ཕྱི་ལོ་ ༢༠༡༨ ཟླ་ ༡ ཚེས་ ༣༠ རེས་གཟའ་མིག་དམར།
༄༅། །ཕྱི་ལོ་ ༢༠༡༨ ཟླ་ ༡ ཚེས་ ༢༦ ཉིན་རྒྱ་གར་མང་གཙོའི་དུས་ཆེན་ཉིན་རྒྱ་གར་རྒྱལ་ཁབ་ཀྱི་ཆེས་མཐོའི་གཟེངས་རྟགས་རིམ་པ་ཁག་གཅིག་གསལ་བསྒྲགས་གནང་བའི་ཁྲོད། རྒྱ་གར་བྱང་ཕྱོགས་ཧི་མཱ་ཅལ་མངའ་སྡེའི་ཁོངས་ནས་༧སྐུའི་བླ་སྨན་པ་ཟུར་པ་ཡེ་ཤེས་དོན་ལྡན་ལགས་ལ་པདྨ་ཤྲཱི་ཞེས་པའི་གཟེངས་རྟགས་གནང་རྒྱུའི་ཐག་གཅོད་བྱུང་བར་བོད་མིའི་སྒྲིག་འཛུགས་ཀྱི་དཔལ་ལྡན་བཀའ་ཤག་ནས་དགའ་བསུའི་འཚམས་འདྲི་གནང་བའི་ནང་འཁོད་དོན། ལྷ་རྗེ་ཆེན་པོ་གང་ཉིད་ནས་བོད་ཀྱི་ཁྱད་ནོར་དཔལ་ལྡན་གསོ་བ་རིག་པའི་བསྟན་པ་འཛམ་གླིང་ཡུལ་གྲུ་མང་པོར་ངོ་སྤྲོད་དང་དར་སྤེལ་གནད་སྨིན་མཛད་པ་དང་། ད་བར་རྒྱ་གར་ཡུལ་མི་གཙོས་ཕྱི་ནང་མི་རིགས་གྲངས་ལས་འདས་པར་སྨན་བཅོས་དང་། ཁྱད་པར་ཤིན་ཏུ་བཅོས་དཀའ་བའི་ནད་རིགས་ཀྱིས་མནར་བའི་སྐྱེ་བོ་རྒན་གཞོན་ཕོ་མོ་ཁྲི་ཕྲག་བརྒལ་བར་སྲོག་སྐྱོབ་ཕན་གྲོགས་བླ་ན་མེད་པ་གནང་དང་གནང་བཞིན་པའི་མཛད་རྗེས་ལ་ངོས་འཛིན་དང་གཟེངས་བསྟོད་གནང་སླད། ཉེ་ཆར་ཕྱི་ལོ་ ༢༠༡༨ ཟླ་ ༡ ཚེས་ ༢༦ རྒྱ་གར་མང་གཙོའི་དུས་ཆེན་ཉིན་རྒྱ་གར་རྒྱལ་ཁབ་ཀྱི་ཆེས་མཐོའི་གཟེངས་རྟགས་རིམ་པ་ཁག་གཅིག་གསལ་བསྒྲགས་གནང་བའི་ཁྲོད་དུ། རྒྱ་གར་ཧི་མཱ་ཅལ་མངའ་སྡེའི་ཁོངས་ནས་སྐུ་ཉིད་ལ་པདྨ་ཤྲཱི་ཞེས་པའི་གཟེངས་རྟགས་གནང་རྒྱུའི་ཐག་གཅོད་བྱུང་འདུག་པར། དཔལ་ལྡན་སྲིད་སྐྱོང་མཆོག་གིས་གསར་འགྱུར་བརྒྱུད་ལམ་ཐོག་ནས་དགའ་བསུའི་འཚམས་འདྲི་གནང་ཟིན་ཡོད་པ་བཞིན། བོད་མིའི་སྒྲིག་འཛུགས་བཀའ་ཤག་གི་ངོས་ནས་དགའ་སེམས་རབ་ཏུ་འཁོལ་བའི་ངང་ནས་སླར་ཡང་དགའ་བསུ་དང་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ལྷ་རྗེ་ཆེན་པོ་གང་ཉིད་ཀྱི་མཛད་རྗེས་ལ་བརྟེན་ནས་བོད་ཀྱི་རིག་གཞུང་དང་མི་རིགས་གཉིས་ཀ་རྒྱ་གར་དང་རྒྱལ་སྤྱིའི་མདུན་སར་སྤོབས་པ་བྱེད་ཆོག་པ་གྱུར་ཡོད་ན། གང་ཉིད་སྐུ་ཚེ་ཡུན་དུ་བརྟན་ཅིང་ཐུགས་བཞེད་མཐའ་དག་གེགས་མེད་ལྷུན་གྱིས་འགྲུབ་པའི་སྨོན་འདུན་ཞུ་རྒྱུ་བཅས་ཡིན། བཀའ་ཤག་གིས་ཕྱི་ལོ་ ༢༠༡༨ ཟླ་ ༡ ཚེས་ ༣༠ ལ་ཕུལ།།
