༢༠༡༨ ཟླ་ ༡ ཚེས་ ༢༣ རེས་གཟའ་མིག་དམར།
༄༅། །འདི་གར་འཕྲོད་བསྟེན་ལས་ཁུངས་ནས་བཏང་གནས་ནང་འཁོད་དོན། ཨ་རིའི་རོགས་ཚོགས་ PRM ནས་རོགས་དངུལ་མཐུན་འགྱུར་འོག་དབུས་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་རང་རེའི་ཁྱབ་ཁོངས་གཞིས་ཆགས་ཆེ་ཁག་བརྒྱད་ལ་ཆུའི་འབྱུང་ཁུངས་དང་དཀའ་སེལ་རྒྱུན་གནས་ཐུབ་ཐབས་ཆེད་རྒྱ་གར་སྦེང་ལོར་གནས་སྡོད་ས་ཆུའི་དཔྱད་རིག་ཁང་ Space Geo Tech གི་ཁྱད་ལས་པ་གླ་གཡར་ཆོད་གན་དང་མཉམ་རུབ་ཐོག་གོང་འཁོད་ས་གནས་ཁག་ལ་ཕྱི་ལོ་ ༢༠༡༨།༡།༡༢ ནས་འགོ་འཛུགས་ཀྱིས་ད་བར་ལྷོ་གཞིས་ཁག་ལྔའི་དེ་སྔོན་བསྒྲུབས་ཟིན་པའི་ཆུའི་ལས་གཞི་ཁག་ལ་དབྱེ་ཞིབ་དང་། ད་ལྟའི་ཆུའི་འབྱུང་ཁུངས་དང་གནས་བབ། དེ་བཞིན་ས་སྟེང་འོག་གཉིས་ཀྱི་ཆུའི་སྤུད་ཚད། གཞིས་མི་རྣམས་རྒྱུན་དུ་འཐུང་ཆུ་བེད་སྤྱོད་གང་གནང་བཞིན་པ། མ་ཟད་ས་ཞིང་ཆེད་འདྲེན་བཞིན་པའི་ས་འོག་ཆུ་འཐེན་འཕྲུལ་འཁོར་ཁག་ལ་ཞིབ་འཇུག གཞིས་ཆགས་ཀྱི་ས་ཁྲའི་ནང་ཚུད་དང་ཉེ་འགྲམ་མཐའ་འཁོར་ཁག་ལ་རྒྱུག་ཆུ་དང། འཁྱིལ་ཆུ། མཚེའུ་ཡོད་མེད་སོགས་ལ་སྤྱི་ཡོངས་ནས་ཞིབ་འཇུག གཞན་ཡང་སྲུང་སྐར་ཐོག་ནས་འདྲ་པར་ Satellite Im྄age ལེན་ནས་གཞིས་ཆགས་ཀྱི་ས་ཁྲའི་ནང་ཚུད་དང་མཐའ་འཁོར་བཅས་སྤྱི་ཡོངས་ནས་ཆུའི་འབྱུང་ཁུངས་དང་གནས་འབབ་སོགས་ཞིབ་འཇུག་མཐིལ་ཕྱིན་གནང་ནས་ལྷོ་གཞིས་ཁག་ལྔ་ལེགས་སྒྲུབས་ཟིན།
ད་ལྟ་དབུས་གཞིས་ཁག་གསུམ་དུ་ལས་གཞི་འགྲོ་མུས་ཐོག་སྤྱི་ཟླ་གཉིས་པའི་ཚེས་ཤར་ལ་གཞིས་ཆགས་ཁག་བརྒྱད་ཀྱི་ཆུའི་ཞིབ་འཇུག་ལེགས་བསྒྲུབ་ཟིན་གྱི་ཡོད། ད་ལྟའི་འཆར་དབུས་གཞིས་གསུམ་ལ་ཆུའི་ཞིབ་འཇུག་གི་ལས་གཞི་འགྲོ་མུས་ཡིན། ལས་གཞི་འདི་བཞིན་རང་རེའི་བོད་མིའི་གཞིས་ཆགས་ཁག་གི་ད་ལྟའི་ཆུའི་གནས་སྟངས་དང་མ་འོངས་པར་བོད་མིའི་གཞིས་ཆགས་ཁག་གི་ཆུའི་དཀའ་སེལ་གྱི་གནད་དོན་དང་འབྲེལ་བ་ཆེན་པོ་ཡོད་པར་བརྟེན་དབུས་ལས་ནས་གལ་ཆེར་རྩིས་ཏེ་ལྷོ་གཞིས་ཆགས་ཆེ་ཁག་ལྔ་ལ་དབུས་ནས་འབྲེལ་ལས་ཆེད་གཏོང་བཏང་ནས་འདས་པའི་ཉིན་ཤས་ནས་འགོ་འཛུགས་ཀྱིས་ཉིན་ལྟར་སྔ་དྲོའི་ཚོུད་ ༩ ནས་ཕྱི་དྲོའི་ཚོུད་ ༦ སྐབས་རེ་ཚོུད་ ༧ ཙམ་བར་དཀའ་ངལ་འཛེམས་མེད་ཐོག་ཞིབ་འཇུག་གནང་བཞིན་ཡོད།
དབུས་གཞིས་གསུམ་དུ་འཕྲོད་བསྟེན་ལས་ཁུངས་ནས་འགྲོ་མི་མངགས་གཏོང་མ་ཐུབ་ཀྱང་ས་གནས་འགོ་འཛིན་ལས་ཁུངས་ལ་བཀོད་མངགས་ནན་ཟབ་ཀྱིས་མཐུན་འགྱུར་རོགས་རམ་གནང་མུས་རེད། ད་རེས་འཕྲོད་བསྟེན་ལས་ཁུངས་ནས་གཞིས་ཆགས་ཆེ་ཁག་བརྒྱད་ལ་ཆུའི་ཞིབ་འཇུག་གནང་དགོས་པའི་རྒྱུ་མཚན་གཅིག་ནི་བར་ལམ་ཞིག་ནས་རྒྱ་གར་གྱི་ས་གནས་འགའ་ཤས་ལ་ཆར་ཆུ་དུས་སུ་མ་འབབ་པའི་དབང་གིས་ས་ཞིང་ལ་ཆུ་འདྲེན་དཀའ་བ་དང་། ཡུལ་གྱི་ཕུ་ཆུ་དང་རྒྱུག་ཆུ་རིམ་སྐམ་པར་ཆུའི་གནས་སྟངས་སྐྱོ་རུ་ཕྱིན་པ་མ་ཟད་རིམ་པས་ས་འོག་གི་ཆུའི་མཐོ་ཚད་ཀྱང་དམའ་རུ་ཕྱིན་བརྟེན་ས་གནས་ཁག་ནས་འཐུང་ཆུ་དང་འབྲེལ་བའི་ལས་གཞི་མང་པོ་ཞིག་འཕྲོད་བསྟེན་ལས་ཁུངས་སུ་འབྱོར་བཞིན་པར་མུ་མཐུད་དེ་ལྟར་གནས་ཚེ་མ་འོངས་པར་ཆུའི་དཀའ་ངལ་ཆེན་པོ་ཞིག་མ་འཕྲད་པའི་ངེས་པ་མེད་བརྟེན་ད་རེས་ཀྱི་ཆུའི་ཞིབ་འཇུག་འདི་གནང་ཡོད། ཟླ་རྗེས་ནས་ད་ལྟའི་ཞིབ་འཇུག་གིས་སྙན་ཐོ་མཐའ་མ་ལག་སོན་བྱུང་བ་དང་། གོང་འཁོད་ས་གནས་ཁག་གི་ཆུའི་གནས་སྟངས་གང་ཙམ་རྟོག་པའི་ཐོག་མ་འོངས་པར་ལས་འཆར་གང་སྤེལ་དགོས་མིན་གྱི་ཐད་རིམ་པས་ཤེས་རྟོགས་དང་འདེང་ཚོད་ཅིག་རྙེད་ཐུབ་པའི་རེ་བ་དང་འབད་བརྩོན་གནང་བཞིན་ཡོད།
