༢༠༡༧ ཟླ་ ༡༢ ཚེས་ ༨ རེས་གཟའ་པ་སངས།
སྐུ་པར། དགའ་ལྡན་ཕོ་བྲང་།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༧ ཟླ་ ༡༢ ཚེས་ ༨ ཉིན་གྱི་སྔ་དྲོ་ཆུ་ཚོད་ ༩ ཙམ་ལ་གྲོང་ཁྱེར་མུམ་བྷེའི་ནང་རྟེན་གཞི་བྱས་པའི་ཝ་ན་ཐེབས་རྩའི་ Vana Foundation རིག་པའི་སྣང་གསལ་ Vidyaloke ཞེས་པའི་ཚོགས་པ་དང་། སོ་མེ་ཡ་མཐོ་སློབ་གཉིས་ནས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་རྒྱ་གར་སྤྱི་ཚོགས་ཁྲོད་རྒྱ་གར་གྱི་གནའ་རབས་ལེགས་བཤད་སླར་གསོའི་དགོས་གལ་སྐོར་བཀའ་སློབ་སྩལ།
སྐབས་དེར་ཐོག་མར་༸གོང་ས་མཆོག་གིས་དཔལ་ནཱལེནྡྲ་ནས་དར་བའི་རྒྱ་གར་གྱི་གནའ་རབས་ཚད་མ་རིག་པའི་རྣམ་གཞག་སྐོར་བཀའ་སློབ་སྩལ། དེ་ནས་འགྲོ་བ་མིའི་ལྷན་སྐྱེས་ཀྱི་རང་བཞིན་དེ་བྱམས་བརྩེ་ལྡན་པ་ཞིག་ཡིན་པར་བརྟེན། ང་ཚོས་ཉམས་མྱོང་ཐོག་ནས་བརྗོད་པ་ཡིན་ནའང་འཛམ་གླིང་ནང་འགྲོ་བ་མི་ཐེར་འབུམ་བདུན་ཡོད་པ་ཚང་མ་རང་གི་མའི་བྱམས་བརྩེའི་འོག་ནས་འཚར་ལོངས་བྱུང་བ་ཤ་སྟག་ཡིན་ཞིང་། མའི་བྱམས་བརྩེ་མེད་ན་ང་ཚོ་གསོན་པོར་གནས་ཐབས་བྲལ་སྐོར་དང་། ཚན་རིག་པ་ཚོས་ཀྱང་བརྟག་དཔྱད་བྱེད་སྐབས་ཁོང་ཁྲོ་དང་སེམས་འཁྲལ་ཡང་ཡང་བྱས་ན་ལུས་པོའི་འཕྲོད་བསྟེན་ལའང་གནོད་རྒྱུ་ཡིན་པ་ར་སྤྲོད་གསལ་པོ་བྱས་ཡོད།
སྐུ་པར། དགའ་ལྡན་ཕོ་བྲང་།
མི་རྣམས་སྤྱི་ཚོགས་ལ་བརྟེན་པའི་སྲོག་ཆགས་ཤིག་ཡིན་སྟབས་ང་ཚོར་གྲོགས་པོ་གྲོགས་མོ་དགོས་པ་དང་། གྲོགས་པོ་གྲོགས་མོ་ཡོང་བར་ཕན་ཚུན་ཡིད་ཆེས་དགོས། ཡིད་ཆེས་སླེབས་པར་གཞན་དོན་ལ་ཞེ་ཐག་པ་ནས་སེམས་འཁུར་བྱ་དགོས། དེར་བརྟེན་གྲོགས་པོ་གྲོགས་མོ་བཟོ་རྒྱུའི་རྨང་གཞི་དེ་གཞན་ཕན་གྱི་བསམ་བློ་ཡིན་སྐོར་དང་། གཞན་ཕན་གྱི་བསམ་པ་སྐྱེ་བར་དོན་དམ་པའི་བྱམས་བརྩེའི་བློ་རྒྱུད་ལ་སྐྱེ་དགོས།
