༢༠༡༧ ཟླ་ ༡༢ ཚེས་ ༤ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ ༢༠༡༧ ཟླ་ ༡༢ ཚེས་ ༤ ཉིན་བཏང་གནས་ནང་འཁོད་དོན། རྒྱ་ནག་གཞུང་གིས་བོད་མིའི་ཐོག་གདུག་རྩུབ་ཅན་གྱི་སྲིད་བྱུས་ལག་བསྟར་བྱས་དང་བྱེད་མུས་ཡིན་པར་བརྟེན། ཕྱི་ལོ་ ༢༠༡༧ ཟླ་ ༡༡ ཚེས་ ༢༦ ཉིན་བོད་དཀར་མཛེས་རྫོང་མདའ་མདོ་གྲོང་ཚོ་ནས་ཡིན་པ་རང་ལོ་ ༦༣ ལ་ཕེབས་པའི་དགེ་འདུན་པ་བསྟན་དགའ་ལགས་ཀྱིས་བོད་དང་བོད་མིའི་རྩ་དོན་སླད་རྒྱ་ནག་གཞུང་ལ་ཞི་རྒོལ་ཆེད་དཀར་མཛེས་རྫོང་ཐོག་ཏུ་རང་དབང་དགོས་ཞེས་སྐད་འབོད་ཀྱིས་རང་ལུས་མེར་སྲེག་བཏང་སྟེ་འདས་གྲོངས་སོང་བའི་ཡིད་སྐྱོའི་གནས་ཚུལ་ཐོན་པར།
ཐེ་ཝན་བོད་ཀྱི་སྐུ་ཚབ་དོན་གཅོད་ཁང་དང་། ཐེ་སྡོད་བོད་རིགས་ཚོགས་པ། ས་གནས་བོད་ཀྱི་གཞོན་ནུ་བཅས་ཀྱིས་ཐེ་ཝན་གྱི་རྒྱལ་ས་ཐེ་པེ་རང་དབང་ཐང་ཆེན་དུ་བོད་ཀྱི་ལོ་རྒྱུས་ངོ་སྤྲོད་ཀྱི་འགྲེམས་སྟོན་དང་བསྟུན་ཕྱི་ཟླ་ ༡༢ ཚེས་ ༢ ཉིན་རྒྱལ་གཅེས་དཔའ་བོ་བསྟན་དགའ་ལགས་ཀྱི་བདུན་ཚིགས་དང་པོ་སྲུང་བརྩི་ཞུས་ཡོད་པ་རེད། དེ་ཉིན་དགོང་དྲོ་ཆུ་ཚོད་ ༧ པའི་ཐོག་ཐེ་སྡོད་བོད་མི་སེར་སྐྱ་དང་། བོད་དོན་རྒྱབ་སྐྱོར་གནང་མཁན་མི་གྲངས་ལྔ་བཅུ་ལྷག་མཉམ་ཞུགས་ཀྱིས་ཐོག་མར་ཐེ་སྡོད་བོད་རིགས་ཚོགས་པའི་ཚོགས་གཞོན་བློ་བཟང་ཚེ་དབང་ལགས་ཀྱིས་མཆོད་འབུལ་སྨོན་ལམ་གོ་སྒྲིག་ཞུ་དགོས་པའི་སྐོར་ངོ་སྤྲོད་གནང་བ་དང་། ཐེ་ཝན་དོན་གཅོད་ཟླ་བ་ཚེ་རིང་ལགས་ཀྱིས་བོད་མིས་རང་ལུས་མེར་སྲེག་གི་ལམ་ནས་རྒྱ་ནག་གཞུང་ལ་ཞི་རྒོལ་བྱེད་པའི་སྐོར་ངོ་སྤྲོད་གནང་རྗེས། དམ་པ་ཁོང་གི་སྐུ་པར་མདུན་མར་མེ་བརྒྱ་ཚར་བཤམས་འབུལ་གྱིས་ཆུ་ཚོད་གཅིག་རིང་སྨོན་ལམ་གསུང་འདོན་དང་། མ་ཎི་གྲངས་གསོག་གྲུབ་རྗེས་བོད་རིགས་ཚོགས་པའི་དྲུང་ཆེ་བསྟན་འཛིན་རྣམ་དག་ལགས་ཀྱིས་ཚོགས་ཞུགས་ཡོངས་ལ་ཐུགས་རྗེ་ཆེ་ཞུས་ཏེ་སྨོན་ལམ་མཇུག་སྒྲིལ་གནང་ཡོད་པ་བཅས།།
