རྒྱ་རིགས་མང་གཙོ་དོན་གཉེར་བ་སྐུ་ཞབས་ལིའུ་ཞའོ་པོ་འདས་པོའི་རྗེས་དྲན་གྱི་དེབ་དབུ་འབྱེད་གནང་བ།

གསར་ལས་ཁང་གི་གསར་འགོད་པས།

༢༠༡༧-༡༢-༡༤

༢༠༡༧ ཟླ་ ༡༢ ཚེས་ ༡༤ རེས་གཟའ་ཕུར་བུ།

༄༅། །འདི་གར་ཨ་རིའི་དོན་ཁང་ནས་བཏང་གནས་ནང་འཁོད་དོན། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་རྣམ་གཉིས་ནས་ <<ལིའུ་ཞའོ་པོ་རྗེས་དྲན་རྩོམ་ཡིག་ཕྱོགས་སྒྲིག>> ཞེས་པའི་དེབ་གསར་དབུ་འབྱེད་གནང་རྗེས་མཛད་སྒོ་དང་འབྲེལ་བའི་གསུང་བཤད་གནང་ཡོད།

དེ་ཡང་། ཨ་མེ་རི་ཀའི་ནང་ཡོད་པའི་དམངས་གཙོའི་རྒྱ་ནག ཅེས་པའི་རྒྱ་ཡིག་གི་དྲྭ་རྒྱ་དང་། རྒྱ་ནག་དམངས་གཙོར་སྒྱུར་ཐབས་ཞིབ་འཇུག་ཁང་ཐུང་མོང་གིས་གྲ་སྒྲིག་བྱས་པའི་ <<ལིའུ་ཞའོ་པོ་རྗེས་དྲན་རྩོམ་ཡིག་ཕྱོགས་སྒྲིག>> ཞེས་པའི་ཕྱག་དེབ་དབུ་འབྱེད་ཀྱི་མཛད་སྒོ་དེ། ཕྱི་ལོ་ ༢༠༡༧ ཟླ་བ་ ༡༢ ཚེས་ ༩ ཉིན་ཨ་རིའི་གྲོང་ཁྱེར་ནིའུ་ཡོག་གི་རྒྱ་གྲོང་ Flushing དུ་ཡོད་པའི་ Sheraton གསོལ་མགྲོན་ཁང་དུ་ཚོགས་ཡོད་པ་དང་། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་རྣམ་གཉིས་གདན་ཞུས་ལྟར་མཛད་སྒོར་ཕེབས་ཏེ་ཕྱག་དེབ་དབུ་འབྱེད་དང་། མཛད་སྒོའི་ཐོག་གསུང་བཤད་གནང་ཡོད་པ་རེད།

