༢༠༡༧ ཟླ་ ༡༢ ཚེས་ ༢༢ རེས་གཟའ་པ་སངས།
བོད་དོན་ལས་འགུལ་སྤེལ་སྐབས།
༄༅། །ཨ་རིའི་ཕི་ལ་ཌེལ་ཕི་མངའ་སྡེའི་ནང་ Philadelphia བཅའ་བཞུགས་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཟུར་པ་དང་བཀའ་ཟུར་སྐུ་ངོ་ཞེ་བོ་བློ་བཟང་དར་རྒྱས་མཆོག་གིས་ཨ་སྒོར་ ༢༠༠༠༠ བོད་མིའི་སྒྲིག་འཛུགས་ལ་ཞལ་འདེབས་གནང་འདུག དེ་ཡང་ཉེ་ཆར་ཨ་རིའི་གྲོང་ཁྱེར་ནིའུ་ཡོག་ཏུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུ་ཁྲིད་པའི་བོད་དོན་གདུང་སེམས་མཉམ་སྐྱེའི་གཞི་རྒྱ་ཆེ་བའི་ལས་འགུལ་སྤེལ་སྐབས་སྐུ་ངོ་བཀའ་ཟུར་མཆོག་མཉམ་ཞུགས་གནང་བ་མ་ཟད།
༸གོང་ས་སྐུ་ཕྲེང་རིམ་བྱོན་གྱིས་དབུ་ཁྲིད་པའི་བོད་གཞུང་ནས་ཁོང་གི་མི་བརྒྱུད་དང་བཅས་པར་གཟིགས་སྐྱོང་བཀའ་དྲིན་བླ་མེད་དུ་ཆེ་བར་བརྟེན་ད་ལམ་བཀའ་དྲིན་ཆ་ཤས་ཙམ་གསབ་སླད། ཨ་སྒོར་ ༢༠ ༠༠༠ ཐམ་པ་ཞལ་འདེབས་སུ་ཕུལ་བ་བརྒྱུད་དངུལ་འབོར་དེ་དག་དཔལ་ལྡན་སྲིད་སྐྱོང་མཆོག་གིས་ཐུགས་མཁོ་གང་འོས་སུ་གཏོང་གནང་ཡོང་བ་ཞེས་ཞུས་པར། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུས་བཀའ་ཤག་ནས་བཀའ་ཟུར་ཞེ་བོ་བློ་བཟང་དར་རྒྱས་མཆོག་ལ་ལེགས་གསོའི་སྔགས་བརྗོད་དང་འབྲེལ་ཐུགས་རྗེ་ཆེ་ཞུས་ཡོད་པ་བཅས། །
