ཕྱི་ལོ་ ༢༠༡༨ ཟླ་ ༡ ཚེས་ ༢ རེས་གཟའ་མིག་དམར།
༄༅། ། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག ཆོས་རིག་དྲུང་ཆེ་བསྟན་འཛིན་ལུང་རྟོགས་ལགས་བཅས་ནས་ཕྱི་ལོ་ ༢༠༡༧ ཟླ་ ༡༢ ཚེས་ ༣༡ ཉིན་གྱི་ཕྱི་དྲོར་ཝ་ར་ཎ་སི་གངྒ་ལྷ་མོ་ལ་ཆོ་ག་སྨོན་ལམ་གསོལ་འདེབས་ཀྱི་ Ganga Aarti ceremony མཛད་སྒོར་མཉམ་ཞུགས་གནང་ཡོད།
དེ་ཡང་ཆུ་མོ་གངྒའི་ཞབས་ཞུ་ཐེབས་རྩའི་ Ganga Seva Nidhi འགན་འཛིན་ལྷན་ཚོགས་ནས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག ཆོས་རིག་དྲུང་ཆེ་བསྟན་འཛིན་ལུང་རྟོགས་ལགས་བཅས་ལ་རྒྱལ་ཁབ་གཞན་གྱི་གནད་ཡོད་མི་སྣ་གཅིག་མཚུགས་ལྟར་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་མ་ཟད། ཆོ་གའི་མཛད་སྒོ་གྲོལ་རྗེས་དྲན་རྟེན་གྱི་ཕྱག་རྟགས་ཀྱང་ཕུལ་བར་དཔལ་ལྡན་སྲིད་སྐྱོང་མཆོག་གིས་གོ་སྒྲིག་ཚོགས་ཆུང་ལ་སྙིང་ཐག་པ་ནས་ཐུགས་རྗེ་ཆེ་ཞུས་ཡོད།
ཆོ་གའི་མཛད་སྒོ་གྲོལ་བ་དང་བསྟུན་དཔལ་ལྡན་སྲིད་སྐྱོང་མཆོག་གིས་ ANI, ABP དང་ས་གནས་ཀྱི་གསར་འགོད་པར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་གནས་མཆོག་རྡོ་རྗེ་གདན་གྱི་མཛད་རིམ་སྐོར་དང་། བོད་རྒྱ་གཉིས་ཀྱི་གནད་དོན་བཅས་ཀྱི་སྐོར་ངོ་སྤྲོད་གནང་བ་མ་ཟད། རྒྱ་གར་ཧིན་དུ་ཆོས་ལུགས་ཆོ་གའི་མཛད་སྒོར་ཕེབས་ཐུབ་པར་ཧ་ཅང་དགའ་ཚོར་ཆེན་པོ་བྱུང་ཞེས་གསུངས། དཔལ་ལྡན་སྲིད་སྐྱོང་མཆོག་གིས་གསར་འགོད་པའི་དྲིས་པར་ལན་འདེབས་གནང་དོན། ང་ཚོས་རྒྱ་གར་ནང་མང་གཙོ་དང་། གཏམ་བརྗོད་རང་དབང་། གསར་འགོད་རང་དབང་བཅས་ལོངས་སུ་སྤྱོད་བཞིན་ཡོད་པ་ལྟར། རྒྱ་ནག་ནང་དུའང་མང་གཙོ་དང་། གཏམ་བརྗོད་རང་དབང་། གསར་འགོད་བརྒྱུད་ལམ་གྱི་རང་དབང་སོགས་ཡོང་བའི་རེ་སྨོན་ཡོད་ཅེས་གསུངས།
སྤྱིར་གངྒ་ལྷ་མོ་ལ་ཆོ་ག་སྨོན་ལམ་གསོལ་འདེབས་ཀྱི་མཛད་སྒོ་འདི་ཉིད་ནི། ཧིན་དུ་ཆོས་ལུགས་པ་ཚོས་ཉིན་ལྟར་ཕྱི་དྲོ་གངྒའི་ཉེ་འགྲམ་དུ་གངྒ་ལྷ་མོར་སྨོན་ལམ་གསོལ་འདེབས་ཞུས་ཏེ་ད་བར་མི་ལོ་༢༦ ཕྱིན་ཡོད་པ་བཅས།།