འོན་ཀྱང་དེང་དུས་ཤེས་ཡོན་ལམ་ལུགས་ནི་གཙོ་བོ་ཕྱི་དངོས་པོའི་མཐུན་རྐྱེན་ལ་དམིགས་ནས་གཏན་ལ་ཕབ་པ་ཞིག་ཡིན་སྟབས། ནང་གི་རིན་ཐང་ལ་དོ་སྣང་མ་བྱས་པར་གཙོ་བོ་ཕྱི་དངོས་པོའི་རིན་ཐང་ཁོ་ནར་རྩ་ཆེར་བཟུང་ནས་འགྲོ་བཞིན་ཡོད། དེར་བརྟེན་མིའི་བསམ་བློའི་འཁྱེར་སོ་དེའང་ཕྱི་དངོས་པོའི་མཐུན་རྐྱེན་ཁོ་ནའི་རྗེས་སུ་སྙེག་མཁན་ཞིག་ཆགས་ཡོད།
དེའི་དབང་གིས་དེང་སྐབས་འཛམ་གླིང་ནང་ཕན་ཚུན་དོན་དམ་ཡིད་ཆེས་བློས་འགེལ་བྱ་རྒྱུར་དཀའ་ངལ་འཕྲད་བཞིན་པའི་གནས་སྟངས་འདི་འདྲ་ཞིག་ཆགས་ཡོད། རྒྱུ་མཚན་གཙོ་བོ་ནི་དེང་དུས་ཤེས་ཡོན་སྤྲོད་སྟངས་ཐོག་ནས་ཡོང་བཞིན་ཡོད། དེང་དུས་ཤེས་ཡོན་ལམ་ལུགས་ནང་གཙོ་བོ་ཕྱིའི་འདོད་ཡོན་ཙམ་ལས་ནང་གཤིས་རྒྱུད་དུལ་རྒྱུའི་བསམ་བློ་ཡལ་བར་དོར་ཏེ་ཉོན་མོངས་རྣམས་ལ་བདེན་ཁ་བྱིན་ནས་འགྲོ་བཞིན་ཡོད། དེ་ལྟ་བུའི་ཤེས་ཡོན་ལམ་ལུགས་འོག་འཚར་ལོངས་བྱུང་བའི་གང་ཟག་དེའི་བསམ་བློར་ཕྱི་དངོས་པོ་ཁོ་ན་དོན་གཉེར་བྱ་རྒྱུ་ལས་ནང་གཤིས་རྒྱུད་དང་འབྲེལ་བའི་བྱམས་པ་དང་བརྩེ་བ་སོགས་བཟང་པོའི་རིན་ཐང་ལ་སྣང་ཆུང་བྱ་རྒྱུ་དེ་ལྟར་ཡོང་བཞིན་ཡོད།
དེར་བརྟེན་ད་ཆ་ང་ཚོས་དེང་དུས་ཤེས་ཡོན་ལམ་ལུགས་ཙམ་གྱིས་མ་འདང་བ་དེ་ཤེས་པར་བྱས་ནས། དེང་དུས་ཤེས་ཡོན་ལམ་ལུགས་དང་ལྷན་རྒྱ་གར་གནའ་རབས་ཀྱི་བློའི་རྣམ་གཞག་དང་བྱེད་ལས་སོགས་ལྟ་གྲུབ་ཧ་ཅང་ཕྱུག་པོ་ཡོད་པ་དེ་དག་ལ་དོ་སྣང་བྱེད་དགོས། ད་ཆ་འཛམ་གླིང་ཕན་ཚུན་གཅིག་ལ་གཅིག་བརྟེན་ནས་འཚོ་སྡོད་བྱེད་དགོས་པའི་དུས་ཚོད་ཡིན་སྟབས་རང་ཉིད་གཅིག་པུའི་ཆེད་དུ་བསམ་བློ་བཏང་ན་ཡོང་ཐབས་རྩ་བ་ནས་མེད།
