ཕྱི་ལོ་ ༢༠༡༨ ཟླ་ ༡ ཚེས་ ༢༥ རེས་གཟའ་ཕུར་བུ།
༄༅། །འདི་གར་ཨོ་སི་ཀྲི་ལི་ཡ་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། ཨོ་གླིང་མེལ་བྷོན་གྲོང་ཁྱེར་དུ་རྟེན་གཞི་བྱས་པའི་བོད་རྒྱ་དམངས་ཁྲོད་འབྲེལ་ལམ་སྐུལ་སྤེལ་ལྷན་ཚོགས་ཀྱི་ལས་སྣེ་ཚོའི་ཐུགས་འདུན་བཞིན། བོད་རྒྱ་མི་རིགས་གཉིས་དབར་གྱི་དམངས་ཁྲོད་འབྲེལ་ལམ་གཟེངས་སུ་ཐོན་པའི་གཟེངས་རྟགས་སྐབས་དྲུག་པ་དེ་བཞིན་ནེའུ་ཛི་ལན་ཌའི་བོད་རྒྱ་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་རིན་ཆེན་དོན་འགྲུབ་ལགས་དང་། ཁོང་གི་དབུ་ཁྲིད་པའི་ཚོགས་པ་ཐུན་མོང་ལ་འབུལ་རྒྱུའི་ཐག་གཅོད་བྱུང་འདུག་པ་ལྟར། སྐབས་དྲུག་པའི་གཟེངས་རྟགས་འབུལ་བཞེས་ཀྱི་མཛད་སྒོ་དེ་ཟླ་འདིའི་ཕྱི་ཚེས་ ༢༡ ཉིན་ནིའུ་ཛི་ལན་ཌིའི་གྲོང་ཁྱེར་ཨོག་ལན་ཌའི་ནང་དུ་ཉི་མ་བཀྲ་ཤིས་ཆོས་ཚོགས་སུ་ཉིན་རྒྱབ་ཆུ་ཚོད་ ༢ ནས་ ༥ བར་སྐོང་ཚོགས་གནང་སོང་།
དེ་ཡང་ཚོགས་པ་དེས་ཇི་ལྟར་མགྲོན་འབོད་གནང་འདུག་པ་བཞིན་སྐབས་འདིའི་ཚོགས་འདུར་སྐུ་མགྲོན་གཙོ་བོར་ཨོ་སི་ཀྲི་ལི་ཡ་བོད་ཀྱི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་སྤྱི་ཟུར་འབའ་བ་སྐལ་བཟང་རྒྱལ་མཚན་ལགས་ཆེད་ཕེབས་གནང་སྟེ་མཛད་སྒོའི་སྐབས་བོད་རྒྱའི་ཆབ་སྲིད་གནས་སྟངས་སོགས་ཀྱི་སྐོར་ལ་གསུང་བཤད་གནང་བ་དང་རྒྱ་རིགས་ཚོགས་བཅར་ཚོ་དང་ལྷན་དུ་དྲི་བར་དྲིས་ལན་དང་ཕན་ཚུན་བགྲོ་གླེང་ལྷུག་པོར་གནང་།
གཟེངས་རྟགས་འབུལ་བཞེས་ཀྱི་མཛད་སྒོ་དེ་བཞིན་ནིའུ་ཛི་ལན་ཌི་བོད་རྒྱ་མཛའ་འབྲེལ་ཚོགས་པའི་ཚོགས་གཞོན་སྐུ་ཞབས་ཁྲིན་ཝེ་ཅན་ལགས་ཀྱིས་གཙོ་སྐྱོང་གནང་བ་དང་། ཁོང་གི་ཐོག་མར་སྐུ་ཞབས་ཡུས་ཧྲི་ཤིན་ལགས་ཀྱི་སྣེ་ཁྲིད་པའི་གྲོགས་པོ་རྣམ་པ་དང་། རྒྱ་རིགས་འབྲེལ་མཐུད་པ་བཅས་ཆེད་དུ་ཨོ་གླིང་ནས་འདིར་ཕེབས་པར་དགའ་བསུ་ཞུས་པ་དང་། ནིའུ་ཛི་ལན་ཌི་བོད་རྒྱ་མཛའ་འབྲེལ་ཚོགས་པ་དང་ཚོགས་པའི་ཚོགས་གཙོ་སྐུ་ཞབས་རིན་ཆེན་དོན་གྲུབ་ལགས་ཐུན་མོང་ལ་གཟེངས་རྟགས་བྱ་དགའ་འདི་ལྟ་བུ་ཞིག་ཐོབ་པ་ནི་ཚོགས་པ་དང་ཚོགས་གཙོ་སྒེར་གྱི་གཟི་བརྗིད་ཡིན་པ་མ་ཟད། མ་འོངས་ཚོགས་པའི་ལས་དོན་དེ་བས་ཡར་རྒྱས་ཚགས་ཚུད་དང་། བོད་རྒྱ་གཉིས་དབར་གྱི་འབྲེལ་འདྲིས་སྔར་བས་གོང་མཐོར་གཏོང་རྒྱུར་སྐུལ་ལྕག་ཆེན་པོ་ཐེབས་རྒྱུ་ཡིན་པ་སོགས་སྐོར་གསུང་བཤད་གནང་།
དེ་ནས་བོད་རྒྱ་དམངས་ཁྲོད་འབྲེལ་ལམ་སྐུལ་སྤེལ་ལྷན་ཚོགས་ཀྱི་ཚོགས་གཙོ་སྐུ་ཞབས་ཡུས་ཧྲི་ཤིན་ལགས་ཀྱིས་གཟེངས་རྟགས་བྱ་དགའི་བསྟོད་ཚིག་སྒྲོག་སྦྱངས་གནང་བ་དང་། ཁོང་གིས་བོད་རྒྱ་མི་རིགས་གཉིས་དབར་གྱི་འབྲེལ་འདྲིས་ཀྱི་ལས་དོན་འདི་རྙོག་ཟིང་ཅན་དང་སྤྱི་བཏང་ཅན་ཞིག་ཡིན་པར་བརྟེན་ལས་དོན་འདིར་ཐུགས་འཁུར་གནང་མཁན་ཚང་མས་སྒེར་གྱི་ཁེ་ཕན་ལ་མ་འཛིན་པར། ཐུན་མོང་ཐོག་ལས་དོན་འདིར་མཉམ་ཞུགས་གནང་དགོས་པ་མ་ཟད། ཡུན་རིང་རྒྱུན་འཁྱོངས་བྱེད་དགོས་པ་ནི་ཤིན་ཏུ་གལ་ཆེ་ཡིན་སྐོར་དང་། ད་རེས་སྐབས་དྲུག་པའི་གཟེངས་རྟགས་དེ་བཞིན་ནེའུ་ཛི་ལན་ཌའི་བོད་རྒྱ་མཛའ་འབྲེལ་ཚོགས་པའི་ཚོགས་གཙོ་རིན་ཆེན་ལགས་དང་ཚོགས་པ་ཐུན་མོང་ལ་ཕུལ་དགོས་པའི་རྒྱུ་མཚན་གཙོ་བོ་ནི། ད་བར་ཚོགས་པ་འདི་བཙུགས་པ་ནས་བཟུང་ས་གནས་སུ་བོད་ཀྱི་ལོ་གསར་དང་༧རྒྱལ་དབང་ཡིད་བཞིན་ནོར་བུའི་སྐུའི་འཁྲུངས་སྐར། གསུམ་བཅུའི་དུས་དྲན་སོགས་སུ་རྒྱ་རིགས་གྲོགས་པོ་ཚོ་མཉམ་ཞུགས་གནང་རྒྱུའི་གོ་སྐབས་བསྐྲུན་པ་དང་། རྒྱ་ནག་གི་དྲུག་བཞིའི་དུས་དྲན་སོགས་ཀྱི་སྐབས་བོད་རིགས་ཚོས་མཉམ་ཞུགས་དང་། ལོ་ཤས་གོང་༧གོང་ས་མཆོག་འདིར་ཕེབས་སྐབས་རྒྱ་རིགས་ཚོ་དང་མཇལ་འཕྲད་ཀྱི་གོ་སྐབས་བསྐྲུན་པ་དང་སྔ་ལོར་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་འདིར་ཕེབས་སྐབས་ཀྱང་རྒྱ་རིགས་ཚོ་དང་ལྷན་བཀའ་མོལ་ལྷུག་པོར་གནང་རྒྱུའི་གོ་སྐབས་བསྐྲུན་པ་སོགས་བོད་རྒྱ་མི་རིགས་གཉིས་དབར་ཕན་ཚུན་འབྲེལ་ལམ་གོང་སྤེལ་གཟེངས་སུ་ཐོན་པ་གནང་བར་ངོས་འཛིན་བྱེད་ཀྱིན་ཡོད་ཅེས་དང་།
