༢༠༡༧ ཟླ་ ༡༢ ཚེས་ ༧ རེས་གཟའ་ཕུར་བུ།
༄༅། །ཕྱི་ལོ་ ༢༠༡༧ ཕྱི་ཟླ་ ༡༢ ཚེས་ ༧ ཉིན་གྱི་སྔ་དྲོ་ཆུ་ཚོད་ ༦།༣༠ ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཅནྡི་གར་ Chandigarh བརྒྱུད་རྒྱ་གར་གྲོང་ཁྱེར་མུམ་བྷེ་རུ་ Mumbai ཆིབས་སྒྱུར་བཀའ་དྲིན་བསྐྱངས་འདུག
དེའང་རྒྱ་གར་ལྷོ་ཕྱོགས་མུམ་བྷེ་གྲོང་ཁྱེར་དུ་རྟེན་གཞི་བྱས་པའི་སོ་མ་ཡ་ཝིདྱ་ཝི་ཧཱར་ Somaiya Vidyavihar ཞེས་པའི་ལྟེ་གནས་ཁང་གི་ K.J. Somaiya Campus ཚོགས་ཁང་དུ་ཆིབས་སྒྱུར་བཀའ་དྲིན་བསྐྱངས་ནས་ཕྱི་ཚེས་ ༨།༩ བཅས་ཉིན་གཉིས་རིང་བཀའ་ཆོས་བཀའ་དྲིན་ཆེ་གནང་མཛད་རྒྱུ་དང་། གསུང་ཆོས་གོ་སྒྲིག་ཞུ་མཁན་སོ་མ་ཡ་ཝིདྱ་ཝི་ཧཱར་ Somaiya Vidyavihar དང་ཝིདྱ་ལོག་ Vidyaloke ཞེས་པའི་ཚོགས་པ་གཉིས་ཟུང་འབྲེལ་ཐོག་ཡིན་འདུག
ཕྱི་ཚེས་ ༡༠ ཉིན་སྔ་དྲོ་སོ་མ་ཡ་མཐོ་སློབ་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་གྱི་གནའ་རབས་ལེགས་གཤད་བསྐྱར་གསོའི་སྐོར་མང་ཚོགས་ལ་བཀའ་སློབ་སྩལ་རྗེས།
ཕྱི་ཚེས་ ༡༡ ཉིན་རྒྱ་གར་ལྷོ་ཕྱོགས་ཀ་ན་ཊ་ཀ་མངའ་སྡེའི་ནང་ཆགས་པའི་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་ཆིབས་སྒྱུར་བསྐྱངས་ཏེ་ཕྱི་ཚེས་ ༡༧ བར་ཆོས་འབྲེལ་བསྐྱང་གཏན་འཁེལ་འདུག
ཕྱི་ཚེས་ ༡༢ དང་ ༡༣ བཅས་ཉིན་གཉིས་རིང་དཔལ་ལྡན་འབྲས་དཀར་སྤུངས་པའི་བླ་སྤྱིའི་འདུ་ཁང་བྱིན་ཅན་ནང་དགེ་འདུན་པར་བསྙེན་རྫོགས་ཀྱི་སྡོམ་པ་འབོག་ཆོག་མཛད་རྒྱུ་དང་ཕྱི་ཚེས་ ༡༤ ཉིན་འབྲས་སྤུངས་བློ་གསལ་གླིང་གི་སྒོམ་དང་ཚན་རིག་ལྟེ་གནས་ཁང་དབུ་འབྱེད་མཛད་རྒྱུ་ཡིན་འདུག
ཕྱི་ཚེས་ ༡༥ ཉིན་མོན་གྷོ་བཙུན་དགོན་བྱང་ཆུབ་ཆོས་གླིང་དུ་ཆོས་ར་གསར་པ་དབུ་འབྱེད་དང་། དེར་རབ་གནས་བཀའ་དྲིན་བསྐྱང་གཏན་འཁེལ་བ་དང་། ཕྱི་ཚེས་ ༡༦ དང་ ༡༧ བཅས་ཉིན་གཉིས་རིང་གདན་ས་དགའ་ལྡན་རྣམ་པར་རྒྱལ་བའི་གླིང་གི་བླ་སྤྱིར་བསྙེན་རྫོགས་ཀྱི་སྡོམ་པ་འབོག་ཆོག་མཛད་རྒྱུ་ཡིན་འདུག
ཕྱི་ཚེས་ ༡༨ ཉིན་མོན་གྷོ་འདོད་རྒུ་གླིང་ནས་ཧུབ་ལི་ Hubli གྲོང་ཁྱེར་བརྒྱུད་སྦེལ་ཀོབ་བོད་མིའི་གཞིས་ཆགས་ཁུལ་དུ་རྟེན་གཞི་བྱས་པའི་བྱེས་ཀྱི་གདན་ས་ཆེན་པོ་སེ་ར་ཐེག་ཆེན་གླིིང་དུ་ཆིབས་སྒྱུར་བསྐྱངས་ནས་དགེ་འདུན་པ་གྲངས་ ༦༠ ཙམ་ལ་ཉིན་གཅིག་རིང་བསྙེན་རྫོགས་ཀྱི་སྡོམ་པ་འབོག་ཆོག་མཛད་རྒྱུའི་མཛད་འཆར་འདུག
ཕྱི་ཚེས་ ༢༠ ཉིན་མགོན་པོ་༸གང་ཉིད་མཆོག་གིས་སེར་བྱེས་མཁས་སྙན་གྲྭ་ཚང་དུ་རྟ་མགྲིན་ཡང་གསང་གི་བཀའ་དབང་བཀའ་དྲིན་སྩལ་གནང་མཛད་རྒྱུ་དང་།
ཕྱི་ཚེས་ ༢༡ ཉིན་སེར་སྨད་ཐོས་བསམ་ནོར་གླིང་གྲྭ་ཚང་གིས་གསར་བཞེངས་ལེགས་གྲུབ་བྱུང་བའི་ཆོས་རའི་དབུ་འབྱེད་མཛད་པ་དང་སྦྲགས་འཇམ་མགོན་བླ་མ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་བསྩལ་རྒྱུ་ཡིན་འདུག
དེ་རྗེས་༸གོང་ས་༸སྐྱབས་མགོན་ཆེན་པོ་མཆོག་གིས་སྦེང་ལོར་གྲོང་ཁྱེར་ Bengaluru ནང་དུ་མཐོ་སློབ་འདྲ་མིན་ཁག་གི་བོད་རིགས་སློབ་ཕྲུག་རྣམས་ལ་བཀའ་སློབ་བསྩལ་རྒྱུའི་མཛད་འཆར་ཁག་ཅིག་ཀྱང་ཡོད་འདུག་པ་བཅས།