སྐུ་པར། དགའ་ལྡན་ཕོ་བྲང་།
ཆབ་སྲིད་ཀྱི་ས་མཚམས་ཟེར་བ་དེ་ད་ཆ་དུས་ཚོད་ཡོལ་ཟིན། རྒྱ་གར་ལ་མཚོན་ནའང་མངའ་སྡེ་འདྲ་མིན་ནང་རིག་གཞུང་དང་། སྐད་ཡིག ཡུལ་སྲོལ་གོམས་གཤིས་སྣ་ཚོགས་ཡོད་ཀྱང་མཉམ་རུབ་བྱས་ནས་སྤྱིའི་སྒྲིག་འཛུགས་ཤིག་གི་འོག་གནས་བཞིན་ཡོད།
ཕྱོགས་མཚུངས་ཡུ་རོབ་སྤྱི་མཐུན་ཚོགས་པ་ European Union ལྟ་བུར་མཚོན་ནའང་། དེ་སྔ་འཛམ་གླིང་དམག་ཆེན་གཉིས་པའི་སྐབས་ཕན་ཚུན་དགྲ་བོའི་འདུ་ཤེས་བཟུང་ནས་རྒྱལ་ཁབ་ཕན་ཚུན་དམག་འཐབ་བྱས་ཡོད་ཀྱང་། ད་ལྟའི་དངོས་ཡོད་ཀྱི་གནས་སྟངས་གཞི་ལ་བཞག་སྟེ་དེང་སྐབས་སུ་མཚོན་ན། རྒྱལ་ཁབ་དེ་དག་གིས་སྤྱིའི་ཁེ་ཕན་ཆེད་ཡུ་རོབ་སྤྱི་མཐུན་ཚོགས་པའི་སྒྲིག་འཛུགས་གཅིག་གི་འོག་གནས་བཞིན་ཡོད།
དེར་བརྟེན་འབྱུང་འགྱུར་རིམ་བཞིན་ཨེ་ཤི་ཡའི་སྤྱི་མཐུན་ཚོགས་པ་ Asian Union དང་། ཨ་ཧྥི་རི་ཀའི་སྤྱི་མཐུན་ཚོགས་པ།African Union ལྷོ་ཨ་མི་རི་ཀའི་སྤྱི་མཐུན་ཚོགས་པ། Latin American Union བཅས་འཛུགས་ཐབས་བྱ་དགོས། དཔེར་ན། ཨེ་ཤི་ཡའི་སྤྱི་མཐུན་ཚོགས་པ་ལྟ་བུ་ཞིག་འཛུགས་ཐུབ་ན་དེའི་ནང་ནས་གཙོ་ཆེ་རྒྱ་གར་དང་། རྒྱ་ནག དེ་བཞིན་ཉི་ཧོང་སོགས་མཉམ་སྡོད་བྱ་ཐུབ།
བར་སྐབས་རྒྱ་དཀར་ནག་གཉིས་དབར་འབྲོག་ལམ་ Doklam སྐོར་རྙོག་དྲ་ཕྲན་བུ་བྱུང་ཡོད། སྐབས་དེར་གསར་འགོད་པ་ཚོས་ངོས་ལ་དེའི་སྐོར་འདྲི་སྐབས་ངོས་ཀྱིས་རྙོག་དྲ་དེ་ཧ་ཅང་ཆུང་ཆུང་ཞིག་རེད། རྒྱ་དཀར་ནག་གཉིས་ཕན་ཚུན་རྩ་མེད་བཟོ་རྒྱུ་ཟེར་བ་ནི་ཡོང་ཐབས་རྩ་བ་ནས་མེད་པར་བརྟེན་ཐབས་ལམ་ཡག་ཤོས་ནི། ཕན་ཚུན་སྤུན་མཆེད་ལྟ་བུའི་འདུ་ཤེས་འོག་དེ་སྔའི་ཧིན་དི་ཅིན་ནི་བྷའི་བྷའི་ Hindi-Chinni bhai-bhai ཟེར་བའི་ལངས་ཕྱོགས་དེའི་ཐོག་ནས་འགྲོ་ཐབས་བྱ་རྒྱུ་ཧ་ཅང་གལ་ཆེན་པོ་རེད།
