ཕྱི་ལོ་ ༢༠༡༧ ཟླ་ ༡༢ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༧ ཟླ་ ༡༢ ཚེས་ ༡ ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དབུ་མའི་ལམ་གྱི་ལས་འཆར་གོ་སྒྲིག་ཚན་པའི་ལས་འཆར་བཀོད་སྒྲིག་ལྟར། རྡ་ས་གངས་སྐྱིད་གཉའ་ཁྲི་ཚོགས་ཁང་ནང་ཕྱི་དྲིལ་ལས་ཁུངས་ཀྱི་ལས་བྱེད་བཅུ་བདུན་ཙམ་ལ་དབུ་མའི་ལམ་གྱི་སྲིད་བྱུས་སྐོར་གོ་རྟོགས་སྤེལ་སྟངས་སྐོར་ཟབ་ཁྲིད་པར་ཟབ་སྦྱོང་ཞིག་གནང་འགོ་ཚུགས་སོང་།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ ཐོག་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་དང་། དྲིལ་བསྒྲགས་དྲུང་ཆེ་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས། དབུ་མའི་ལམ་གྱི་ལས་འཆར་གོ་སྒྲིག་ཚན་པའི་འགན་འཛིན་བསོད་ནམས་བཟང་མོ་ལགས། ཟབ་སྦྱོང་གནང་མཁན་ཕྱི་དྲིལ་དྲུང་ལས་སྐལ་ལྡན་མཚོ་མོ་ལགས་དང་འཇམ་དཔལ་གཞོན་ནུ་ལགས། ཟབ་སྦྱོང་བ་བཅས་ལྷན་འཛོམས་ཀྱི་ཐོག་མར་དབུ་མའི་ལམ་གྱི་ལས་འཆར་གོ་སྒྲིག་ཚན་པའི་འགན་འཛིན་བསོད་ནམས་བཟང་མོ་ལགས་ཀྱིས་ཐེངས་འདིའི་ཟབ་སྦྱོང་གི་དགོས་དམིགས་གཙོ་བོ་ཁག་ངོ་སྤྲོད་གནང་གྲུབ་མཚམས་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལགས་ཀྱིས་འཚམས་འདྲི་དང་འབྲེལ་གསུང་བཤད་གནང་དོན། བོད་རྒྱ་དཀའ་ངལ་སེལ་རྒྱུའི་སྲིད་བྱུས་ནི་དབུ་མའི་ལམ་གྱི་ཐོག་ནས་གཏན་འབེབས་གནང་བ་ཞིག་ཡིན་པར་བརྟེན། བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཡོངས་ལ་གོ་རྟོགས་ཡག་པོ་ཡོད་པའི་ཐོག་ནས་མང་ཚོགས་དང་གསར་འགོད་པ། ཕྱི་རྒྱལ་མི་རིགས་སོགས་ལ་འགྲེལ་བཤད་རྒྱག་དགོས་ཀྱི་ཡོད་ནའང་རེད། གཞུང་ཞབས་པ་ཞིག་ཡིན་པའི་ཆ་ནས་དབུ་མའི་ལམ་གྱི་སྐོར་ཡག་པོ་ཤེས་