༢༠༡༨ ཟླ་ ༡ ཚེས་ ༡༨ རེས་གཟའ་ཕུར་བུ།
སྐུ་པར། དགའ་ལྡན་ཕོ་བྲང་།
༄༅། །ཕྱི་ལོ་ ༢༠༡༨ ཟླ་ ༡ ཚེས་ ༡༧ ཉིན་གྱི་སྔ་དྲོ་ཆུ་ཚོད་ ༩།༣༠ ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གནས་མཆོག་རྡོ་རྗེ་གདན་དུ་རྣམ་རྒྱལ་ཕན་བདེ་ལེགས་བཤད་གླིང་གྲྭ་ཚང་གིས་གོ་སྒྲིག་ཞུས་པའི་༸རྒྱལ་དབང་སྐུ་ཕྲེང་རིམ་བྱོན་གྱི་བཀའ་དྲིན་རྗེས་དྲན་མཆོད་འབུལ་སྨོན་ལམ་དུ་དབུ་བཞུགས་མཛད།
དེ་ཡང་མགོན་པོ་མཆོག་བྱང་ཆུབ་མཆོད་རྟེན་གྱི་རྒྱལ་སྒོའི་འགྲམ་དུ་༸ཞབས་སོར་འཁོད་མཚམས་རྣམ་གྲྭ་མཁན་རིན་པོ་ཆེ་མཆོག་དང་། ཀ་ཐོག་དགེ་རྩེ་རིན་པོ་ཆེ། གཞན་ཡང་མཁན་བླ་སྤྲུལ་ཁག་གཅིག་གིས་ཕེབས་བསུ་དང་བཅས་ཐོག་མར་མཆོད་རྟེན་ཆེན་པོའི་རྟེན་གཙོར་བཞུགས་པའི་ཐུབ་དབང་སྐུ་བརྙན་ལ་མཆོད་མཇལ་ཞུས་རྗེས་བཞུགས་ཁྲིར་༸ཞབས་སོར་འཁོད་པ་དང་མཎྜལ་རྟེན་གསུམ་འདེགས་འབུལ་ཞུས་རྗེས་༸རྒྱལ་དབང་སྐུ་ཕྲེང་རིམ་བྱོན་གྱི་རྣམ་ཐར་སྙིང་བསྡུས་གསེར་གྱི་ཕྲེང་བ་ཞེས་པ་དབུ་འབྱེད་བཀའ་དྲིན་བསྐྱངས།
སྐུ་པར། དགའ་ལྡན་ཕོ་བྲང་།
དེ་རྗེས་སྨོན་ལམ་གསུངས་འདོན་དབུ་འཛུགས་ཀྱིས་ཆུ་ཚོད་ ༡༡ མ་ཟིན་ཙམ་ལ་བཀའ་དྲིན་རྗེས་དྲན་གྱི་འཆོད་འབུལ་གནང་སྒོ་ཁག་མཇུག་ལེགས་པར་གྲུབ་སྟེ་བཞུགས་གནས་དགའ་ལྡན་འཕེལ་རྒྱས་གླིང་དུ་ཆིབས་ཞལ་བསྒྱུར་ཡོད།
གཟིམ་ཆུང་དུ་༸ཞབས་སོར་འཁོད་མཚམས་ཝི་ཏི་ནམ་ Vietnam ཆེད་ལས་མི་སྣ་གྲངས་ ༡༧༠ ལ་མཇལ་ཁ་དང་བཀའ་སློབ་སྩལ་དོན། ཁྱེད་ཚོའི་ཆེད་ལས་པའི་ལས་དོན་ཇི་འདྲ་ཞིག་གཉེར་མིན་ལ་མ་ལྟོས་པར་གཞན་ལ་ཕན་པ་དང་གནོད་པ་ཟེར་བ་གཙོ་བོ་ཀུན་སློང་ལ་རག་ལུས་ཡོད། གལ་ཏེ་དགེ་རྒན་ཞིག་ཡིན་ནའང་། རང་ཉིད་ཁོ་ན་བསམ་ནས་སྡོད་མཁན་མི་ཞིག་ཡིན་ན། ཕྱིའི་སྣང་ཚུལ་ལ་དགེ་རྒན་ཞེས་ཀུན་གྱིས་བཀུར་བ་འོས་ཀྱང་དོན་དངོས་ཀྱི་གནས་སྟངས་མི་འདྲ་བ་ཞིག་ཆགས་རྒྱུ་རེད།
