༢༠༡༨ ཟླ་ ༡ ཚེས་ ༡༥ རེས་གཟའ་ཟླ་བ།

༄༅། །ཕྱི་ལོ་ ༢༠༡༧ ལོར་ཨ་རིར་རྟེན་གཞི་བྱས་པའི་རང་དབང་ཁང་པས།  སྤྱི་ཚོགས་དྲ་ལམ་ལ་ཆེད་མངགས་མིག་འཛུགས་བྱས་པ་བརྒྱུད་མང་གཙོའི་ལམ་ལུགས་ལ་བརྩི་མེད་རྡོག་རོལ་ཚབས་ཆེ་ཤོས་གཏོང་མཁན་སྐོར་ལ་སྙན་ཐོ་ཞིག་བཏོན་པའི་ནང་། རྒྱ་ནག་དང་པོ་དང་། ཨང་གཉིས་པ་སི་རི་ཡ། ཨང་གསུམ་པ་ཨི་ཐོ་པི་ཨ་བཅས་ཡིན་པ་གསལ།  

 རྒྱ་ནག་གི་གཞུང་འབྲེལ་ཚགས་ཤོག་གཙོ་གྲས་ཤིན་ཧྭ་དྲ་རྒྱའི་སྟེང་གནས་ཚུལ་སྤེལ་བ་ལྟར་ན། ཕྱི་ལོ་ ༢༠༡༧ ལོར་རྒྱ་ནག་གཞུང་གིས་དྲ་རྒྱ་ ༡༢༨༠༠༠ ལྷག་བཀག་སྡོམ་བྱས་འདུག་པ་མ་ཟད།  སྤྱི་ཚོགས་བརྟན་ལྷིང་དང་རྒྱལ་ནང་བདེ་འཇགས་ཟེར་བར་སྙད་ནས་དཔེ་དེབ་གྲངས་ས་ཡ་ ༣༠.༩  ཁྲིམས་འགལ་དུ་བརྩིས་ནས་གཞུང་བཞེས་བཏང་ཡོད་འདུག 

རྒྱ་ནག་གཞུང་གིས་བོད་དང་། ཐེ་ཝན། གནམ་བདེ་སྒོ་མོ་ཆེ་ཐང་ཆེན་ཞེས་ཐ་སྙད་དེ་གསུམ་ལ་ཆེད་མངགས་མིག་རྟགས་བརྒྱབ་ནས་བརྗོད་གཞི་དེ་གསུམ་དང་འབྲེལ་བའི་གནས་ཚུལ་རྒྱས་བསྡུས་ཇི་འདྲ་ཞིག་ཡིན་རུང་དྲ་རྒྱའི་ཐོག་རྩ་བ་ནས་མཐོང་རྒྱུ་དང་ལྟ་ཀློག་བྱ་རྒྱུ་མེད་པ་བཟོས་འདུག

སྤྱི་ཚོགས་བརྟན་ལྷིང་དང་རྒྱལ་ནང་བདེ་འཇགས་ལ་སྙད་ནས་རྒྱ་ནག་གཞུང་གིས་ཁྲིམས་སྒྲིག་འདྲ་མིན་སྣ་ཚོགས་བཟོས་ཏེ་དྲ་ཐོག་བསམ་ཚུལ་དང་གཏམ་བརྗོད་རང་དབང་ལ་དམ་བསྒྲགས་ཤུགས་ཆེ་བྱས་ཡོད་པ་མ་ཟད། དྲ་རྒྱ་བེད་སྤྱོད་གཏོང་མཁན་རྣམས་ཀྱིས་དྲ་རྒྱ་བེད་སྤྱོད་བྱ་རྒྱུ་འབྲེལ་ཡོད་དོ་དམ་ལས་ཁུངས་སུ་རང་ཉིད་མིང་ངོ་མ་དགོད་དགོས།

སྔ་ལོའི་ཕྱི་ཟླ་ ༩ ནང་ཀན་ལྷོ་བོད་རིགས་རང་སྐྱོང་ཁུལ་རྨ་ཆུ་རྫོང་ཉེན་རྟོག་ལས་ཁུངས་ཀྱིས་ས་གནས་མང་ཚོགས་རྣམས་ལ་ཉེན་བརྡའི་དྲིལ་བསྒྲགས་ཤིག་བཀྲམ་པའི་ནང་། སྐད་འཕྲིན་ཚོགས་པའི་ཚོགས་གཙོ་དང་དྲ་ཚིགས་བེད་སྤྱོད་གཏོང་མཁན་ཡོངས་ནས་དྲ་ལམ་ཐོག་གནས་ཚུལ་སོགས་ཇི་འདྲ་ཞིག་བཀྲམ་ཡང་ནང་དོན་ཐད་འགན་ཁུར་དགོས་པ་དང་།  ཁྲིམས་ལུགས་དེས་དྲ་རྒྱའི་སྤྱི་ཚོགས་ཚུལ་མཐུན་གྱི་ལམ་ནས་ཡར་རྒྱས་གཏོང་རྒྱུར་ཞབས་འདེགས་སྒྲུབ་ཐུབ་རྒྱུ་མ་ཟད།  སྤྱི་ཚོགས་རིང་ལུགས་ཀྱི་རིན་ཐང་སྲུང་སྐྱོབ་ཐུབ་རྒྱུ་ཡིན་སྐོར་བཤད།

