ཕྱི་ལོ་ ༢༠༡༨ ཟླ་ ༡ ཚེས་ ༣༠
༄༅། །ཕྱི་ལོ་ ༢༠༡༨ ཟླ་ ༡ ཚེས་ ༣༠ ཉིན་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱི་ཚོགས་གཙོ་བསོད་ནམས་ཟླ་བ་བློན་པོ་ལགས་སྙིང་ཁྲག་འགག་པའི་རྐྱེན་གྱིས་གློ་བུར་དུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པར་བོད་མིའི་སྒྲིག་འཛུགས་བཀའ་ཤག་ནས་གདུང་སེམས་མཉམ་སྐྱེའི་ཐུགས་གསོའི་འཕྲིན་ཡིག་དམ་པ་ཁོང་གི་བཟའ་ཟླ་པི་དབང་མོ་བློན་པོ་ P Angmo Lonpo ལགས་ལ་ཕུལ་བའི་ནང་འཁོད་དོན། ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་ཚོགས་གཙོ་བསོད་ནམས་ཟླ་བ་བློན་པོ་ལགས་གློ་བུར་དུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་བྱུང་བར་ང་རང་ཧ་ཅང་བློ་ཕམ་བྱུང་། ངས་བོད་མི་སྤྱི་དང་། ལྷག་པར་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་སྙིང་ཐག་པ་ནས་སེམས་གསོ་ཞུ་རྒྱུ་ཡིན།
དམ་པ་ཁོང་ནི། བོད་མིའི་སྙིང་ཉེ་བའི་གྲོགས་པོ་ཞིག་ཡིན་པ་མ་ཟད། ལྷག་བསམ་རྣམ་དག་དང་རང་ནུས་གང་ཡོད་ཀྱིས་ལ་དྭགས་ཁུལ་དུ་གནས་སྡོད་བོད་མི་རྣམས་ཀྱི་བདེ་སྡུག་ལ་གཟིགས་རྟོག་གང་ལེགས་གནང་ཡོད་པ་མ་ཟད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་དད་གུས་གཡོ་བ་མེད་པ་ཞུ་མཁན་ཞིག་ཡིན། ཁོང་དང་ཁོང་གི་བཀའ་དྲིན་ང་ཚོ་དུས་རྟག་ཏུ་དྲན་གསོ་ཞུ་རྒྱུ་ཡིན། ཞེས་འཁོད་འདུག །