ངོས་ཀྱི་བརྗོད་པ་ལྟར་གཙོ་བོ་ཀུན་སློང་ལ་རག་ལུས་ཡོད། སྟོན་པ་བཅོམ་ལྡན་འདས་ཀྱིས་དུས་རྟག་ཏུ་ང་ཚོར་སེམས་རྒྱུད་དུལ་བ་ཞིག་དགོས་པ་བཀའ་གནང་ཡོད། དེར་བརྟེན་རྒྱུད་མ་དུལ་བ་བྱེད་མཁན་རྣམ་རྟོག་རིགས་ལ་དཔྱད་པ་བྱེད་དགོས།ཞེ་སྡང་དང་ང་རྒྱལ། ཕྲག་དོག་སོགས་ཉོན་མོངས་པའི་བློ་དེ་དག་སེམས་ཀྱི་ཞི་བདེ་དཀྲུག་མཁན་ཡིན་སྟབས་རང་ལ་ཧ་ཅང་གནོད་རྒྱུ་རེད། དེང་སྐབས་སྨན་གྱི་ཚན་རིག་པ་ཚོས་ཀྱང་ཉམས་ཞིབ་ཐོག་ནས་ག་དུས་ཡིན་ནའང་ཁོང་ཁྲོ་དང་འཇིགས་སྣང་འོག་སྡོད་མཁན་མི་དེའི་ལུས་པོའི་ཟུངས་ཤུགས་ཉམས་གུད་འགྲོ་རྒྱུ་ཡིན་པ་བཤད་ཡོད།
ཁོང་ཁྲོའི་བློ་ཞི་ཆེད་བཟོད་པའི་ཉམས་ལེན་དགོས། གཙོ་བོ་གཞན་ལ་བྱམས་བརྩེའི་བསམ་བློ་དགོས་རྒྱུ་ཧ་ཅང་གལ་ཆེན་པོ་རེད། ལྷག་པར་འགྲོ་བ་མི་རིགས་གཅིག་གྱུར་གྱི་འདུ་ཤེས་འཛིན་དགོས་པ་ཧ་ཅང་གལ་ཆེན་པོ་རེད།
ངོས་རང་ཉིད་འཛམ་གླིང་མི་འབོར་ཐེར་འབུམ་བདུན་ཡོད་པ་རྣམས་དང་མཚུངས་པར་འགྲོ་བ་མི་ཞིག་ཡིན་བསམ་པ་ལས་དམིགས་བསལ་བ་ཞིག་ཡིན་ནམ་ཡང་དྲན་གྱི་མེད་སྟབས་ངོས་རང་མི་སུ་དང་ཐུག་ཀྱང་རིགས་རུས་དང་རྒྱལ་ཁབ། དབུལ་ཕྱུག་སོགས་ཀྱི་ཁྱད་པར་གང་ཡང་མེད་པར་མི་གཅིག་གྱུར་ཞིག་དང་ཐུག་པའི་ཚོར་བ་སྐྱེ་བཞིན་འདུག ནང་པ་ཚོས་སྐྱེ་བ་སྔ་ཕྱི་འདོད་ཀྱི་ཡོད། དེར་བརྟེན་ཚེ་ཕྱི་མ་ཡག་པོ་ཞིག་ཡོང་བར་ཚེ་འདིར་ལས་བཟང་པོ་བསག་དགོས། དེར་བརྟེན་གཞན་ལ་ཕན་པ་ལས་གནོད་འཚེ་བྱ་མི་རུང་། ཞེས་སོགས་ཀྱི་བཀའ་སློབ་སྩལ།།
