ད་ལྟ་ང་ཚོས་སློབ་དེབ་ནང་བཞིན་བརྩིས་ནས་སློབ་སྦྱོང་བྱེད་བཞིན་ཡོད། དེ་འདྲ་བྱས་ནས་བཅོམ་ལྡན་འདས་མྱ་ངན་ལས་འདས་ནས་ལོ་ ༢༦༠༠ ཡོངས་གྲགས་འཕགས་པ་གནས་བརྟན་སྡེ་པའི་ལུགས་སུ་གྲགས་པ་རེད། སངས་རྒྱས་བཅོམ་ལྡན་འདས་ཀྱི་བསྟན་པ་འདི་རྒྱ་གར་ནང་ལ་མཚོན་ན་བར་སྐབས་དར་རྒུད་སྣ་ཚོགས་བྱུང་ཡོད། འོན་ཀྱང་གཙོ་བོ་སངས་རྒྱས་པའི་བསྟན་པ་འདི་དུས་ད་ལྟ་ཡིན་ནའང་གནས་བཞིན་ཡོད། ལྷག་པར་མི་རྣམ་དཔྱོད་ཅན་གྱིས་ཞིབ་འཇུག་བྱེད་སྐབས་ལུང་ཙམ་ལ་ཡིད་ཆེས་མ་བྱས་པར་རིག་པའི་ལམ་ནས་དཔྱད་པ་བྱས་ནས་འགྲོ་དགོས་པ་མ་གཏོགས་ལུང་ཙམ་ལ་ཆ་མ་བཞག་མཁན་དེ་ཚོས་གཞི་ནས་དོ་སྣང་གསར་པ་ཞིག་སླེབ་བཞིན་ཡོད། དུས་ཚོད་འདི་འདྲ་ཞིག་སྒང་ལ་བསླེབས་ཡོད། ཅེས་སོགས་ཀྱི་བཀའ་སློབ་སྩལ་རྗེས་བདེན་བཞི་དང་སཱ་ལུའི་ལྗང་པའི་མདོའི་བཀའ་ཆོས་དབུ་འཛུགས་མཛད།
སྤྱིར་ཐེངས་འདིའི་ཆོས་འབྲེལ་རྣམས་སྐད་ཡིག་འདྲ་མིན་ཁག་ ༡༡ ཐོག་ཐད་ཀར་གསུང་བསྒྱུར་ཞུ་བཞིན་འདུག་པ་མ་ཟད། དྲ་རྒྱའི་ལམ་ནས་འཛམ་གླིང་ས་ཕྱོགས་གང་ས་ནས་གསུང་ཆོས་ཞུ་ཐུབ་པའི་མཐུན་རྐྱེན་ཡང་བསྐྲུན་ཡོད་པ་བཅས།།
