༢༠༡༧ ཟླ་ ༡༢ ཚེས་ ༢༦ རེས་གཟའ་མིག་དམར།
རྡོ་རྗེ་གདན་དུ་རྟེན་གཞི་བྱས་པའི་རྣམ་རྒྱལ་གྲྭ་ཚང་གི་གཙོ་འཛིན་སྐུ་ཞབས་བསྟན་འཛིན་དཀོན་མཆོག་ལགས།
༄༅། །དགའ་ལྡན་ཕོ་བྲང་དང་སྐུ་བཅར་རྣམ་རྒྱལ་གྲྭ་ཚང་གཉིས་ཀྱིས་ཐུགས་ཁུར་རྐང་བཞེས་ཐོག་ཕྱི་ལོ་ ༢༠༡༧ ཟླ་ ༡༢ ཚེས་ ༢༩ ཉིན་བོད་མིའི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་གནས་མཆོག་ཝཱ་རཱ་ཎ་སིར་ཆིབས་སྒྱུར་བཀའ་དྲིན་བསྐྱང་ཏེ་ཕྱི་ཚེས་ ༣༠།༣༡ ཉིན་ “སེམས་དང་སེམས་ཀྱི་བྱེད་ལས།” “Mind In Indian Philosophical Schools of Thought and Modern Science” ཞེས་པའི་ནང་ཆོས་དང་ཚན་རིག་གི་རྒྱལ་སྤྱིའི་བགྲོ་གླེང་ལྷན་ཚོགས་སུ་དབུ་བཞུགས་མཛད་རྒྱུ་མ་ཟད།
དེ་སྔ་ཕྱི་ལོ་ ༡༩༦༨ ཕྱི་ཟླ་ ༡ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཝཱ་ཎཱ་བོད་ཀྱི་མཐོ་སློབ་ཁང་ཆེན་དེ་དབུ་འབྱེད་རབ་གནས་བཀའ་དྲིན་བསྐྱངས་ཏེ་ད་བར་མི་ལོ་ ༥༠ ཧྲིལ་པོ་འཁོར་བའི་དུས་དྲན་མཛད་སྒོ་སྲུང་བརྩི་ཞུ་སླད་ཕྱི་ལོ་གསར་པའི་ཉིན་ཏེ་ཕྱི་ལོ་ ༢༠༡༨ ཟླ་ ༡ ཚེས་ ༡ ཉིན་༸གོང་ས་༸སྐྱབས་མགོན་ཆེན་པོ་མཆོག་གཙུག་ལག་སློབ་ཁང་དུ་ལྔ་བཅུའི་དུས་དྲན་མཛད་སྒོ་གཙོ་མགོན་དུ་ཆིབས་སྒྱུར་བཀའ་དྲིན་བསྐྱང་གཏན་འཁེལ་འདུག
ཕྱི་ཚེས་ ༢ ཉིན་༸གོང་ས་མཆོག་ཝཱ་རཱ་ཎ་སི་ནས་གནས་མཆོག་རྡོ་རྗེ་གདན་དུ་ཆིབས་སྒྱུར་བཀའ་དྲིན་བསྐྱང་རྒྱུ་དང་།
ཕྱི་ཚེས་ ༥ ནས་ ༧ བར་མཐོ་སློབ་ཀྱི་སློབ་མ་གཙོ་བོར་གྱུར་བའི་རྒྱ་གར་གྱི་ཆོས་ཞུ་བ་མི་གྲངས་ ༣༥༠༠ བརྒལ་བར་བདེན་བཞིའི་སྐོར་གསུང་ཆོས་བཀའ་དྲིན་ཆེ་རྒྱུ་མ་ཟད། ཕྱི་ཚེས་ ༡༤།༡༥ །༡༦ བར་རྒྱལ་སྲས་དངུལ་ཆུ་ཐོགས་མེད་བཟང་པོས་མཛད་པའི་ལག་ལེན་སོ་བདུན་མ་དང་། དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་བཀའ་ཆོས་སྩལ་གནང་མཛད་རྒྱུ་ཡིན་འདུག
ས་སྐྱའི་སྨོན་ལམ་ཆེན་མོ་ཐེངས་ ༢༦ གནས་མཆོག་མཆོག་རྡོ་རྗེ་གདན་དུ་ཐེངས་དང་པོ་འཚོགས་བཞིན་པ།
ཕྱི་ཚེས་ ༡༧ ཉིན་སྐུ་ངལ་གསོ་གནང་མཛད་རྗེས་ཕྱི་ཚེས་ ༡༨།༡༩།༢༡ ཉིན་དཔལ་རྡོ་རྗེ་འཇིགས་བྱེད་དང་འཁོར་ལོ་བེད་མཆོག་གི་བཀའ་དབང་བཀའ་དྲིན་སྩལ་གནང་མཛད་རྒྱུ་དང་།
ཕྱི་ཚེས་ ༧ ཉིན་སྔ་དྲོ་ཐོག་མར་གསུང་རྭའི་ནང་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ནི་ཏིཤ་ཀུ་མཱར་ Nitish Kumar མཆོག་དང་མཛད་སྒོ་ལྷན་བཞུགས་ཐོག་དཔེ་དེབ་དབུ་འབྱེད་མཛད་རྒྱུ་ཡིན་འདུག
