ཕྱི་ལོ་ ༢༠༡༧ ཟླ་ ༡༢ ཚེས་ ༢༠ རེས་གཟའ་ལྷག་པ།
༄༅། །འདི་གའི་ཆེད་གཉེར་གསར་འགོད་པ་སྐལ་བཟང་རྒྱ་མཚོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༡༢ ཚེས་ ༢༠ རེས་གཟའ་ལྷག་པའི་ཉིན་གྱི་སྔ་དྲོ་ཆུ་ཚོད་ ༧ ཡོལ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་རྟེན་གཞི་བྱས་པའི་བྱེས་ཀྱི་གདན་ས་ཆེན་པོ་སེ་ར་ཐེག་ཆེན་གླིང་གི་ཆོས་རྭའི་ནང་དུ་༸ཞབས་སོར་འཁོད་བསྟུན་དགའ་ལྡན་ཁྲི་རིན་པོ་ཆེ་མཆོག་དང་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག ཤར་བྱང་ཆོས་རྗེ་རྣམ་གཉིས། རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག སེ་ར་བྱེས་སྨད་གཉིས་ཀྱི་མཁན་ལས་ཟུར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་བཅས་ཀྱིས་ཕེབས་བསུ་ཞུས་ཡོད།
དེ་ཡང་མགོན་པོ་གང་ཉིད་མཆོག་བཞུགས་ཁྲིར་༸ཞབས་སོར་འཁོད་མཚམས་སེར་སྐྱ་མང་ཚོགས་ ༡༥༠༠༠ བརྒལ་བར་བཀའ་དབང་སྩལ་དོན། རྣམ་པ་ལྷན་རྒྱས་ལ་ཞུ་རྒྱུར། འདིར་སེ་ར་ཆོས་སྒར་དུ་འབྱོར་དུས་སེར་བྱེས་གྲྭ་ཚང་ནས་རྟ་མགྲིན་ཡང་གསང་གི་དབང་ཞིག་བྱུང་ན་ཞེས་གསུང་གི་འདུག རྩ་བའི་རྟ་མགྲིན་སྒྲུབ་པ་བཀའ་བརྒྱད་ཀྱི་ནང་ཚན་བླ་མེད་ཆོས་འཁོར་རེད། སྤྱིར་དུས་འཁོར་དབང་ཆེན་ལྟ་བུར་ཆ་བཞག་ནའང་། བླ་མེད་ཆོས་འཁོར་ཡིན། སྤྱིར་བླ་མེད་ཆོས་འཁོར་རིགས་ཉི་ཤུ་རྩ་ལྔ་མན་ཆད་གནང་རྒྱུའི་ལུགས་སྲོལ་ཡོད། ནམ་རྒྱུན་དེ་ལྟ་བུའི་དོ་དམ་པོ་གནང་སྲོལ་མེད། སློབ་མའི་མཚན་ཉིད་གཙོ་བོ་དད་པ་རེད། དད་པ་སྨོས་མི་དགོས་པར་ཁྱེད་རང་ཚོ་ཚང་མ་དད་པ་དང་དམ་ཚིག་གཡོ་བ་མེད་པ་འདུག མཚན་ཉིད་གཙོ་བོ་འདི་རེད།
མང་ཚོགས་རང་ལ་དབང་བྱས་ན་འགྲིག་གི་རེད་བསམས་པ་དྲན་བྱུང་། ངོས་ཀྱིས་མོ་བརྒྱབ་པ་ཡིན། མོ་ཧ་ཅང་བཟང་པོ་འདུག དེ་རིང་འདིར་རྟ་མགྲིན་གྱི་དབང་བྱ་རྒྱུ་འདི་ལྟར་ཡིན། རྟ་མགྲིན་ནི་སྤྱན་རས་གཟིགས་ཁྲོ་བོའི་རྣམ་པར་ཤར་པ་ཡོངས་གྲགས་རེད། ང་ཚོ་བོད་གངས་ཅན་གྱི་ཞིང་ནི་འཕགས་པ་སྤྱན་རས་གཟིགས་ཀྱི་གདུལ་ཞིང་ཡིན་པ་ལོ་རྒྱུས་ཀྱི་ཐོག་ནས་བཤད་རྒྱུ་ཡོད་པ་མ་ཟད། ལུང་དང་དེ་འདྲའི་ཐོག་ནས་འཕགས་པ་སྤྱན་རས་གཟིགས་ལ་ཐུན་མོང་མ་ཡིན་པའི་ལས་འབྲེལ་ཡོད་པ་ཧ་ཅང་གསལ་པོ་རེད། ངོས་ལ་ཆ་བཞག་ནའང་ཚེ་རབས་མང་པོ་ལས་དང་སྨོན་ལམ་དེ་འདྲའི་ཐོག་ནས་འཕགས་པ་སྤྱན་རས་གཟིགས་ཀྱི་ཞབས་འདེགས་འཕྲིན་ལས་སྒྲུབ་མཁན་ཡིན་བསམ་པ་དྲན་གྱི་ཡོད་པ་མ་ཟད། དེ་ལྟར་ཡིན་པ་བཟོ་འདྲ་བོ་ཞིག་ཀྱང་རེད། རྟ་མགྲིན་དེ་སྤྱན་རས་གཟིགས་ཁྲོ་བོའི་རྣམ་པར་ཤར་པ་ཡིན་དུས། འདི་ང་ཚོ་བོད་གངས་ཅན་དང་ཕྱོགས་གཅིག་ནས་ཐུན་མོང་མ་ཡིན་པའི་འབྲེལ་བ་ཡོད། བོད་གངས་ཅན་ལྗོངས་ཀྱི་མཐའ་འདུལ་ཡང་འདུལ་གྱི་གཙུག་ལག་ཁང་ཕལ་ཆེ་བ་དང་སྤྱན་རས་གཟིགས་ཞི་ཁྲོའི་སྐུ་ཡོད་པ་ཆགས་ཀྱི་ཡོད། དེར་བརྟེན་ང་ཚོ་བོད་པ་དང་ཐུན་མོང་མིན་པའི་འབྲེལ་བ་ཞིག་ཡོད། དེར་བརྟེན་དེ་རིང་རྟ་མགྲིན་ཡང་གསང་གི་དབང་བྱས་ན་བསམ་པ་དྲན་པ་རེད།
ཕྱི་ལོ་ ༡༩༥༩ ལོར་ང་ཚོ་བཙན་བྱོལ་ལ་བསླེབས། དྲུག་ཅུ་རེ་གྲངས་ནང་གཞིས་ཆགས་
དེ་འདྲའི་བརྒྱུད་རིམ་ཁྲོད་ནས་
དེ་ནས་ཆུ་ཚོད་ ༡༡།༣༠ ཙམ་ལ་སེ་ར་ཐེག་ཆེན་གླིང་གི་ཆོས་རའི་ནང་རྟ་མགྲིན་ཡང་གསང་གི་བཀའ་དབང་ཡོངས་སུ་ལེགས་གྲུབ་བྱུང་བ་དང་སང་ཕྱི་ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སེར་སྨད་ཐོས་བསམ་ནོར་གླིང་གྲྭ་ཚང་གི་ཆོས་རྭ་གསར་པ་དབུ་འབྱེད་མཛད་རྒྱུ་དང་འབྲེལ་རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་ཆོས་འབྲེལ་སྩལ་རྒྱུ་རེད་འདུག །
