༢༠༡༨ ཟླ་ ༡ ཚེས་ ༡༥ རེས་གཟའ་ཟླ་བ།

༄༅། །བོད་དོན་ཐོག་ཡུན་རིང་རྒྱབ་སྐྱོར་གནང་མཁན་རྒྱ་གར་བ་སྐུ་ཞབས་ནནྡ་ཀི་ཤོར་ཏྲི་ཀ་ Dr Nand Kishore Trikha མཆོག་དེ་རིང་ཕྱི་ལོ་ ༢༠༡༨ ཟླ་ ༡ ཚེས་ ༡༥ ཉིན་སྐུ་ཚེའི་འཕེན་པ་རྫོགས་པར་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དམ་པ་ཁོང་གི་ཤུལ་ལུས་ནང་མི་ལྟོས་བཅས་ལ་གདུང་སེམས་མཉམ་སྐྱེ་ཞུས་འདུག

དེ་ཡང་དམ་པ་ཁོང་ལྡི་ལི་ཨེམ་སི་སྨན་ཁང་ AIIMS hospital དུ་འདས་གྲོངས་སུ་གྱུར་བར་བརྟེན་སྲིད་སྐྱོང་མཆོག་གིས་དམ་པ་ཁོང་སྐུ་འཚོ་བཞུགས་མེད་ཀྱང་ཁོང་གི་ལོ་མང་རིང་བོད་དོན་འཐབ་རྩོད་ལ་རྒྱབ་སྐྱོར་གནང་བ་དེ་དག་ནམ་ཡང་ཆུད་ཟོས་སུ་འགྲོ་རྒྱུ་མིན་སྐོར་གསུང་དོན། སྐུ་ཞབས་ཏྲི་ཀ་དམ་པ་ཁོང་གིས་སྐུ་ཚེ་ཧྲིལ་པོའི་རིང་འཚེ་མེད་ཞི་བ་དང་དྲང་བདེན་གྱི་ལྟ་གྲུབ་ལ་གཞི་རྩར་བཟུང་ནས་བོད་མིའི་བདེན་པའི་འཐབ་རྩོད་ལ་ཁ་ཞེ་གཉིས་མེད་ཐོག་ནས་རྒྱབ་སྐྱོར་ཤུགས་ཆེ་གནང་ཡོད།  འོན་ཀྱང་ད་ཆ་དམ་པ་ཁོང་སྐུ་འཚོ་བཞུགས་མེད་ཀྱང་ཁོང་གི་དྲང་བདེན་གྱི་མེ་ལྕེ་དེ་ང་ཚོས་མུ་མཐུད་ལག་ཏུ་བཟུང་ནས་འཐབ་རྩོད་རྒྱུན་སྐྱོང་བྱ་རྒྱུའི་ཆོད་སེམས་བརྟན་པོ་ཡོད། ཅེས་ཞུ་རྒྱུ་དང་།  ཐེངས་འདིར་ང་ཚོས་ཡིད་གདུང་དྲག་པོས་དམ་པ་ཁོང་གི་བོད་མིའི་བདེན་པའི་འཐབ་རྩོད་ཁྲོད་བཞག་གནང་བའི་བྱས་རྗེས་དེ་དག་སེམས་ནང་དྲན་བཞིན་དུ་བཀའ་དྲིན་རྗེས་དྲན་ཞུ་རྒྱུ་དང་།  ལྷག་པར་དམ་པ་ཁོང་གིས་སྐུ་ལས་སྐྱོན་པར་བརྟེན་རྒྱ་གར་མང་ཚོགས་དཀྱུས་མའི་ཁྲོད་བོད་དོན་གོ་རྟོགས་སྔར་བས་ཆེ་རུ་སོང་བ་དང་། བོད་མི་དང་བོད་དོན་ལ་རྒྱབ་སྐྱོར་སྔར་བས་ཆེ་བ་ཐོབ་ཐུབ་ཡོད། ཅེས་གསུངས།

སྤྱིར་སྐུ་ཞབས་དམ་པ་ནནྡ་ཀི་ཤོར་ཏྲི་ཀ་མཆོག་ནི་ཕྱི་ལོ་ ༢༠༠༢ ནས་ཕྱི་ལོ་ ༢༠༡༥ བར་རྒྱ་གར་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ཡིན་ཞིང་།  དམ་པ་ཁོང་སྐུ་འཚོ་བཞུགས་རིང་སྐུའི་འཕྲོད་བཞེས་དེ་ཙམ་ཡག་པོ་མེད་ཀྱང་ངལ་བ་ཁྱད་གསད་ཐོག་ནས་འབྲེལ་ཡོད་བོད་དོན་སྐོར་གྱི་ཚོགས་འདུ་ནམ་འཚོགས་སྐབས་བཅར་བཞིན་ཡོད། དཔེར་ན་སྔ་ལོའི་ཕྱི་ཟླ་ ༡༠ ནང་བཞུགས་སྒར་དུ་བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་ལྷན་ཚོགས་ཐོག་ཆེད་ཕེབས་གནང་ཡོད་པ་ལྟ་བུ་ཡིན།

དེ་ཡང་དམ་པ་ཁོང་ནི་གསར་འགོད་པ་རྙིང་པ་ཞིག་དང་རྩོམ་པ་པོ་ཞིག་ཡིན་པ་མ་ཟད།  ནབ་བྷཱ་རཌ་དུས་བབ་ཀྱི་གསར་འགོད་པ་དང་། རྒྱ་གར་གསར་འགོད་མཐུན་ཚོགས་ཀྱི་ཚོགས་གཙོའང་གནང་མྱོང་ཡོད་འདུག་པ་བཅས།།