དབུ་འབྱེད་མཛད་སྒོར་ཨ་རིའི་གཞུང་འབྲེལ་མ་ཡིན་པའི་ཚོགས་པ་ཁག་ཅིག་གི་སྐུ་ཚབ་དང་། Chen Kuide དང་། Hu Ping, Xu Youyu སོགས་རྒྱ་རིགས་ཤེས་ཡོན་ཅན་དང་རྩོམ་པ་པོ། ཀོ་ལིམ་སྦི་ཡ་གཙུག་སློབ་ཆེན་གྱི་ Colombia University སྙན་གྲགས་ཅན་གྱི་རྒྱ་ནག་མཁས་པ་ Andrew Nathen ཡུ་གུར་འགྲོ་བ་མིའི་ཐོབ་ཐང་ཚོགས་པའི་སྐུ་ཚབ། རྒྱ་རིགས་དམངས་གཙོ་དོན་གཉེར་བ། གསར་འགོད་པ་བཅས་ཁྱོན་མི་གྲངས་ ༧༠ ལྷག་ཙམ་དབུ་འབྱེད་མཛད་སྒོར་མཉམ་ཞུགས་གནང་ཡོད།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་རྣམ་གཉིས་ནས་དབུ་འབྱེད་མཛད་སྒོར་གསུང་བཤད་གནང་སྐབས། ནོ་བེལ་ཞི་བདེའི་གཟེངས་རྟགས་བཞེས་མཁན་ཞིང་གཤེགས་སྐུ་ཞབས་ལིའུ་ཞའོ་པོ་ལ་རྗེས་དྲན་གྱི་ཕྱག་དེབ་དཔར་སྐྲུན་གནང་ཐུབ་པར་ལེགས་གསོའི་བསྔགས་བརྗོད་གནང་བ་དང་དུས་མཚུངས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས་ཀྱི་ངོས་ནས་ལིའུ་ཞའོ་པོ་སྐུ་འཚོ་བཞུགས་སྐབས་ཀྱི་མཛད་རྗེས་ལ་གདེང་འཇོག་གནང་ཡོད་པའི་སྐོར་དང་། ལྷག་པར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ལིའུ་ཞའོ་པོ་ལ་ནོ་བེལ་ཞི་བདེའི་གཟེངས་རྟགས་ཐོབ་ཐབས་ལ་ཤུགས་ཆེའི་རྒྱབ་སྐྱོར་མཛད་གནང་ཡོད་སྐོར། ཁོང་སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་མ་ཐག་བོད་མིའི་སྒྲིག་འཛུགས་ཀྱི་ལས་ཁུངས་ཁག་ལས་མཚམས་བཞག་སྟེ་གཞུང་འབྲེལ་མཆོད་འབུལ་སྨོན་ལམ་ཚོགས་གནང་བའི་སྐོར། ལིའུ་ཞའོ་པོ་དམ་པ་ཁོང་ང་ཚོ་དང་གཏན་དུ་བྲལ་ཟིན་ན་ཡང་། ཁོང་སྐུ་འཚོ་བཞུགས་སྐབས་ཀྱི་གཞན་ཕན་གྱི་དགོངས་པ་དང་། སྙིང་སྟོབས་སོགས་འཛིན་སྐྱོང་དར་སྤེལ་གནང་རྒྱུ་ནི་ཧ་ཅང་གི་གལ་ཆེ་ཡིན་པ་བཅས་ཀྱི་སྐོར་གསུང་ནས་ལིའུ་ཞའོ་པོ་ཡི་ཞུམ་པ་མེད་པའི་སྙིང་སྟོབས་དང་། ཀུན་ཁྱབ་རིན་ཐང་ལ་བརྩི་མཐོང་། སྤྱི་ལ་སྨན་པའི་ལྷག་བསམ་བཅས་ལ་ཚད་མཐོའི་གདེང་འཇོག་གནང་བ་མ་ཟད། ལུས་སེམས་གཉིས་ཀྱི་དཀའ་ངལ་འཕྲད་བཞིན་པའི་ཁོང་གི་སྐུ་ཟླ་ལིའུ་ཞྭ་ལ་གསར་འགོད་པ་རྣམས་བརྒྱུད་ཐུགས་གསོའི་འཚམས་འདྲི་ཡང་གནང་ཡོད།

<<ལིའུ་ཞའོ་པོ་རྗེས་དྲན་རྩོམ་ཡིག་ཕྱོགས་སྒྲིག>> ཞེས་པའི་ཕྱག་དེབ་དཔར་བསྐྲུན་འགྲེམས་སྤེལ་གྱི་གཙོ་འགན་བཞེས་མཁན་སྐུ་ཞབས་ཚལ་གྲུ་ Cai Chu ཡིས་ཕྱག་དེབ་ངོ་སྤྲོད་ཀྱི་གསུང་བཤད་གནང་སྐབས། ༸གོང་ས་༸སྐྱབས་མགོན་ཆེན་པོ་མཆོག་ནས་ལིའུ་ཞའོ་པོ་ལ་རྗེས་དྲན་གྱི་ཕྱག་དེབ་གསར་པར་སྔོན་གླེང་སྩལ་གནང་བར་དམིགས་བསལ་གྱི་ཐུགས་རྗེ་ཆེ་ཞུས་ཡོད་པ་དང་། ཕྱག་དེབ་གསར་པ་དེའི་ནང་རྩོམ་ཡིག་སྣ་ཚོགས་གྲངས་ ༩༡ ཙམ་བསྡུས་ཡོད་པའི་ཁྲོད་རྩོམ་ཡིག་གྲངས་ ༣༠ ཙམ་རྒྱ་ནག་ནང་དུ་ཡོད་པའི་རྒྱ་རིགས་ཤེས་ཡོན་ཅན་ཚོས་བྲིས་པ་ཞིག་ཡིན་འདུག

བྱང་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཀུན་དགའ་བཀྲིས་ལགས་ཕེབས་བཅར་ཞུས་ཡོད་པ་དང་། ཕྱག་དེབ་དབུ་འབྱེད་ཀྱི་མཛད་སྒོ་གྲུབ་རྗེས་ལིའུ་ཞའོ་པོ་ཡི་མཛད་རྗེས་སྐོར་རྒྱ་སྐད་ནང་བགྲོ་གླེང་ཚོགས་འདུ་ཞིག་ཡོད་པ་དེར་རྒྱ་རིགས་འབྲེལ་མཐུད་པ་མུ་མཐུད་མཉམ་ཞུགས་གནང་ཡོད་པ་བཅས།།

གསར་གནས།