༢༠༡༧ ཟླ་ ༡༢ ཚེས་ ༡༤ རེས་གཟའ་ཕུར་བུ།
སྐུ་ཞབས་ཇིམ་མེག་གྷོ་ཝན་ Jim McGovern མཆོག
༄༅། །བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་བྱང་ཨ་རིའི་རྒྱལ་ས་ཝ་ཤིང་ཊོན་དུ་ཕེབས་འབྱོར་རྗེས་ཐོག་མར་ཨ་རིའི་བོད་སྐད་རླུང་འཕྲིན་ཁང་གི་ཀུན་གླེང་ལས་རིམ་གྱི་གསར་འགོད་པའི་དྲི་བར་ལན་འདེབས་གནང་འདུག
ཕྱེད་ཡོལ་དུ་ཚོགས་གཙོ་མཆོག་དང་སྐུ་ཚབ་དོན་གཅོད་ཀྱིས་ཨ་རིའི་གྲོས་ཚོགས་ཀྱི་སྤྱི་མཐུན་ཚོགས་པའི་འཐུས་མི་དང་། ཨེ་ཤི་ཡ་དང་ཞི་བདེ་རྒྱ་མཚོའི་མངའ་ཁུལ་གྱི་ཕྱི་འབྲེལ་ལས་དོན་ཚན་པའི་འགན་འཛིན་སྐུ་ཞབས་ཊེཌ་ཡོ་ཧོ་ Ted Yoho མཆོག་དང་།
གྲོས་ཚོགས་ཀྱི་ཊོམ་ལེན་ཊོ་སི་འགྲོ་བ་མིའི་ཐོབ་ཐང་རྟོག་ཞིབ་ཚན་པའི་ Tom Lantos Human Rights Commission ཚོགས་གཞོན་མང་གཙོ་ཚོགས་པའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ Jim McGovern མཆོག་མཇལ་འཕྲད་གནང་འདུག སྐབས་དེར་ཚོགས་གཙོ་མཆོག་ནས་ཁོང་རྣམས་ཀྱིས་ད་བར་བོད་མི་དང་བོད་དོན་ལ་རྒྱབ་སྐྱོར་ཤུགས་ཆེ་གནང་དང་གནང་བཞིན་པར་ཐུགས་རྗེ་ཆེ་གསུངས་པ་མ་ཟད། འབྱུང་འགྱུར་མུ་མཐུད་བོད་དོན་བདེན་མཐའ་མ་གསལ་བར་རྒྱབ་སྐྱོར་གནང་རོགས་ཞེས་འབོད་སྐུལ་ཡང་ཞུས་འདུག
སྐུ་ཞབས་ཊེཌ་ཡོ་ཧོ་ Ted Yoho མཆོག
དེ་ཡང་སྤྱི་འཐུས་ཚོགས་གཙོ་མཆོག་དང་སྐུ་ཚབ་དོན་གཅོད་རྣམ་གཉིས་ཀྱིས་ཟླ་འདིའི་ནང་མཇལ་འཕྲད་ཞུས་པའི་ཨ་རིའི་གྲོས་ཚོགས་ཀྱི་འཐུས་མི་གཙོ་བོར་གྱུར་བའི་གཞུང་འབྲེལ་དང་གཞུང་འབྲེལ་མིན་པའི་གནད་ཡོད་མི་སྣ་ཚང་མས་བོད་དོན་དང་བོད་མིར་སེམས་ཐག་ཉེས་པོས་རྒྱབ་སྐྱོར་གནང་འདུག་པ་མ་ཟད། རྒྱ་ནག་གཞུང་གིས་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་ལག་བསྟར་བྱེད་བཞིན་པ་དེར་མཐའ་གཅིག་ཏུ་ངོ་རྒོལ་ཡོད་པའི་རྣམ་པ་ཤུགས་ཆེ་སྟོན་པ་དང་སྦྲགས། གོ་སྐབས་ནམ་བྱུང་སྐབས་སྔར་རྒྱུན་བཞིན་བོད་དོན་གླེང་སློང་གནང་རྒྱུའི་ཁས་ལེན་ཡང་གནང་འདུག
ཕྱོགས་མཚུངས་གྲོས་ཚོགས་ཀྱི་མང་གཙོ་ཚོགས་པའི་འཐུས་མི་སྐུ་ཞབས་ཇིམ་མེག་གྷོ་ཝན་ Jim McGovern མཆོག་ལ་མཚོན་ན་ཚོགས་གཙོ་མཆོག་དང་སྐུ་ཚབ་དོན་གཅོད་རྣམ་གཉིས་དང་མཇལ་འཕྲད་སྐབས། སྤྱིར་གྲོས་ཚོགས་ནང་གནད་དོན་གཞན་ཐོག་གླེང་སློང་གནང་སྐབས་བསམ་ཚུལ་མི་མཐུན་པ་ཡོང་བཞིན་ཡོད་ཀྱང་བོད་དོན་ཐོག་མང་གཙོ་དང་སྤྱི་མཐུན་ཚོགས་པ་གཉིས་ཀ་ཞལ་གཅིག་བསྒྲགས་ཐོག་ནས་རྒྱབ་སྐྱོར་གནང་བཞིན་ཡོད་སྐོར་གསུངས། ཁོང་གིས་ཁས་ལེན་གནང་བ་ལྟར་ཕྱི་ཉིན་དེར་གྲོས་ཚོགས་ནང་བོད་དོན་སྐོར་གླེང་སློང་གནང་འདུག
སྤྱི་འཐུས་ཚོགས་གཙོ་མཆོག་ཝ་ཤིང་ཊོན་ནང་གཞུང་འབྲེལ་ལས་དོན་ཡོངས་སུ་ལེགས་གྲུབ་རྗེས་གྲོང་ཁྱེར་སན་ཕ་རེན་སི་སི་ཀོ་ San Francisco དང་སལ་ལེག་སི་ཊི་ Salt Lake City སོགས་སུ་ཕེབས་རྒྱུ་ཡིན་འདུག་པ་བཅས།།
