༢༠༡༧ ཟླ་ ༡༢ ཚེས་ ༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༧ ཟླ་ ༡༢ ཚེས་ ༦ ཉིན་རྒྱབ་ཆུ་ཚོད་ ༢ ཐོག་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཨེ་ཤི་ཡ་དང་ཞི་བདེ་རྒྱ་མཚོའི་ལས་ཁུངས་ཀྱིས་གོ་སྒྲིག་འོག་ཝ་ཤིང་ཊོན་ཌི་སི་ Washington DC རུ་རྟེན་གཞི་བྱས་པའི་གྲོས་ཚོགས་ཀྱི་ཚོགས་ཁང་ཨང་ ༢༡༧༢ ནང་དུ་བོད་དོན་ཉན་ཞིབ་གནང་འདུག
སྐབས་དེར་སྤྱི་མཐུན་ཚོགས་པའི་ Republic གྲོས་ཚོགས་འཐུས་མི་སྐུ་ཞབས་ཊེཌ་ཡོ་ཧོ་ Ted Yoho མཆོག་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་རི་ཆཌ་སྒེར་ Richard Gere མཆོག ཨེ་ཤི་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་འགན་འཛིན་བཀའ་ཟུར་བཀྲས་མཐོང་བསྟན་འཛིན་རྣམ་རྒྱལ་མཆོག ཨ་རིའི་མང་གཙོ་གོང་སྤེལ་བསྟི་གནས་ཁང་ NED གི་འགན་འཛིན་ Carl Gershman ལགས་བཅས་ལྷན་འཛོམས་གནང་འདུག
དེ་ཡང་ཉན་ཞིབ་སྐབས་དེར་མང་གཙོ་ཚོགས་པའི་ Democrats གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ Jim McGovern མཆོག་དང་སྤྱི་མཐུན་ཚོགས་པའི་གྲོགས་འཐུས་མི་ Republic ལྕམ་སྐུ་རོ་སི་ལེ་ཊི་ནེན་ Ileana Ros-Lehtinen མཆོག མང་གཙོ་ཚོགས་པའི་ Democrats གྲོས་ཚོགས་འཐུས་མི་སྐུ་ཞབས་བྷ་རཌ་ཤར་མན་ Brad Sherman མཆོག་བཅས་ཀྱིས་བོད་དོན་རྒྱབ་སྐྱོར་གྱི་གསུང་བཤད་གནང་འདུག
ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་རི་ཆཌ་སྒེར་ Richard Gere མཆོག་གིས་ཉེ་ཆར་བོད་ནང་རང་ལུས་མེར་སྲེག་གནང་མཁན་དགེ་འདུན་པ་བསྟན་དགའ་ལགས་ཀྱི་སྐུ་པར་བསྟན་པ་བརྒྱུད་ད་བར་བོད་ནང་རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་མུ་མཐུད་ལག་བསྟར་བྱས་ནས་བོད་མིའི་གཞི་རྩའི་འགྲོ་བ་མིའི་ཐོབ་ཐང་དང་ཆོས་དད་རང་དབང་། བོད་ཀྱི་ཁོར་ཡུག་སོགས་ལ་ཡ་ང་སྙིང་རྗེ་སྤུ་ཙམ་མེད་པར་གདུག་རྩུབ་ཆེན་པོས་རྩིས་མེད་རྡོག་རོལ་བཏང་དང་གཏོང་བཞིན་པར་བརྟེན། བོད་མི་རྣམས་ཀྱིས་བཟོད་ཐབས་བྲལ་ཏེ་ཕྱི་ལོ་ ༢༠༠༩ ནས་བོད་མི་སྐྱ་སེར་དང་ཕོ་མོ། རྒན་བྱིས་སོགས་དབྱེ་བ་མེད་པར་གཅིག་རྗེས་གཉིས་མཐུད་ཀྱིས་རང་སྲེག་ལས་འགུལ་སྤེལ་དང་སྤེལ་མུས་ཡིན་པའི་ཛ་དྲག་གནས་སྟངས་ཆགས་ཡོད་སྐོར་དང་།
