༢༠༡༧ ཟླ་ ༡༢ ཚེས་ ༢༦  རེས་གཟའ་མིག་དམར།

༄༅། །འདི་གར་ཆོས་རིག་ལས་ཁུངས་ནས་ཕྱི་ལོ་ ༢༠༡༧ ཟླ་ ༡༢  ཚེས་ ༢༦  ཉིན་བཏང་གནས་ནང་འཁོད་དོན།  ཕྱི་ལོ་ ༢༠༡༧ ཟླ་ ༡༢ ཚེས་ ༢༣ ཉིན་གྱི་ཕྱི་དྲོའི་ཆུ་ཚོད་ ༦ ཙམ་ལ་བོད་ཨ་མདོ་རྔ་པ་ནས་ཡིན་པའི་ཕ་རྒྱ་སྐྱབས་དང་མ་འཕྲིན་ལྡོག་ལགས་གཉིས་ཀྱི་བུ་དཀོན་པེ་ལགས་རང་ལོ་ ༣༠ ཡས་མས་ཡིན་པ་ནས་རྒྱ་ནག་གཞུང་ལ་ཞི་རྒོལ་དུ་ཨ་མདོ་རྔ་པ་རུ་རང་དབང་དགོས་ཞེས་སྐད་འབོད་ཀྱིས་རང་ལུས་མེར་སྲེག་བཏང་སྟེ་ཕྱི་ཚེས་ ༢༤ ཉིན་འདས་གྲོང་སོང་བའི་ཡིད་སྐྱོའི་གནས་ཚུལ་བྱུང་འདུག་པར། 

དམ་པ་དེ་ཉིད་ཀྱི་དོན་དུ་གཞུང་འབྲེལ་གདུང་སེམས་མཉམ་བསྐྱེད་དང་མྱ་ངན་གུས་འདུད་མཚོན་བྱེད་དགོངས་རྫོགས་མཆོད་འབུལ་སྨོན་ལམ་ཞིག་ཐེག་ཆེན་ཆོས་གླིང་གཙུག་ལག་ཁང་དུ་ཕྱི་ལོ་ ༢༠༡༧ ཟླ་ ༡༢ ཚེས་ ༢༧ རེས་གཟའ་ལྷག་པའི་ཉིན་རྒྱབ་ཆུ་ཚོད་  ༤ པའི་ཐོག་གོ་སྒྲིག་ཞུ་རྒྱུ་ལགས་ན། མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྲི་ཞུ་བ་ཡོངས་རྫོགས་དུས་ཐོག་མཆོད་འབུལ་དུ་ངེས་ཕེབས་ཡོང་བ་ཞུ། ཞེས་འཁོད་འདུག

དེ་ཡང་མཆོད་འབུལ་སྨོན་ལམ་སྐབས་སྲིད་སྐྱོང་བློ་བཟང་སེངྒེ་མཆོག་གིས་བོད་མིའི་སྒྲིག་འཛུགས་ཀྱི་ཚབ་ཞུས་ནས་དམ་པ་དེ་ཉིད་ཀྱི་ནང་མི་སྤུན་མཆེད་དང་གཉེན་ཉེ་སོགས་ལ་གདུང་སེམས་མཉམ་སྐྱེ་ཞུ་ཡིན་འདུག་པ་བཅས།།