ཕྱི་ལོ་ ༢༠༡༨ ཟླ་ ༡ ཚེས་ ༢༦ རེས་གཟའ་པ་སངས།
༄༅། །ཕྱི་ལོ་ ༢༠༡༨ ཟླ་ ༡ ཚེས་ ༢༦ ཉིན་བོད་མིའི་སྒྲིག་འཛུགས་ནས་རྒྱ་གར་གྱི་མང་གཙོའི་དུས་ཆེན་ཐེངས་ ༦༩ བཀའ་ཤག་མདུན་ཐང་དུ་སྲུང་བརྩི་ཞུས་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་བོད་མིའི་སྒྲིག་འཛུགས་ཀྱི་སྲི་ཞུ་བ་དྲུང་འཕར་ཡན་བཀའ་ཤག་གི་མདུན་ཐང་དུ་ལྷན་འཛོམས་ཐོག་ཚང་མ་སྐུ་བཞེངས་ཀྱིས་རྒྱ་གར་གྱི་རྒྱལ་གླུ་བཏང་བ་དང་ཆབས་ཅིག་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་རྒྱ་གར་གྱི་རྒྱལ་དར་སྒྲེང་འཛུགས་གནང་ཡོད།
དེ་ནས་བཀའ་བློན་མཆོག་གིས་རྒྱ་གར་གྱི་མང་གཙོའི་དུས་ཆེན་སྲུང་བརྩི་ཞུ་དགོས་དོན་སྐོར་གསར་འགོད་པ་ཚོར་གསུང་དོན། དེ་རིང་རྒྱ་གར་རྒྱལ་ཁབ་ཆེན་པོ་སྤྱི་མཐུན་རྒྱལ་ཁབ་ཀྱི་ངོ་བོར་གྱུར་པ་དང་མང་གཙོའི་ངོ་བོར་གྱུར་ནས་མི་ལོ་ ༦༩ ཧྲིལ་པོ་འཁོར་བའི་ཉིན་མོར་བོད་མི་སྤྱི་དང་། ལྷག་པར་བོད་མིའི་སྒྲིག་འཛུགས་ནས་རྒྱ་གར་གཞུང་མང་གཉིས་ལ་སྙིང་ཐག་པ་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
ལོ་ངོ་ ༦༩ རིང་ལ་རྒྱ་གར་རྒྱལ་ཁབ་འདི་གང་ཅིའི་ཐད་ཡར་རྒྱས་ཧ་ཅང་ཆེན་པོ་ཕྱིན་ཏེ་གྲུབ་འབྲས་ཆེན་པོ་སོན་ཡོད་པར་བསྔགས་བརྗོད་དང་དགའ་ཚོར་ཞུ་རྒྱུ་ཡིན། འབྱུང་འགྱུར་ནང་སྔར་ལས་ལྷག་ཡར་རྒྱས་མུ་མཐུད་ཕྱིན་ནས་འཛམ་གླིང་ནང་མིང་དོན་མཚུངས་པའི་སྟོབས་ཆེན་རྒྱལ་ཁབ་ཞིག་འགྱུར་རྒྱུའི་ཡིད་ཆེས་དང་རེ་བ་ཡོད།
ད་རེས་བོད་པ་དང་འབྲེལ་བ་ཆེན་པོ་ཡོད་པའི་ཆ་ནས་བཙན་བྱོལ་བོད་མི་སྤྱི་དང་། ལྷག་པར་བོད་མིའི་སྒྲིག་འཛུགས་ངོས་ནས་རྒྱ་གར་གཞུང་མང་གཉིས་ནས་ད་བར་གང་ཅིའི་ཐད་ནས་མཐུན་འགྱུར་རོགས་མགོན་གནང་བ་དེ་དག་བཀའ་དྲིན་སྙིང་བཅངས་དང་། གོ་སྐབས་འདི་བརྒྱུད་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། བཙན་བྱོལ་བ་དང་བོད་པ་ངོས་ནས་རྒྱ་གར་གྱིས་ང་ཚོར་རོགས་སྐྱོར་གང་གནང་བ་དེའི་མཐའ་མའི་གྲུབ་འབྲས་ཆུད་ཟོས་སུ་མ་འགྲོ་བར་རྗེས་མ་ཚང་མས་མཐོང་ཐུབ་རྒྱུ་ཡོད་པ་ང་ཚོས་སྙིང་བཅངས་ཞུས་ནས་དེ་ལྟར་བྱེད་ཐུབ་པའི་རེ་བ་ཡོད། དེ་འདྲའི་ཐོག་ནས་བཀའ་དྲིན་འཇལ་ཐུབ་པའི་རེ་བ་དང་ཡིད་ཆེས་ཞུ་གི་ཡོད། ཅེས་གསུང་བཤད་གནང་གྲུབ་མཚམས་བཀའ་ཤག་གི་མཇལ་འཕྲད་ཁང་ནང་རྟེན་འབྲེལ་གསོལ་ཇ་དང་མངར་ཟས་བཤམས་ཏེ་མཛད་སྒོ་གྲོལ།
དེ་བཞིན་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༡ ཐོག་ཀངྒ་ར་རྫོང་ལས་ཁུངས་ཀྱི་གོ་སྒྲིག་འོག རྡ་སའི་ཉེན་རྟོག་ཐང་ཆེན་དུ་རྒྱ་གར་མང་གཙོའི་དུས་དྲན་མཛད་སྒོར་ཀངྒ་ར་རྫོང་ལས་ཁུངས་ཀྱིས་མགྲོན་འབོད་ལྟར་བོད་མི་མང་སྤྱི་འཐུས་ཚོགས་གཞོན་ཨ་ཅཱརྱ་ཡེ་ཤེས་ཕུན་ཚོགས་མཆོག་དང་། དཔལ་འབྱོར་བཀའ་བློན་ཀརྨ་ཡེ་ཤེས་མཆོག སྤྱི་འཐུས་རྒྱུན་ལས་ཀྱི་སྐུ་ཚབ་བློ་བཟང་ཆོས་འབྱོར་ལགས། ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་སོགས་ཆེད་ཕེབས་ཡོད།
རྒྱ་གར་གཞུང་མང་གཉིས་ལ་ཐུསག་རྗེ་ཆེ་ཞུའི་ལོ་ཐོ་ཕྱག་རྟགས་སུ་འབུལ་བཞིན་པ།
མཛད་སྒོའི་ཐོག་མར་སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་སོ་ནམ་དང་འཕྲོད་བསྟེན་བློན་ཆེན་སྐུ་ཞབས་མ་ཧེནྡྲ་སིངྒ་ཐཱ་ཀུར་ Shri Mahender Singh Thakur མཆོག་གིས་རྒྱལ་དར་སྒྲེང་འཛུགས་གནང་བསྟུན། ཉེན་རྟོག་རུ་ཁག་དང་སློབ་ཕྲུག་རྣམས་ཀྱིས་རུ་སྒྲིག་ཀྱི་ལམ་ནས་ཆེ་མཐོང་ཞུས། དེ་རྗེས་སྐུ་མགྲོན་གཙོ་བོ་མཆོག་གིས་མཛད་སྒོ་དང་འབྲེལ་བའི་གསུང་བཤད་གནང་རྗེས་རིག་གཞུང་འཁྲབ་སྟོན་གཟིགས་འབུལ་ཞུས་ཡོད་པ་བཅས། །