བོད་ནང་དུ་མཚོན་ན་དུས་རབས་ ༨ ཙམ་ནས་མཁན་ཆེན་ཞི་བ་འཚོས་དཔལ་ནཱ་ལེནྡྲའི་བཞེད་སྲོལ་དྲི་མ་མེད་པ་བོད་ནང་དར་སྤེལ་མཛད་ཡོད། དུས་དེ་ནས་བཟུང་བོད་མི་ཚོས་ལོ་ངོ་སྟོང་ལྷག་རིང་ལེགས་བཤད་དེ་དག་འཆད་གཉེར་བྱས་ནས་འཛིན་སྐྱོང་སྤེལ་གསུམ་བྱས་དང་བྱེད་མུས་ཡིན། ཕྱི་ལོ་ ༡༩༧༣ ལོར་ངོས་རང་ནུབ་ཕྱོགས་སུ་བསྐྱོད་སྐབས། འཛམ་གླིང་གི་གནས་སྟངས་ཕན་ཚུན་ཧ་ཅང་ལྟོས་ནས་འཚོ་དགོས་སྟབས། འཛམ་གླིང་འདི་ཧ་ཅང་ཆུང་ཆུང་ཞིག་ཡིན་པར་སྣང་བྱུང་། དེར་བརྟེན་ངོས་ཀྱིས་དུས་སྐབས་དེ་ནས་བཟུང་གོ་ལ་གཅིག་གྱུར་གྱི་ལས་འགན། ཞེས་འགྲོ་བ་མི་རིགས་ཀུན་ལ་ཁྱབ་པའི་ལས་འགན་ཞིག་ཡོད་པར་ངོས་འཛིན་བྱེད་བཞིན་ཡོད། ལས་འགན་དེ་སྒྲུབ་པར་བོད་མི་ཚོས་གཅེས་ཉར་བྱེད་བཞིན་པའི་རྒྱ་གར་གྱི་གནའ་རབས་ལེགས་བཤད་འདི་ཧ་ཅང་འབྲེལ་བ་ཡོད་པ་གཞི་ནས་མཐོང་བྱུང་། དེར་བརྟེན་ངོས་རང་ས་ཕྱོགས་གང་དུ་བསྐྱོད་ཀྱང་རྒྱ་གར་གྱི་གནའ་རབས་ལེགས་བཤད་ངོ་སྤྲོད་མཁན་གྱི་བང་ཆེན་ཞིག་ཡིན། ཞེས་བརྗོད་བཞིན་ཡོད། ཅེས་དང་།
ཕྱོགས་མཚུངས་༸གོང་ས་མཆོག་གིས་དྲི་བ་དྲིས་ལན་སྐབས། བོད་ཀྱི་ཆོས་བརྒྱུད་ཁག་ལ་བླ་མའི་ཆོས་ལུགས། ཞེས་ནུབ་ཕྱོགས་པ་ཚོས་དེ་སྔ་འབོད་སྲོལ་བྱུང་ཡོད་པ་དང་། དེ་ནི་བླ་མས་ཆོས་ཀྱི་མིང་ཐོག་ནས་གང་བྱུང་བྱས་པའི་འབྲས་བུ་ཡིན་པ་དང་། སྤྱིར་བླ་བྲང་གི་ལམ་ལུགས་དེ་ཞིང་བྲན་ལམ་ལུགས་ཀྱི་སྤྱི་ཚོགས་གྱི་ཤུགས་རྐྱེན་འོག་ནས་བྱུང་བ་ཞིག་ཕལ་ཆེར་ཡིན་པར་བརྟེན་ད་ཆ་ལམ་ལུགས་དེ་དུས་ཚོད་ཡོལ་ཟིན་སྟབས། མགོན་པོ་གང་ཉིད་མཆོག་གིས་དེ་སྔ་ཕྱི་ལོ་ ༡༩༦༩ ཙམ་ནས་འབྱུང་འགྱུར་ཏཱ་ལའི་བླ་མའི་བླ་བྲང་དེ་གནས་མིན་བོད་མི་ཚོས་ཐག་གཅོད་བྱ་དགོས་པའི་བཀའ་སློབ་སྩལ་བ་ལྟར། ཕྱི་ལོ་ ༢༠༠༡ ནས་བཟུང་༸གོང་ས་མཆོག་བོད་མིའི་ཆབ་སྲིད་ཀྱི་ཐུགས་འགན་ནས་ཕྱེད་རྒན་ཡོལ་དང་། དེ་རྗེས་ཕྱི་ལོ་ ༢༠༡༡ ལོ་ནས་བཟུང་ཏཱ་ལའི་བླ་མས་བོད་མིའི་ཆབ་སྲིད་ཀྱི་དབུ་ཁྲིད་ཟེར་བ་ནས་རྒན་ཡོལ་ཆ་ཚང་ཞུས་གནང་མཛད་དེ་ད་ཆ་བོད་མིའི་ཆབ་སྲིད་ཀྱི་དབུ་ཁྲིད་དེ་མང་གཙོའི་ལམ་ནས་འོས་འདེམས་བྱུང་བའི་འགོ་ཁྲིད་ཀྱིས་འགན་འཁྱེར་བཞིན་ཡོད་སྐོར་དང་། སྤྱིར་དེ་སྔ་ཧྥ་རན་སིའི་ནང་གསར་བརྗེ་ French Revolution དང་། དེ་བཞིན་ཨུ་རུ་སུའི་ནང་བྷོལ་ཤེ་ཝིག་གསར་བརྗེ་ Bolshevik Revolution བྱུང་བ་དེ་དག་གཙོ་བོ་ཞིང་བྲན་ལམ་ལུགས་ལ་ངོ་རྒོལ་ཆེད་བྱུང་ཡོད། ལམ་ལུགས་དེ་དག་ནང་སྐྱོན་ཆ་ཆེན་པོ་ཡོད། ངོས་རང་སྐབས་དེར་ཡོད་ན་ངོ་རྒོལ་བྱེད་མཁན་གྲས་སུ་ཏན་ཏན་ཡོད་ཀྱི་རེད།
ངོས་ཀྱི་དཔལ་འབྱོར་ལམ་ལུགས་དེ་སྤྱི་ཚོགས་རིང་ལུགས་ཀྱི་དཔལ་འབྱོར་ལམ་ལུགས་ལ་དགའ་མོས་ཧ་ཅང་ཡོད། འོན་ཀྱང་ལེ་ཉིན་ Lenin གྱིས་སྤྱི་ཚོགས་རིང་ལུགས་ཀྱི་ལམ་ལུགས་དེ་དག་དབང་ཆ་སྒེར་སྤྱོད་ཀྱི་ལམ་ལུགས་སུ་བསྒྱུར་བར་བརྟེན་ལེ་ཉིན་ Lenin གྱིས་སྲོལ་གཏོད་པའི་སྤྱི་ཚོགས་རིང་ལུགས་དེར་ངོས་རང་དགའ་པོ་མེད། དེར་མཐའ་གཅིག་ཏུ་ངོ་རྒོལ་བྱེད་བཞིན་ཡོད།
ཕྱོགས་མཚུངས་བོད་ལ་མཚོན་ནའང་ཞིང་བྲན་ལམ་ལུགས་ཀྱི་ཤུགས་རྐྱེན་འོག་ནས་དར་བའི་བླ་བྲང་སོགས་ད་ཆ་དུས་ཚོད་ཡོལ་ཟིན། བོད་ཀྱི་བླ་བྲང་དེ་དག་ཀྱང་དུས་ཚོད་ཡོལ་ཟིན་སྟབས། རིམ་བཞིན་མཇུག་སྒྲིལ་བྱ་དགོས་པའི་དུས་ལ་བབ་ཡོད་སྐོར་བཀའ་སློབ་སྩལ།
སྐུ་པར། དགའ་ལྡན་ཕོ་བྲང་།
སྐུ་པར། དགའ་ལྡན་ཕོ་བྲང་།
སྐུ་པར། དགའ་ལྡན་ཕོ་བྲང་།
སྐུ་པར། དགའ་ལྡན་ཕོ་བྲང་།
