༢༠༡༧ ཟླ་ ༡༢ ཚེས་ ༨ རེས་གཟའ་པ་སངས།

༄༅། །ཕྱི་ལོ་ ༢༠༡༧ ཟླ་ ༡༢ ཚེས་ ༦ ཉིན་ནས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་ཨ་རིའི་རྒྱལ་ས་ཝ་ཤིང་ཊོན་དུ་ཨ་རིའི་གྲོས་ཚོགས་གོང་འོག་གཉིས་ཀྱི་འཐུས་མི་གཙོ་བོར་གྱུར་པའི་ཆེས་མཐོའི་དཔོན་རིགས་སོགས་གནད་ཡོད་མི་སྣ་ཁག་གཅིག་དང་མཇལ་འཕྲད་ཀྱིས་བོད་དོན་ཞུ་གཏུག་གི་ལས་འགུལ་སྤེལ་དང་སྤེལ་མུས་ཡིན་འདུག  དེ་ཡང་ཕྱི་ཚེས་ ༧ ཉིན་དཔལ་ལྡན་སྲིད་སྐྱོང་མཆོག་དང་ཨ་རིའི་སྐུ་ཚབ་དོན་གཅོད་རྣམ་གཉིས་ནས་ཨ་རིའི་སྲིད་འཛིན་སྐུ་ཞབས་ཌོ་ནལཌ་ཊམ་མཆོག་དང་ཧ་ཅང་ཉེ་བའི་གྲོས་ཚོགས་འཐུས་མི་ཊོམ་ཁོ་ཊོན་ Tom Cotton མཆོག་མཇལ་འཕྲད་གནང་ཡོད།

དེ་བཞིན་དཔལ་ལྡན་སྲིད་སྐྱོང་མཆོག་གིས་ལིན་སེ་གྷྲ་ཧམ་ Lindsey Graham མཆོག་དང་མཇལ་འཕྲད་གནང་ཡོད། ཕྱོགས་མཚུངས་སྐུ་ཚབ་དོན་གཅོད་དངོས་གྲུབ་ཚེ་རིང་མཆོག་ནས་ལྕམ་སྐུ་ནི་ཏ་ལོ་ཝེ་ Nita Lowey མཆོག་དང་མཇལ་འཕྲད་གནང་འདུག  ཐེངས་འདིར་དཔལ་ལྡན་སྲིད་སྐྱོང་མཆོག་གིས་ཨ་རིའི་གྲོས་ཚོགས་འཐུས་མི་མཇལ་འཕྲད་གནང་བའི་ཁྲོད་སྐུ་ཞབས་མར་ཁོ་རུ་བྷིའོ་ Marco Rubio མཆོག་དང་།    ཇེམ་མེགྷ་གོ་ཝན་ James McGovern མཆོག་བཅས་ཡོད་འདུག   ཁོང་རྣམས་དང་མཇལ་འཕྲད་གནང་སྐབས་གཉིས་སྨན་དབུ་མའི་ལམ་གྱི་སྲིད་བྱུས་འོག་བོད་ཀྱི་གནད་དོན་དེ་འཚེ་མེད་ཞི་བ་གྲོས་མོལ་གྱི་ལམ་ནས་སེལ་ཐབས་བྱེད་བཞིན་ཡོད་སྐོར་དང་།

ཨ་རིའི་བོད་དོན་དམིགས་བསལ་འབྲེལ་མཐུད་པ་མགྱོགས་མྱུར་བསྐོ་གཞག་ཡོང་སྐོར་ཞུས་གནང་འདུག་པ་མ་ཟད།  སྐུ་ཚབ་དོན་གཅོད་མཆོག་ནས་ཨ་རིའི་རོགས་དངུལ་ཐེབས་རྩ་ USAID དང་ PRM རོགས་ཚོགས་གཉིས་ཀྱི་ལས་བྱེད་རྒན་གྲས་ཁག་གཅིག་དང་མཇལ་འཕྲད་གནང་སྟེ་ཨ་རི་གཞུང་ནས་དཔལ་འབྱོར་རོགས་རམ་མུ་མཐུད་ཡོང་བའི་འབོད་སྐུལ་ཡང་ཞུས་གནང་འདུག   དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གིས་དཔལ་ལྡན་སྲིད་སྐྱོང་མཆོག་དང་སྐུ་ཚབ་དོན་གཅོད་རྣམ་གཉིས་ལ་དགོང་གྲོའི་གསོལ་སྟོན་ཕུལ་འདུག་པ་བཅས།།