ཕྱི་ཚེས་ ༢༥ ཉིན་ཐའི་ལེནྜི་དགོན་བདག་ནས་ཇི་ལྟར་སྔོན་ནས་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་དགོན་པ་གསར་པ་ Thai Monastery དབུ་འབྱེད་མཛད་རྒྱུ་ཡིན་འདུག
ཐེངས་འདིར་ཚོད་དཔག་བྱས་ན་བོད་མི་སེར་སྐྱ་མང་ཚོགས་དང་། འབྲུག་དང་བལ་ཡུལ། ཧི་མཱ་ལ་ཡི་རི་རྒྱུད། དེ་བཞིན་བོད་དང་། ཕྱི་རྒྱལ་ཡུལ་གྲུ་འདྲ་མིན་ཁག་ནས་དད་ལྡན་ཆོས་ཞུ་བ་གྲངས་ ༣༠༠༠༠ ནས་ ༤༠༠༠༠ ཕེབས་རྒྱུའི་ཚོད་དཔག་གནང་བཞིན་འདུག
དེ་ཡང་རྡོ་རྗེ་གདན་དུ་རྟེན་གཞི་བྱས་པའི་རྣམ་རྒྱལ་གྲྭ་ཚང་གི་དགའ་ལྡན་འཕེལ་རྒྱས་གླིང་དགོན་པའི་དབུ་འཛིན་སྐུ་ཞབས་བསྟན་འཛིན་དཀོན་མཆོག་ལགས་ཀྱིས་གསུང་པ་ལྟར་ན་གོ་སྒྲིག་ཚོགས་ཆུང་ངོས་ནས་དུས་འཁོར་དབང་ཆེན་སྐབས་གོ་སྒྲིག་ཞུ་ཕྱོགས་ལྟར་ལས་དོན་རྒྱ་ཆེ་ཆུང་ཙམ་མ་གཏོགས་མཐུན་འགྱུར་ཡོངས་རྫོགས་དུས་འཁོར་དབང་ཆེན་སྐབས་དང་གཅིག་པ་ཡིན་ཚུལ་དང་། ཆོས་ཞུ་བ་ཁྲི་ལྔ་ལ་མཐུན་འགྱུར་གྲ་སྒྲིག་ཡོད་སྐོར་གསུངས།
གཞན་ཡང་ཆོས་ཞུ་བའི་མིང་ཐོ་དེབ་འགོད་གནང་ཕྱོགས་ཐད་བདེ་སྲུང་ལས་བྱེད་འཇིག་མེད་ལགས་ཀྱིས་ད་བར་ ཆོས་ཞུ་བ་གྲངས་ ༦༠༠༠ ལྷག་ཙམ་དེབ་འགོད་གནང་ཟིན་སྐོར་དང་། ཆོས་ཞུ་བའི་དེབ་འགོད་དེ་ཕྱི་ལོ་ ༢༠༡༧ ཟླ་ ༡༢ ཚེས་ ༢༠ ནས་འགོ་འཛུགས་གནང་ཡོད་ཅིང་། བདེ་སྲུང་ལས་ཁུངས་ཀྱི་གཙོས་འབྲེལ་ཡོད་ལས་ཁུངས་ནས་ཁྱོན་མིང་ཐོ་དེབ་འགོད་ཆེད་ལས་བྱེད་ ༡༣ རྡོ་རྗེ་གདན་དུ་ཕྱི་ཟླ་ ༡༢ ཚེས་ ༡༩ ཉིན་འབྱོར་ཟིན་འདུག
དེ་ཡང་བདེ་སྲུང་ལས་བྱེད་འཇིག་མེད་ལགས་ཀྱིས་གསུང་པ་ལྟར་ན། ཐེངས་འདིར་གདུལ་བྱ་གཙོ་བོ་རྒྱ་གར་བ་ཡིན་སྟབས་རྒྱ་གར་ཆོས་ཞུ་བ་ཚོར་བཞུགས་གནས་གྲ་སྒྲིག་གནང་བཞིན་ཡོད་པ་དང་། ཕྱོགས་མཚུངས་ཆོས་ཞུ་བ་དགུང་གྲངས་ ༧༧ ཡན་ཆོད་ཚོར་བཞུགས་གནས་གྲ་སྒྲིག་ཡོད་སྐོར། དེ་བཞིན་གནད་ཡོད་མི་སྣ་དང་མཁན་བླ་སྤྲུལ། དགེ་འདུན་འདུས་མང་བཅས་ལ་རྒྱུན་ལྡན་གསུང་ཆོས་སྐབས་གནང་ཕྱོགས་ལྟར་བཞུགས་གནས་གྲ་སྒྲིག་གནང་ཡོད་སྐོར་གསུངས། ད་ལྟའི་ཆར་ཆོས་ཞུ་བ་ ༥༠༠༠༠ ཕེབས་རྒྱུའི་ཚོད་དཔག་གནང་བཞིན་ཡོད་ཀྱང་མིང་ཐོ་དེབ་འགོད་ཚན་པས་ཆོས་ཞུ་བ་ ༢༥༠༠༠ ཙམ་ལ་དཔུང་རྟགས་འབུལ་འཆར་ཡོད་པ་ལས་རྒྱ་བལ་འབྲུག་གསུམ་དང་། ཧི་མཱ་ལ་ཡི་རི་རྒྱུད། བོད་པ་དང་བོད་ནས་ཕེབས་མཁན་བཅས་ནས་ཆོས་ཞུ་བ་མི་སྐྱ་ཕོ་མོ་རྣམས་ལ་བཀའ་ཆོས་ཞུ་རྒྱུའི་དཔུང་རྟགས་མི་དགོས་པ་གསུངས།།