ཉེ་ལམ་ཨ་རིའི་སྲིད་འཛིན་སྐུ་ཞབས་ཌོ་ནལ་ཊམ་མཆོག་རྒྱ་ནག་ནང་རྒྱལ་དོན་འཚམས་གཟིགས་ཐེངས་དང་པོར་ཕེབས་སྐབས་འགྲོ་བ་མིའི་ཐོབ་ཐང་སྐོར་གླེང་སློང་གནང་ཡོད་ཚུལ་བརྗོད་བཞིན་ཡོད་ཀྱང་། དོན་དམ་ཡིག་ཐོག་ནས་གང་ཡང་གསལ་ཁ་ལ་མེད་སྐོར་སོགས་གསུངས།
དེ་བཞིན་ཁོང་གིས་ཨ་རིའི་གྲོས་ཚོགས་ནང་དེ་སྔ་ཕྱི་ལོ་ ༢༠༠༢ ལོར། བོད་དོན་རྒྱབ་སྐྱོར་གྱི་སྲིད་བྱུས་ཕྱི་ལོ་ ༢༠༠༢ Tibet Policy Act 2002 ཞེས་པ་གཏན་འབེབས་གནང་བར་བརྟེན་སྲིད་གཞུང་ནས་ཀྱང་ངེས་པར་དུ་སྲིད་བྱུས་དེ་དག་ལག་བསྟར་དོན་འཁྱོལ་ཡོང་ཐབས་གནང་དགོས་པ་གསུངས།
དེ་བཞིན་གྲོས་ཚོགས་འཐུས་མི་སྐུ་ཞབས་ Brad Sherman ལགས་ཀྱིས་རྒྱ་ནག་གཞུང་ནས་བོད་མིའི་མངོན་འདོད་ལྟར་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་སྤྲོད་ཐབས་བྱེད་དགོས་ཀྱང་། དེ་ལས་ལྡོག་སྟེ་མུ་མཐུད་བོད་ཀྱི་ས་ཁུལ་ཁག་ཏུ་དམ་བསྒྲགས་ཤུགས་ཆེ་རུ་བཏང་སྟེ་དམག་དཔུང་ཇེ་མང་དུ་གཏོང་བཞིན་པ་དང་། བོད་མིའི་ཆོས་དད་རང་དབང་ལ་བརྩི་མེད་རྡོག་རོལ་གཏོང་བཞིན་ཡོད་པ་སོགས་བཟང་སྤྱོད་ལས་ཡོངས་སུ་འགལ་བའི་སྲིད་བྱུས་ལ་སྐྱོན་བརྗོད་ཤུགས་ཆེ་གནང་འདུག
གཞན་ཡང་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ Jim McGovern མཆོག་གིས་ད་ཐེངས་ཨ་རིའི་གྲོས་ཚོགས་གོང་འོག་གཉིས་ཀྱི་འཐུས་མི་ཐུན་མོང་ཐོག་བོད་དོན་ལ་རྒྱབ་སྐྱོར་ཞུ་སླད་བོད་དོན་ཉན་ཞིབ་ཀྱི་ལས་རིམ་ཞིག་སྐོང་ཚོགས་གནང་ཐུབ་པ་དེ་བཟང་ཕྱོགས་ཀྱི་རྣམ་པ་ཞིག་ཡིན་ཡང་། འདས་པའི་ལས་དོན་དང་ལྷག་བོད་ནང་གི་བོད་མིའི་འགྲོ་བ་མིའི་ཐོབ་ཐང་གྱི་གནས་སྟངས་ལ་གཞིགས་ཚེ་ཨ་རིའི་གྲོས་ཚོགས་དང་སྲིད་གཞུང་གཉིས་ནས་བོད་དོན་ཐོག་དེ་ཙམ་བཟང་ཕྱོགས་ཀྱི་ཤུགས་རྐྱེན་ཐེབས་ཐུབ་པའི་རྒྱབ་སྐྱོར་གནང་མེད་སྐོར་དང་།
ལྷག་པར་༸གོང་ས་ཏཱ་ལའི་བླ་མ་མཆོག་ད་ཆ་དགུང་གྲངས་ ༨༠ ལྷག་བཞེས་པ་དང་། རྒྱ་ནག་གཞུང་གི་དྲག་པོའི་སྲིད་བྱུས་འོག་བོད་ནང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པའི་དུས་སྐབས་འདིར་ཨ་རིའི་གྲོས་ཚོགས་དང་སྲིད་གཞུང་གཉིས་ནས་བོད་དོན་ཐོག་ཁ་ཞེ་གཉིས་མེད་ཐོག་ནས་རྒྱབ་སྐྱོར་གནང་རྒྱུའི་དུས་ལ་བབ་ཡོད་སྐོར་གསུངས།།