ཁོང་གི་མུ་མཐུད་གསུངས་དོན། སྐུ་ཞབས་རིན་ཆེན་ལགས་བོད་དུ་སྐུ་འཁྲུངས་པ་དང་། དགུང་ལོ་ ༡༡ སྐབས་སུ་བོད་མི་ཁྱུ་ཅིག་དང་མཉམ་དུ་ལྷ་ས་ནས་རིམ་བཞིན་ཧི་མ་ལ་ཡ་རི་རྒྱུད་བརྒལ་ཏེ་རྒྱ་གར་དུ་འབྱོར་མཚམས་མ་སུ་རི་བོད་ཁྱིམ་དུ་སློབ་སྦྱོང་མཐར་ཕྱིན་པ་དང་། ཕྱིས་སུ་ནིའུ་ཛི་ལན་ཌིར་གནས་སྤོས་གནང་སྟེ་རྡོ་རྗེ་འཆང་ཆོས་ཚོགས་སུ་བོད་ཨིན་རྒྱ་གསུན་གྱི་གསུམ་སྒྱུར་གནང་བ་མ་ཟད། ༧གོང་ས་༧སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་ཕྱི་ལོ་ ༢༠༡༡ ནས་ནིའུ་ཛི་ལན་ཌིར་ཡོད་པའི་རྒྱ་རིགས་གྲོགས་པོ་འགའ་དང་ལྷན་དུ་བོད་རྒྱ་མཛའ་འབྲེལ་ཚོགས་པ་བཙུགས་ནས་བཟུང་ད་བར་ཚོགས་གཙོའི་འགན་བཞེས་ཏེ་ལས་དོན་གཟེངས་སུ་ཐོན་པ་གནང་ཡོད་པར་བརྟེན་དེ་རིང་གི་གཟེངས་རྟགས་ཕུལ་བ་ནི་མིང་དོན་མཚུངས་པ་ཞིག་རེད་ཅེས་གསུངས།
སྐུ་ཞབས་རིན་ཆེན་དོན་གྲུབ་ལགས་ཀྱིས་གཟེངས་རྟགས་བཞེས་སྐབས་ཧ་ཅང་ཁེངས་སྐྱུང་བའི་ཐོག་ནས་རང་ཉིད་ལ་གཟེངས་རྟགས་དེ་ལྟ་བུ་ཞིག་ཐོབ་རྒྱུའི་འོས་བབ་མེད་པ་དང་། ཚོགས་པ་འདིའི་སྲོག་ཤིང་ལྟ་བུ་ནི་སྐུ་ཞབས་ཁྲིན་ཝེ་ཅན་ལགས་ཡིན་སྟབས། ཚོགས་པ་འདིར་གཟེངས་རྟགས་གནང་མཁན་ལ་ཐུགས་རྗེ་ཆེ་ཞུས་པའི་གསུང་བཤད་གནང་བ་མ་ཟད། ད་བར་ལྷག་བསམ་དང་བ་ཆེན་པོས་རང་རེའི་རྩ་དོན་ཁོ་ནར་དམིགས་ཏེ་ལས་དོན་གང་སྤྱིར་ཕྱར་གྲུ་མཉམ་འདེགས་གནང་མཁན་ཚོ་དང་། ལྷག་་པར་དུ་ནེའུ་ཛི་ལན་ཌིའི་བོད་རྒྱ་མཛའ་འབྲེལ་ཚོགས་པ་ཐོག་མར་སྐུ་བལྟམས་པ་ནས་བཟུང་ད་བར་དངོས་ཤུགས་བརྒྱུད་གསུམ་གང་གི་ཐད་ནས་ཀྱང་རྒྱ་ཆེ་ཆུང་ལ་མ་བལྟོས་པར་བཅོས་མིན་ལྷག་བསམ་ཆེན་པོས་རྒྱབ་སྐྱོར་གནང་མཁན་ཚང་མར་ཡང་བཀའ་དྲིན་བླ་མེད་ཆེ་ཞེས་ཞུས་པ་དང་ཆབས་ཅིག བཀའ་དྲིན་རྗེས་དྲན་དང་མཐུན་སྒྲིལ་དང་གཙང་ལྷད་མེད་ཀྱི་རྟེན་འབྲེལ་མཚོན་བྱེད་དུ་ཨོསི་ཀྲི་ལི་ཡ་ནས་ཕེབས་མཁན་རྒྱ་རིགས་གསུམ་དང་རྒྱ་རིགས་འབྲེལ་མཐུད་པ་འབའ་བ་སྐལ་བཟང་རྒྱལ་མཚན་ལགས་བཅས་ཁོང་རྣམ་པ་བཞིར་ཐུབ་དབང་གི་སྐུ་འདྲ་དཀར་པོ་ཆུང་ཆུང་རེ་དང་མཇལ་དར་རེ་བཅས་རེ་སྐུལ་ཞུས་པ་བཞིན་ནེའུ་ཛི་ལན་ཌའི་བོད་ཀྱི་གྲོགས་པོ་ཚོགས་པའི་ཚོགས་གཙོ་སྐུ་ཞབས་ཐུབ་བསྟན་སྐལ་བཟང་ལགས་ཀྱིས་གནང་ཡོད།