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ལྷག་པར་འཛམ་གླིང་ཡོངས་ལ་འབྲེལ་བ་བྱེད་མཁན་ཕྱི་དྲིལ་ལས་ཁུངས་ཡིན་སྟབས། ཕྱི་དྲིལ་ལས་ཁུངས་ཀྱི་ལས་བྱེད་ཚང་མས་དབུ་མའི་ལམ་ཟེར་ན་གང་རེད། ཅེ་ན་ཚང་མས་འགྲེལ་བཤད་ཡག་པོ་རྒྱག་ཐུབ་པ་དང་དབུ་མའི་ལམ་གྱི་སྐོར་དྲི་བ་ཡོངས་ལ་ལན་རྒྱག་ཐུབ་པ། མཐོང་ཐོས་མྱོང་གསུམ་དགོས་རྒྱུ་ཧ་ཅང་གལ་ཆེན་པོ་རེད།
ང་ཚོས་སྤྱིར་བཏང་ཟབ་སྦྱོང་གནང་བ་ནང་བཞིན་མིན་པར་གཏིང་ཟབ་པོ་འགྲོ་དགོས་རྒྱུ་ཧ་ཅང་གལ་ཆེན་པོ་རེད། དཔེར་ན། དབུ་མའི་ལམ་གྱི་ངོ་བོ་དང་བྱུང་རིམ་སོགས་ཆ་ཚང་མཁྱེན་པའི་ཐོག་ནས་མ་འོངས་པར་བོད་རྒྱ་ཞི་མོལ་བྱེད་ནས་དཀའ་ངལ་སེལ་བར་ད་ཆ་འགག་རྩ་ག་བར་ཐུག་འདུག ད་ཆ་དབུ་མའི་ལམ་གྱི་སྲིད་བྱུས་ཐོག་ནས་མཐུན་བསྐྱོད་མ་ཐུབ་པར་ལྷག་པའི་རྒྱུ་མཚན་གང་རེད། འདི་དག་ཡག་པོ་མཁྱེན་དགོས་རྒྱུ་ཧ་ཅང་གལ་ཆེན་པོ་རེད། འདི་མེད་པར་བཟོ་བར་བོད་མིའི་སྒྲིག་འཛུགས་དང་མི་མང་། ཚོགས་པ་ཁག་ནས་གང་བྱེད་དགོས་འདུག བོད་པའི་དཀའ་ངལ་སེལ་བར་འགག་རྩ་་ག་བར་ཐུག་འདུག འགག་རྩ་སེལ་བར་གང་བྱེད་དགོས་འདུག དེ་དག་སྐོར་ཟབ་སྦྱོང་གནང་བའི་སྐབས་ way Foward ཞེས་ཡོད།
ཁ་ནས་དབུ་མའི་ལམ་གཞིར་བཞག་ཐོག་བོད་རྒྱ་དཀའ་ངལ་སེལ་རྒྱུ་ཞེས་པ་ཙམ་གྱི་འགྲིག་ཐབས་མེད། ཁ་ཡོད་ལག་ཡོད་དཀའ་ལས་རྒྱག་སྟེ་བོད་རྒྱ་དཀའ་ངལ་སེལ་ཐབས་བྱེད་དགོས། ཅིའི་ཕྱིར་བོད་རྒྱ་དཀའ་ངལ་སེལ་དགོས་པ་དེ་དག་ཧ་ཅང་གལ་ཆེན་པོ་རེད་དྲན་གྱི་འདུག འདིའི་སྐོར་དྲི་བ་ཧ་ཅང་མང་པོ་ཡོད། རྣམ་པ་ཚོས་གོ་བསྡུར་སྦྱང་བཤད་ལྷུག་པོ་གནང་སྟེ་ཟབ་སྦྱོང་ཙམ་མིན་པར་མ་འོངས་པར་བོད་རྒྱ་དཀའ་ངལ་མགྱོགས་ནས་མྱུང་དུ་སེལ་ཐུབ་པའི་ཐབས་ཤེས་དང་ལམ་ཀ་གང་འདུག་དེ་དག་དགོངས་པ་བཞེས་དགོས་རྒྱུ་ཧ་ཅང་གལ་ཆེན་པོ་རེད་དྲན་གྱི་འདུག