༢༠༡༧ ཟླ་ ༡༢ ཚེས་ ༢༩ རེས་གཟའ་པ་སངས།
༄༅། །འདི་གར་ཆོས་རིག་ལས་ཁུངས་ནས་བཏང་གནས་ནང་འཁོད་དོན། དཔལ་ལྡན་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་ཕྱི་ལོ ༢༠༡༨ ཟླ་ ༡ ཚེས་ ༡ ཉིན་ཝཱ་ཎཱ་དབུས་བོད་ཀྱི་གཙུག་ལག་སློབ་གཉེར་ཁང་དབུ་བརྙེས་ནས་ལོ་ངོ་ཧྲིལ་པོ་ ༥༠ འཁོར་བའི་དུས་སྟོན་སྲུང་བརྩིིའི་ཐོག་སྐུ་མགྲོན་དུ་གདན་ཞུས་ལྟར་ཆེད་ཕེབས་གནང་གཏན་འཁེལ་ཡོད།
དེ་ཡང་དཔལ་ལྡན་བཀའ་བློན་མཆོག་ཕྱི་ཟླ་ ༡༢ ཚེས་ ༣༠ དང་ ༣༡ ཉིན་གཉིས་རིང་ཝཱ་ཎཱ་མཐོ་སློབ་ནས་གོ་སྒྲིག་ཞུས་པའི་ ” རྒྱ་གར་གྱི་གྲུབ་མཐའ་སྨྲ་བ་ཁག་དང་། དེང་རབས་ཚན་རིག་པ་བཅས་ཀྱི་ནང་སེམས་དང་སེམས་ཀྱི་བྱེད་ལས་ ” ཐོག་བགྲོ་གླེང་ལས་རིམ་ནང་མཉམ་ཞུགས་དང་།
ཕྱི་ཚེས་ ༢ ནས་ ༩ བར་དེ་གའི་ཁུལ་དུ་ཡོད་པའི་བོད་ཀྱི་དགོན་སྡེ་ཁག་ཅིག་ཏུ་འཚམས་གཟིགས་དང་། ཆོས་རིག་ལས་ཁུངས་ཀྱིས་འགན་འཁུར་འོག་ནང་པའི་གནས་ཆེན་ཁག་ཏུ་གསར་བཞེངས་ལེགས་གྲུབ་བྱུང་བའི་མཆོད་རྟེན་ཁག་ཅིག་ཏུ་འཚམས་གཟིགས་གནང་རྒྱུ་བཅས་ཡིན་པ་བཅས།།