ཚོགས་པ་དེའི་ལས་སྣེ་རྒྱ་རིགས་ཤེས་ཡོན་པ་དང་སྙན་ངག་པ་གྲགས་ཅན་སྐུ་ཞབས་ཨཱ་མོ་ལགས་ནས་ཚོགས་འདུའི་སྐབས་ཚོགས་པ་དེའི་ངོ་སྤྲོད་གནང་དོན། ཚོགས་པ་འདི་༧གོང་ས་༧སྐྱབས་མགོན་ཆེན་པོ་མཆོག་གི་དགོངས་པ་གཞིར་བཟུང་ཕྱི་ལོ་ ༢༠༡༢ ལོར་བཙུགས་ཤིང་། ཕྱི་ལོ་ ༢༠༡༣ ལོ་ནས་གཟེངས་རྟགས་འབུལ་རྒྱུའི་ལས་གཞི་བརྩམ་པ་དང་། གཟེངས་རྟགས་དང་པོ་དེའང་སྐུ་ཞབས་ཁྲིན་ཝེ་ཅན་དང་སྐུ་ཞབས་ཁྲིན་ཝེ་མིང་སྤུན་མཆེད་གཉིས་ལ་༧གོང་ས་སྐྱབས་མགོན་ཆེན་པོ་མཆོག་གི་ཕྱག་ནས་གནང་བའི་བསྐལ་བཟང་གི་གོ་སྐབས་འཐོབ་ཡོད། དེ་ནས་རིམ་པ་བཞིན་གཟེངས་རྟགས་སྐབས་གཉིས་པ་དེ་རྒྱ་ནག་རང་དུ་ཡོད་པའི་གྲགས་ཅན་རྩོམ་པ་པོ་སྐུ་ཞབས་ཝང་ལི་ཞུང་དང་ཚེ་རིང་འོད་ཟེར་བཟའ་ཚང་གཉིས་ལ་ཕུལ་བ་དང་། གཟེངས་རྟགས་སྐབས་གསུམ་པ་དེ་བོད་མདོ་ཁམས་སྡེ་དགེ་ནས་ཡིན་པའི་གྲགས་ཅན་སྒྱུ་རྩལ་བ་ཤར་རི་ཉི་མ་དང་ཁོང་གི་བུ་མོ་ཟླ་བ་སྒྲོལ་མ། གཟེངས་རྟགས་སྐབས་བཞི་པ་དེ་བོད་རྒྱ་ཨིན་གསུམ་གྱི་ཚིག་མཛོད་བརྩམས་མཁན་དང་སློབ་གྲྭ་མང་པོ་གཉེར་མཁན་མཁས་དབང་བཀྲ་ཤིས་ཚེ་རིང་ལགས། གཟེངས་རྟགས་སྐབས་ལྔ་པ་དེ་ཧོང་ཀོང་དུ་བོད་ཀྱི་གསུམ་བཅུ་དུས་དྲན་ཐེངས་དང་པོ་སྲུང་བརྩི་ཞུས་མཁན་བུད་མེད་ཞོས་ཞན་མིང་(ཏོ་ཏོ་ Dor Dor)དང་མོས་བཙུགས་པའི་ཧོང་ཀང་དང་བོད་མཉམ་བསྐྱོད་(“香港与西藏同行（Hong Kong Stand with Tibet）)”ཅེས་པའི་ཚོགས་པར་དེར་ཕུལ་ཡོད་པའི་སྐོར་ངོ་སྤྲོད་གནང་།
ནིའུ་ཛི་ལན་ཌི་བོད་རྒྱ་མཛའ་འབྲེལ་ཚོགས་པའི་དྲུང་ཆེ་སྐུ་ཞབས་ཏིང་ལགས་ནས་ཚོགས་པའི་ཚབ་ཞུས་ཞུས་ཏེ་གཟེངས་རྟགས་བྱ་དགའ་བཞེས་སྐབས་བོད་སྐད་ཀྱི་ལམ་ནས་གངས་རི་རྭ་བའི་བསྐོར་བའི་ཞིང་ཁམས་སུ། ཕན་དང་བདེ་བ་མ་ལུས་འབྱུང་བའི་གནས། སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི། ཞབས་པད་བསྐལ་བརྒྱའི་བར་དུ་བརྟན་གྱུར་ཅིག་ཅེས་གླུ་རུ་ལེན་པར་ཚོགས་བཅར་བ་ཚང་མས་དགའ་བསུའི་ཕྱག་བརྡབ་པ་དང་། ནིའུ་ཛི་ལན་ཌི་བོད་རྒྱ་མཛའ་འབྲེལ་ཚོགས་པས་ཀྱང་ཐུགས་རྗེ་ལེགས་འབུལ་གྱི་ཚུལ་དུ་བོད་རྒྱ་ཞི་མཐུན་ཞེས་ཡིག་གཟུགས་ལེགས་ཅན་གྱི་པར་སྒྲོམ་ཆེད་དུ་བཟོས་ཏེ་བོད་རྒྱ་དམངས་ཁྲོད་འབྲེལ་ལམ་སྐུལ་སྤེལ་ལྷན་ཚོགས་ལ་ཕུལ་ཡོད།
མཛད་སྒོའི་མཇུག་ཏུ་རྒྱ་རིགས་འབྲེལ་མཐུད་པ་འབའ་བ་སྐལ་བཟང་རྒྱལ་ལགས་ཀྱིས་སྐུ་ཚབ་དོན་གཅོད་ཁང་གི་ཚབ་ཞུས་ཏེ་གཟེངས་རྟགས་གནང་མཁན་དང་ཞུས་མཁན་ཚང་མར་ལེགས་སོ་བསྔགས་བརྗོད་དང་འབྲེལ་དཀར་གཙང་གི་མཇལ་དར་རེ་ཕུལ་བ་མ་ཟད། མཛད་སྒོ་གོ་སྒྲིག་གནང་མཁན་ཀྱིས་རེ་མོས་གནང་བ་ལྟར། ༧གོང་ས་༧སྐྱབས་མགོན་ཆེན་པོ་མཆོག་གི་གཉིས་སྨན་དབུ་མའི་ལམ་གྱི་དགོངས་དོན་དང་བོད་མིའི་སྒྲིག་འདུགས་གཞུང་གི་བོད་དོན་སེལ་ཐབས་ཀྱི་ལངས་ཕྱོགས། བོད་རྒྱ་གཉིས་བར་གྱི་ད་ལྟའི་གནས་བབ་བཅས་སྐོར་བཀའ་སློབ་གནང་བ་དང་། ཚོགས་བཅར་བ་རྒྱ་མི་ཙོས་དྲི་བ་ཁག་བཏོན་པར་ལན་འདེབས་གོ་བདེ་མཐིལ་ཕྱིན་གནང་སྟེ་མཛད་སྒོ་རྒྱལ་ཁའི་ངང་གྲོལ་ཡོད།
ད་ཐེངས་རྒྱ་རིགས་འབྲེལ་མཐུད་པ་ནིའུ་དི་ལན་ཌིར་གཞུང་དོན་ཕྱོགས་བསྐྱོད་སྐབས་སྐུ་ཚབ་དོན་གཅོད་མཚོ་སྒོ་ལྷག་པ་མལགས་ཀྱིས་བོད་རིགས་ཚོགས་པ་དང་ཆོས་ཚོགས་ཁག་གི་ལས་སྣེ་དང་བླ་སྤྲུལ་དགེ་བཤེས་ཚོར་ཡང་ཏོག་ཙམ་ཐུག་རྒྱུའི་བཀོད་མངགས་ཕེབས་པ་ལྟར། གཟེངས་རྟགས་འབུལ་བཞེས་ཀྱི་མཛད་སྒོའི་རྗེས་ཙམ་ལ་བོད་རིགས་ཚོ་གཅིག་པུར་ཟུར་འཛོམས་གསུང་བཤད་དང་། ཟླ་འདིའི་ཕྱི་ཚེས་ ༢༢ རེས་གཟའ་ཟླ་བ་ཉིན་གྱི་དགོང་དྲོའི་ཆུ་ཚོད་ ༦ ཐོག་བོད་རྒྱ་མཛའ་འབྲེལ་ཚོགས་པའི་ཚོགས་གཙོ་དང་། ནིའུ་ཛི་ལན་ཌིའི་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་རིན་ཆེན་དོན་གྲུབ་ལགས་ཀྱི་ཁྱིམ་དུ་རྒྱ་བོད་གྲོགས་པོ་ཚང་མར་གསོལ་ཚིགས་ཤིག་ཕུལ་སྐབས་ཀྱང་ཕན་ཚུན་བཀའ་མོལ་ལྷུག་པོ་བྱུང་སོང་བ་བཅས། །