ཅེས་སོགས་ཀྱི་གསུང་བཤད་གནང་རྗེས་དྲིལ་བསྒྲགས་དྲུང་ཆེ་ཚད་མཉམ་ཤར་གླིང་བསྟན་འཛིན་ཟླ་སྒྲོན་ལགས་ཀྱི་གསུང་བཤད་གནང་དོན། ཕྱི་དྲིལ་ལས་ཁུངས་ནས་དབུ་མའི་ལམ་གྱི་སྐོར་སྔར་ལྷག་གོ་རྟོགས་སྤེལ་སླད་ས་གནས་ཁག་མང་པོར་འགྲོ་གི་ཡོད་པ་རེད། ང་རང་ཡིན་ནའང་དབུ་མའི་ལམ་སྐོར་ལ་དོ་སྣང་ཤུགས་ཆེན་པོ་ཞིག་བསླེབས་སོང་། ངས་ག་རེ་སྙིང་རྗེ་མོ་མཐོང་སོང་ཞུས་པ་ཡིན་ན། ཟབ་སྦྱོང་གནང་ས་དེ་རྒན་གཞོན་བར་གསུམ་ཚང་མ་རེད་འདུག སྐབས་དེ་དུས་ང་རང་སྤྱི་འཐུས་ཤིག་ཡིན་པའི་ཆ་ནས་ང་ལ་བསམ་ཚུལ་ཞིག་བསླེབས་སོང་། དབུ་མའི་ལམ་སྲིད་བྱུས་གཏན་འབེབས་གནང་ནས་ལོ་བཅུ་བདུན་བཅོ་བརྒྱད་ཙམ་འགྲོ་གི་ཡོད། འོན་ཀྱང་ང་ཚོས་མང་ཚོགས་ལ་དབུ་མའི་ལམ་གྱི་སྐོར་ལ་ངོ་སྤྲོད་དང་། སློབ་གསོ་རྒྱག་དགོས་རྒྱུ་བཅས་གང་ལ་ཐུག་ཡོད་ནམ་ཞེས་པ་དེ་དྲི་བ་གནད་འགག་ཆེན་པོ་རེད།
རྒྱལ་ཁབ་གཅིག་གི་སྲིད་བྱུས་དང་འཐབ་རྩོད་ཅིག་གི་སྲིད་བྱུས་ཡིན་ན་ཕྲུག་གུ་ལོ་ལྔ་ནས་དེ་སྐོར་ཤེས་དགོས་རེད་བསམ་གྱི་འདུག ཕྲུ་གུའི་ཕ་མ་དང་ང་ཚོ་ཚང་མར་འགན་ཡོད་རེད་བསམ་གྱི་འདུག ཁ་སང་བསོད་ནམས་ལགས་དང་ངེད་གཉིས་དབར་གོ་བསྡུར་བྱུང་། དབུ་མའི་ལམ་དེ་སྲིད་བྱུས་ཤིག་རེད། འཐབ་བྱུས་ཤིག་རེད། དེའི་སྙིང་དོན་ནི་རྒྱ་ནག་དང་མཉམ་དུ་བཀའ་མོལ་གནང་རྒྱུ་དེ་རེད། བཀའ་མོལ་དེའི་སྙིང་དོན་ནི་རྒྱ་ནག་དང་མཉམ་དུ་བཀའ་མོལ་གནང་རྒྱུ་དེ་རེད། བཀའ་མོལ་ཟེར་བ་དེ་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་དབུས་འཐབ་ཕྱོགས་གཅིག་གྱུར་གྱི་སྐུ་ཚབ་གཅིག་པོའི་དབར་ལ་མ་རེད། དེང་སང་ང་ཚོས་དྲ་ཐོག་ནས་བཀའ་མོལ་གནང་རྒྱུ་ཡོད་པ་རེད། དབུ་མའི་ལམ་གྱི་སྐོར་ཤེས་དགོས་ན་བོད་ཀྱི་ལོ་རྒྱུས་སྐོར་གོ་རྟོག་སྤེལ་རྒྱུ་ཧ་ཅང་གལ་ཆེན་པོ་རེད་འདུག ཅེས་སོགས་ཀྱི་གསུང་བཤད་གནང་། །