དེ་ཡང་རྒྱ་ནག་གཞུང་གི་མཐོང་སྣང་ལ་གལ་ཏེ་གནས་ཚུལ་དེ་ཉེན་ཚབས་ཡོད་པ་ཞིག་དང་།  རྙོག་གྲ་བཟོ་གཞི། ངོ་རྒོལ་བྱ་རྒྱུར་བརྒྱུད་སྐུལ་བྱེད་མཁན་རིགས་ཡིན་པར་རྒྱ་ནག་གཞུང་ལ་དོགས་གཞི་བྱུང་ཚེ་འཕྲལ་མར་དྲ་རྒྱ་དེ་དག་བཀག་སྡོམ་བྱེད་བཞིན་ཡོད།

འཕྲུལ་ཆས་ཡར་ཐོན་ཧ་ཅང་ཚད་མཐོ་པོ་ཡོད་པའི་མཁར་དྲ་རྒྱའི་ཉེན་རྟོག་པ་ས་ཡ་གཉིས་བཀྲམ་སྟེ་དྲ་རྒྱའི་རང་དབང་ཐོག་ཞིབ་བཤེར་བྱེད་འཇུག་གི་ཡོད།  ཉེན་རྟོག་པ་དེ་དག་གིས་ལས་འགན་ནི། སྤྱི་ཚོགས་གསར་འགྱུར་བརྒྱུད་ལམ་ཁག་གི་ནང་རྒྱ་ནག་གཞུང་ལ་སྐྱོན་བརྗོད་རིགས་བཀོད་ཡོད་ཚེ་དེ་དག་བཀག་སྡོམ་བྱ་རྒྱུ་བཅས་རེད། 

དྲ་རྒྱའི་སྟེང་གནས་ཚུལ་འདྲ་མིན་འགོད་མཁན་ཡིན་པར་སྙད་ནས་བོད་མི་མང་པོ་ཞིག་རྒྱ་ནག་གཞུང་གིས་འཛིན་བཟུང་བཀག་ཉར་བྱེད་བཞིན་ཡོད། སྔ་ལོའི་ཕྱི་ཟླ་ ༣ ནང་སི་ཁྲོན་ཞིང་ཆེན་དཀར་མཛེས་སེར་ཤུལ་རྫོང་ནས་ཡིན་པའི་དགེ་འདུན་ཞུ་བའི་བོད་མི་ཞིག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་དང་བོད་ཀྱི་རྒྱལ་དར་དྲ་ཐོག་ཏུ་བརྒྱུད་བསྐུར་བྱས་པར་བརྟེན་ནས་ཉེན་རྟོག་པས་ཁོང་ལ་ཉེས་རྡུང་དང་འཛིན་བཟུང་བྱས་འདུག

ཕྱི་ལོ་ ༢༠༡༦ ཟླ་ ༢ ནང་ཞོགས་ལྗང་ལགས་ཀྱིས་རེབ་གོང་དུ་རྒྱ་ནག་གི་དམག་མི་ཕོན་ཆེན་འབྱོར་ནས་མི་མང་ཐོག་དྲག་གནོན་བྱས་པའི་སྐོར་རྩོམ་ཡིག་ཅིག་བྲིས་པ་མ་ཟད། འདྲ་པར་ཁག་གཅིག་ཀྱང་སྐད་འཕྲིན་ WeChat དྲ་ལམ་བརྒྱུད་བོད་ཕྱི་ནང་གཉིས་སུ་དྲིལ་བསྒྲགས་ཧ་ཅང་ཁྱབ་ཆེན་པོ་བྱུང་ཡོད་སྟབས། ཁོང་ལ་རྒྱལ་ཁབ་ཁ་བྲལ་དང་སྤྱི་ཚོགས་ཟིང་འཁྲུག་སློང་མཁན་ཡིན་པའི་ཉེས་མིང་འོག་ལོ་གསུམ་རིང་བཙོན་འཇུག་གི་ཁྲིམས་ཐག་བཅད་ཡོད། 

ཕྱི་ལོ་ ༢༠༡༤ ཟླ་ ༩ ནང་འཇམ་དབྱངས་རྒྱ་མཚོ་ལགས་དང་རྣམ་རྒྱལ་དབང་ཕྱུག་ལགས་རྣམ་གཉིས་ཀྱིས་སྐད་འཕྲིན་བརྒྱུད་ནས་བོད་མི་ཁག་གཅིག་གིས་རྩ་ཆེ་བའི་གཅན་གཟན་གྱི་པགས་རིགས་རྒྱན་གོས་སུ་གྱོན་ཏེ་སྤྱི་ཚོགས་ཁྲོད་མིག་དཔེ་ངན་པ་འཇོག་བཞིན་པའི་ཐད་སྐྱོན་བརྗོད་དང་། བོད་མི་རྣམས་ཀྱིས་རང་བྱུང་ཁོར་ཡུག་དང་རི་སྐྱེས་སྲོག་ཆགས་ལ་བདག་གཅེས་བྱེད་དགོས་པའི་འདྲ་པར་དང་ཡི་གེ་བྲིས་པར་བརྟེན། ས་གནས་རྒྱ་གཞུང་ཉེན་རྟོག་ལས་ཁུངས་ཀྱིས་༼ བསྙད་རྐོ་ཟིང་སློང་།༽ ཞེས་པའི་ཉེས་མིང་འོག་བོད་མི་འཇམ་དབྱངས་རྒྱ་མཚོ་ལགས་ལ་ལོ་ ༧ དང་། རྣམ་རྒྱལ་དབང་ཕྱུག་ལགས་ལ་ལོ་ ༥ བཅས་ཀྱི་བཙོན་འཇུག་གི་ཁྲིམས་ཐག་བཅད་ཡོད་པ་བཅས།།