༢༠༡༨ ཟླ་ ༡ ཚེས་ ༢༡ རེས་གཟའ་ཉི་མ།
༄༅། །ཕྱི་ལོ་ ༢༠༡༨ ཟླ་ ༠༡ ཚེས་ ༢༠ ཉིན་གྱི་ཕྱེད་ཡོལ་དཔལ་ལྡན་སྲིད་སྐྱོང་མཆོག་སུད་སི་དང་ལིག་ཏེན་སིཊཡན་བོད་ཀྱི་སྐད་ཡིག་འགྲན་བསྡུར་ཐེངས་ ༥ པའི་མཇུག་སྡོམ་ཀྱི་མཛད་སྒོར་དགེ་ལས་སློབ་ཕྲུག་དང་ཕ་མ་བཅས་ལ་གསུང་བཤད་གནང་བ་མ་ཟད་འགྲན་བསྡུར་ཁྲོད་རྩེ་ཕུད་སོན་པ་རྣམས་ལ་བྱ་དགའ་གནང་འདུག སྐབས་དེར་སྲིད་སྐྱོང་མཆོག་གིས་གསུང་བཤད་གནང་དོན་སྙིང་པོར། གཟའ་མཇུག་སློབ་གྲྭ་ཁག་གི་དགེ་རྒན་རྣམས་ནས་སོ་སོའི་སྒེར་གྱི་ལས་དོན་མང་དག་ཅིག་ཡོད་བཞིན་དུ་རང་ལས་གཞན་གཅེས་པ་དང་། མ་འོངས་བོད་མིའི་སོན་རྩ་རྣམས་གསོ་སྐྱོང་དོན་དུ་ཆེད་མངགས་དུས་ཚོད་བཏང་ནས་རང་ནུས་གང་ཡོད་ཀྱིས་བོད་ཀྱི་རིག་གཞུང་དང་སྐད་ཡིག་སློབ་ཁྲིད་གནང་བཞིན་ཡོད་པ་དེར་བཀའ་ཤག་གི་ཚབ་བྱེད་ནས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་སྦྲགས། འབྱུང་འགྱུར་ཡང་བྱ་བ་བཟང་པོ་དེ་དག་མུ་མཐུད་རྒྱུན་སྐྱོང་གནང་དགོས་རྒྱུ་ཧ་ཅང་གལ་གནད་ཅན་ཞིག་ཆགས་ཡོད་པ་གསུངས།
ཕྱོགས་མཚུངས་ཁོང་གིས་གཙོ་ཆེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་རིམ་པ་དང་། ཕྱོགས་མཚུངས་ང་ཚོ་རང་ཡུལ་མི་ལག་ཏུ་ཤོར་ནས་བཙན་བྱོལ་དུ་གྱར་ཏེ་མི་རབས་བཞི་པའི་དུས་སྐབས་ལ་སླེབས་ཡོད་སྟབས་ང་ཚོར་རྩ་དོན་རྩོད་རྒྱུའི་དགོས་དོན་གཙོ་བོ་གཉིས་ཡོད་པ་ནི། དང་པོ་དེར་མི་རིགས་ཀྱི་ངོ་བོ་སྲུང་སྐྱོབ་བྱ་རྒྱུ་དང་། གཉིས་ནས་འགྲོ་བ་མིའི་གཞི་རིམ་གྱི་ཆེ་མཐོང་རྩོད་རྒྱུ་རེད།
དེར་བརྟེན་ང་ཚོས་མི་རིགས་ཀྱི་ངོ་བོ་སྲུང་སྐྱོབ་བྱེད་པར་ཆོས་དང་རིག་གཞུང་། སྐད་ཡིག་གསུམ་དེ་གཞི་རྟེན་ཡིན་ཞིང་དེ་དག་མེད་པ་ཡིན་ན་བོད་པ་ཡིན་ཞེས་ཁ་ནས་ཇི་ཙམ་བཤད་ཆོག་ཀྱང་། དོན་དངོས་བོད་མིའི་ཐུན་མིན་ངོ་བོ་དང་ཁྱད་ཆོས་སོགས་གང་ཡང་མི་ཤེས་མཁན་ཞིག་ཆགས་པ་རེད།
གལ་སྲིད་རང་ངོས་ནས་བོད་ཀྱི་ཆོས་དང་རིག་གཞུང་། སྐད་ཡིག་གསུམ་ཡག་པོ་ཤེས་པ་ཡིན་ན་བོད་མི་ཚད་ལྡན་ཞིག་དང་མིང་དོན་མཚུངས་པའི་བོད་མི་ཞིག་ཆགས་རྒྱུ་རེད། དེར་བརྟེན་ང་ཚོ་མི་རབས་གསར་པ་རྣམས་ཀྱིས་བོད་ཀྱི་ཆོས་དང་རིག་གཞུང་། སྐད་ཡིག་ཐོག་དོ་སྣང་དང་སེམས་ཤུགས་སྐྱེད་ནས་ཤུགས་རྒྱག་དགོས། སེམས་ཤུགས་མ་ཆག་པའི་ཐོག་ནས་འབད་བརྩོན་བྱས་ན་མ་གཏོགས་ཕྱིས་སུ་མི་རིགས་གཞན་ཞིག་གི་སར་ནས་བོད་མི་ཚོས་བོད་སྐད་སྦྱང་དགོས་བྱུང་ཧ་ཅང་ངོ་ཚ་པོ་ཆགས་ངེས་རེད།
རྩ་དོན་རྩོད་པར་མི་རིགས་ཀྱི་ངོ་བོ་ངེས་པར་དུ་སྲུང་སྐྱོབ་བྱ་དགོས་པ་དང་། གལ་ཏེ་རང་མི་རིགས་ཀྱི་ངོ་བོ་སྲུང་སྐྱོབ་བྱེད་མ་ཐུབ་ཚེ་རང་བཙན་དང་རང་སྐྱོང་ཇི་འདྲ་ཞིག་ཐོབ་ཀྱང་སྐབས་དེར་རང་གི་རིག་གཞུང་དང་སྐད་ཡིག་འདི་ཡིན་ཞེས་སྟོན་རྒྱུ་མེད་པ་ཞིག་ཆགས་ན་ཧ་ཅང་ཐབས་སྐྱོ་པོ་དང་ངོ་ཚ་པོ་ཆགས་རྒྱུ་རེད། ང་ཚོའི་བོད་ཕྲུག་རྣམས་ནས་འདབ་གཤོག་གཉིས་ལྡན་ཞིག་ངེས་པར་ཆགས་ཐུབ་པ་དགོས། རྒྱལ་ཁབ་གང་འདྲ་ཞིག་ནང་དུ་རང་ཉིད་མི་ཚེ་སྐྱེལ་བཞིན་ཡོད་ཀྱང་བོད་ཀྱི་ཆོས་དང་རིག་གཞུང་། སྐད་ཡིག་རྣམས་མི་ཉམས་རྒྱུན་འཛིན་ཐོག་སོ་སོའི་གནས་ཡུལ་རྒྱལ་ཁབ་ཀྱི་ལོ་རྒྱུས་སོགས་ཀྱང་ཤེས་མཁན་ཞིག་ངེས་པར་ཆགས་ཐུབ་པ་དགོས་སྐོར་སོགས་གསུངས།།
