ཐེ་ཝན་གཞུང་མང་གཉིས་ལ་ཐུགས་རྗེ་ཆེ་ཞུའི་ལས་འགུལ་སྤེལ་བཞིན་པ།

གསར་ལས་ཁང་གི་གསར་འགོད་པས།

༢༠༡༨-༠༡-༡༦

༢༠༡༨ ཟླ་ ༡ ཚེས་ ༡༦ རེས་གཟའ་མིག་དམར།

༄༅། ། །བོད་མིའི་སྒྲིག་འཛུགས་བཀའ་ཤག་གི་བཀའ་འབྲེལ་ལྟར་ཕྱི་ལོ་ ༢༠༡༨ ལོ་དེ་བཞིན་བོད་མི་བཙན་བྱོལ་བ་རྣམས་ཀྱིས་རང་རང་སོ་སོའི་གནས་ཡུལ་རྒྱལ་ཁབ་ཀྱི་གཞུང་མང་གཉིས་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་རྒྱུའི་ལས་རིམ་རིའུ་མིག་གཏན་ཁེལ་སྔོན་སོང་ལྟར། ཐེ་ཝན་དུ་རྟེན་གཞི་བྱས་པའི་སྐུ་ཚབ་དོན་ཁང་གིས་འགན་ཁུར་རྐང་བཞེས་ཐོག་ཡུལ་དེའི་གཞུང་མང་གཉིས་ནས་ད་བར་བོད་མི་བཙན་བྱོལ་བ་རྣམས་ལ་མཐུན་འགྱུར་རོགས་རམ་རྒྱ་ཆེ་གནང་དང་གནང་མུས་ལ་ཐུགས་རྗེ་ཆེ་ཞུ་སླད་དོན་ཁང་གི་ལམ་སྟོན་འོག་ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ International Association of Tibetan Buddhist Dharma ཀྱིས་རྒྱལ་ས་ཐེ་པེའི་གཞུང་ལམ་ཆེ་ཁག་སྟེ་ཅོང་ཤན་ Zhongshan དང་། ར་ན་ཨེ། Renai མིང་ཆུན། Mingquan ཧ་པིང་། Heping ཅོང་ཤའོ། Zhongxiao ཏུན་ཧྭ་ Dunhua བཅས་སོགས་སུ་ཐེ་ཝན་ཐུགས་རྗེ་ཆེ། “Thank You Taiwan” ཞེས་པའི་སྦྱར་ཡིག་ཆེན་པོ་དེ་འདྲ་སྦྱར་འདུག སྦྱར་ཡིག་དེ་དག་ཕྱི་ལོ་ ༢༠༡༧ ཟླ་ ༡༢ ཚེས་ ༣༡ ནས་གོང་འཁོད་གཞུང་ལམ་ཁག་དེ་དག་ཐོག་ཐུགས་རྗེ་ཆེ་ཞུའི་སྦྱར་ཡིག་ཁྱོན་ ༦༠ སྦྱར་འདུག

ལྷག་པར་ལོ་འདིར་ཐེ་ཝན་སྐུ་ཚབ་དོན་ཁང་བཙུགས་ནས་ལོ་ངོ་ ༢༠ འཁོར་བའི་དུས་དྲན་སྲུང་བརྩི་ཞུ་རྒྱུ་ཡིན་འདུག ༢༠ དུས་དྲན་དང་བོད་མི་རྣམས་བཙན་བྱོལ་དུ་གྱར་ནས་ལོ་ངོ་ ༦༠ འཁོར་བའི་དུས་དྲན་སྲུང་བརྩིའི་སྦྱར་ཡིག་སྟེང་ཀྱི་འབོད་ཚིག་གཙོ་བོ་ནི།

“ཐེ་ཝན་གཞུང་མང་གཉིས་ནས་བོད་མིའི་རང་དབང་འཐབ་རྩོད་ལ་གདུང་སེམས་མཉམ་སྐྱེས་དང་རྒྱབ་སྐྱོར་གནང་བར་ཐུགས་རྗེ་ཆེ།”

“ཐེ་ཝན་བོད་བརྒྱུད་ནང་བསྟན་རྗེས་འབྲང་པ་ཚོས་བོད་ཀྱི་ཆོས་རིག་འཛིན་སྐྱོང་གོང་སྤེལ་སླད་མཐུན་འགྱུར་རོགས་རམ་གནང་བར་ཐུགས་རྗེ་ཆེ།”

“ཐེ་ཝན་མང་གཙོའི་ལམ་ལུགས་ལ་ཐུགས་རྗེ་ཆེ།” ཞེས་པ་ཡིན་འདུག སྦྱར་ཡིག་དེ་དག་ཟླ་བ་གཅིག་གཞུང་ལམ་ཆེ་ཁག་དེ་དག་ཐོག་སྦྱར་འདུག

དེ་སྔ་ལས་གཞི་དེའི་ཆ་ཤས་སུ། “ཐེ་ཝན་ཐུགས་རྗེ་ཆེ།” ཞེས་པའི་ ༢༠༡༨ ལོའི་ལོ་ཐོ་སྤུས་ལེགས་གྲངས་ ༦༠༠༠ དོན་ཁང་ནས་པར་སྐྲུན་ཞུས་པ་ལག་དེབ་སྔོན་པོ་ཡོད་མཁན་དང་། བོད་བརྒྱུད་ནང་བསྟན་ཆོས་ཚོགས་སོགས་ལ་རིན་མེད་འགྲེམས་སྤེལ་གནང་འདུག་པ་མ་ཟད། སྐུ་ཚབ་དོན་ཁང་ཐོག་མར་འགོ་འཛུགས་གནང་བ་ནས་བཟུང་ད་བར་རྒྱབ་སྐྱོར་གནང་བར་ཐུགས་རྗེ་ཆེ་ཞུ་སླད་རིང་མིན་གངས་ལྗོངས་པར་སྐྲུན་ཁང་ནས་ཐེ་ཝན་གཞུང་མང་གཉིས་ཀྱི་རྒྱབ་སྐྱོར་དྲན་རྟེན་བརྙན་དེབ་དམིགས་བསལ་པར་སྐྲུན་ཞུ་འཆར་ཡོད་འདུག