༢༠༡༧ ཟླ་ ༡༢ ཚེས་ ༧ རེས་གཟའ་ཕུར་བུ།

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཕྱི་ལོ་ ༢༠༡༧ ཟླ་ ༡༢ ཚེས་ ༦ ཉིན་ཨ་རི་ལྦ་ཤིན་ཊོན་ཌི་སིའི་ Dulles གནམ་ཐང་དུ་ཕེབས་འབྱོར་སྐབས་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་གིས་གཙོས་ལས་བྱེད་རྣམ་པ་དང་། བོད་རིགས་ཚོགས་པ་དང་རྒྱལ་སྤྱི་བོད་དོན་ལས་འགུལ་ཁང་གི་སྐུ་ཚབ་རྣམས་ནས་ཕེབས་བསུའི་སྣེ་ལེན་ཟབ་རྒྱས་ཞུས་ཡོད།

དེ་ཡང་དཔལ་ལྡན་སྲིད་སྐྱོང་མཆོག་གིས་ཀེ་པི་ཊོལ་ཧིལ་ Capitol Hill དུ་རྒྱལ་སྤྱི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་རི་ཆཌ་སྒེར་ Richard Gere ལགས་དང་།  ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག  རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་མེ་ཐིའུ་མེ་ཁ་ཆི་ Matteo Mecacci  མཆོག་བཅས་དང་ལྷན་གྲོས་ཚོགས་གོང་མིའི་འཐུས་མི་སྐུ་ཞབས་མར་ཁོ་རུ་བྷིའོ་ Marco Rubio མཆོག་དང་། ལིན་སེ་གྷྲ་ཧམ་ Lindsey Graham མཆོག་རྣམ་གཉིས་དང་མཇལ་འཕྲད་གནང་སྟེ་བོད་དོན་དང་འབྲེལ་བའི་གནད་དོན་ཁག་སྤྱི་དང་། ཡང་སྒོས་ཨ་རིའི་གཞུང་གི་འཆར་ལོའི་སྔོན་རྩིས་ནང་བོད་དོན་དང་འབྲེལ་བའི་རོགས་དངུལ་མུ་མཐུད་ཐོབ་ཐབས་དང་།  

ཨ་རིའི་བོད་དོན་དམིགས་བསལ་འབྲེལ་མཐུད་པ་མགྱོགས་མྱུར་བསྐོ་གཞག་ཡོང་སྐོར། དེ་བཞིན་ཨར་རྒྱ་ཡུལ་གཉིས་དབར་ཕན་ཚུན་འདྲ་མཉམ་ཐོག་གོ་སྐབས་བརྗེ་ལེན་ Reciprocal Access to Tibet བྱ་རྒྱུའི་ཆ་རྐྱེན་མུ་མཐུད་རྒྱ་ནག་གཞུང་ལ་གདོན་དགོས་པ།  རྒྱལ་སྤྱིའི་ཐོག་རྒྱ་ནག་གི་ཤུགས་རྐྱེན་ཇེ་ཆེར་འགྲོ་བཞིན་ཡོད་པ་བཅས་ཀྱི་སྐོར་གོ་བསྡུར་གནང་འདུག   སྐབས་དེར་གྲོས་ཚོགས་འཐུས་མི་རྣམ་གཉིས་ཀྱིས་རྒྱབ་སྐྱོར་ཤུགས་ཆེ་དང་འབྲེལ་ལམ་སྟོན་གནང་ཡང་གནང་འདུག

སྤྱིར་དཔལ་ལྡན་སྲིད་སྐྱོང་མཆོག་ཕྱི་ཚེས་ ༦ ནས་ ༨ བར་ཉིན་གྲངས་གསུམ་རིང་རྒྱལ་ས་ལྦ་ཤིན་ཊོན་ཌི་སི་ཁུལ་གྱི་གཞུང་གི་དཔོན་རིགས་སོགས་གནད་ཡོད་མི་སྣ་ཁག་དང་མཇལ་འཕྲད་མུ་མཐུད་གནང་ནས་བོད་དོན་ཞུ་གཏུག་གི་ལས་དོན་རྣམས་ཡོངས་སུ་ལེགས་ཟིན་མཚམས་ཕྱི་ཚེས་ ༨ ཉིན་ནིའུ་ཡོག་ཏུ་ཕེབས་ཐོན་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ཧྲིལ་པོ་ ༢༨ འཁོར་བའི་དུས་དྲན་མཛད་སྒོ་དང་། བོད་དོན་གདུང་སེམས་མཉམ་སྐྱེའི་གཞི་རྒྱ་ཆེ་བའི་ལས་འགུལ་ཐོག་མཉམ་ཞུགས་ཀྱིས་གསུང་བཤད་གནང་རྒྱུ་ཡིན་འདུག་པ་བཅས།།