༢༠༡༨ ཟླ་ ༡ ཚེས་ ༢ རེས་གཟའ་མིག་དམར།

༄༅། །འདི་གར་ཐེ་ལྦན་དོན་གཅོད་ལས་ཁུངས་ནས་བཏང་གནས་ནང་འཁོད་དོན།   ཕྱི་ལོ་༢༠༡༧ ཟླ་ ༡༢ ཚེས་ ༣༠ རེས་གཟའ་སྤེན་པ་ཉིན་ཐེ་ཝན་བོད་རིགས་ཚོགས་པའི་གོ་སྒྲིག་འོག་ཐེ་ལྦན་དོན་ཁང་གི་ནང་ཆོས་འཛིན་ཁང་དུ་རྒྱལ་གཅེས་པ་དཀོན་པེ་ལགས་ཀྱིས་རྒྱ་གཞུང་གི་བོད་ཐོག་འཛིན་པའི་དྲག་གནོད་ཅན་གྱི་སྲིད་བྱུས་ལ་ཞི་འབོད་ཆེད་རང་ལུས་མེར་སྲེག་བཏང་སྟེ་འདས་གྲོངས་སུ་གྱུར་པར་གདུང་སེམས་མཉམ་སྐྱེའི་མཆོད་འབུལ་སྨོན་ལམ་ཚོགས་འདུག 

དེ་ཡང་ཐེ་ཝན་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་བོད་ནང་རང་དབང་དང་འགྲོ་བ་མིའི་ཐོབ་ཐང་ཆེད་རྒྱལ་གཅེས་པ་རྣམས་ཀྱིས་རང་ལུས་མེར་སྲེག་བཏང་དང་གཏོང་བཞིན་པ་རྣམས་ལ་བཙན་བྱོལ་དུ་ཡོད་པའི་བོད་རིགས་སྤུན་ཟླ་ཚོས་གདུང་སེམས་མཉམ་སྐྱེ་གཅིག་པུ་ཙམ་མིན་པར། ཁོང་རྣམ་པའི་རེ་བ་དང་མངོན་འདོད་སྒྲུབ་རྒྱུ་ཧ་ཅང་གལ་ཆེན་པོ་ཡིན་སྐོར་གསུངས། སྐབས་དེར་ཐེ་ཝན་བོད་རིགས་ཚོགས་པའི་ཚོགས་གཙོ་བཀྲ་ཤིས་ཚེ་རིང་ལགས་ཀྱིས་ས་གནས་བོད་རིགས་དང་ཐེ་ལྦན་མི་རིགས་རྣམས་མཆོད་འབུལ་སྨོན་ལམ་ཐོག་མཉམ་ཞུགས་ཀྱིས་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞེས་ཞུས་འདུག

རྒྱལ་གཅེས་པ་དཀོན་པེ་ལགས་ནི་རྔ་པ་བོད་རིགས་རང་སྐྱོང་ཁུལ་རྔ་པ་རྫོང་གཅའ་ཡུལ་ཚོའི་ཕྱུགས་ལས་གོང་མ་ནས་ཡིན་འདུག་པ་བཅས།།