༢༠༡༧ ཟླ་ ༡༢ ཚེས་ ༢༩ རེས་གཟའ་པ་སངས།
༄༅། །འདི་གའི་ཆེད་གཉེར་གསར་འགོད་པ་ངག་དབང་ཐོགས་མེད་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༡༢ ཚེས་ ༢༩ ཉིན་གུང་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྟོན་པ་བཅོམ་ལྡན་འདས་ཀྱིས་བཀའ་དང་པོ་བདེན་བཞིའི་ཆོས་འཁོར་བསྐོར་སའི་གནས་མཆོག་ཁྱད་པར་ཅན་དྲང་སོང་ལྷུངས་བ་རི་དྭགས་ཀྱི་ནགས་ཀྱི་ཉེ་འགྲམ་དུ་རྟེན་གཞི་བྱས་པའི་ཝཱ་ཎཱ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་དུ་༸ཞབས་སོར་བདེ་བར་འཁོད་གནང་མཛད་རྒྱུ་དང་།
སློབ་དཔོན་ཆེན་མོ་དགེ་བཤེས་ཡེ་ཤེས་ཐབས་མཁས་མཆོག
མཛད་འཆར་ལྟར་ན་ཕྱི་ལོ་གསར་པའི་ཚེས་ ༡ ཉིན་གྱི་སྔ་དྲོ་གཙུག་ལག་སློབ་གཉེར་ཁང་གི་ལྔ་བཅུའི་དུས་དྲན་སྲུང་བརྩི་ཞུ་སྐབས་གཙུག་ལག་སློབ་གཉེར་ཁང་གི་འདོན་སྤེལ་ཞུས་པའི་ཕྱག་དེབ་གསར་པ་གྲངས་ ༢༢ སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེངས་འདིར་ཞལ་ཕྱེ་མཛད་གཏན་འཁེལ་འདུག
འབུམ་རམས་པ་པདྨ་བསྟན་འཛིན་ལགས།
དེ་ཡང་འདི་གའི་གསར་འགོད་པས་གཙུག་སློབ་གཉེར་ཁང་གི་དཔེ་དེབ་པར་སྐྲུན་སྡེ་ཚན་གྱི་འགན་འཛིན་འབུམ་རམས་པ་པདྨ་བསྟན་འཛིན་ལགས་ཀྱིས་དེའི་སྐོར་འགྲེལ་བརྗོད་གནང་དོན།
བློ་བཟང་ནོར་བུ་ཤཱསྟྲི་ལགས།
སྤྱིར་ནོར་༸གོང་ས་༸སྐྱབས་མགོན་ཆེན་པོ་མཆོག་ལོ་ཤས་མཚམས་ནང་གཙུག་ལག་སློབ་གཉེར་ཁང་དུ་ཆིབས་སྒྱུར་བཀའ་དྲིན་སྐྱོང་སྐབས་སློབ་གཉེར་ཁང་གིས་པར་སྐྲུན་ཞུས་པའི་ཕྱག་དེབ་ཁག་ཞལ་ཕྱེ་མཛད་རྒྱུར་ངང་སྒུག་ཞུ་བཞིན་ཡོད།
བེ་རི་དགེ་བཤེས་འཀིགས་མེད་དབང་རྒྱལ་ལགས།
ཕྱི་ལོ་ ༢༠༡༣ ལོར་གཙུག་ལག་སློབ་ཁང་དུ་ཐེངས་ཤིག་ཆིབས་སྒྱུར་བསྐྱངས་ཡོད། སྐབས་དེར་ ༢༠༡༡ ནས་ ༢༠༡༣ བར་གཙུག་ལག་སློབ་ཁང་གིས་པར་སྐྲུན་ཞུས་པའི་ཕྱག་དེབ་ཁག་༸གོང་ས་ཆེན་པོས་ཞལ་ཕྱེ་མཛད་ཡོད། ད་ཐེངས་ཕྱི་ལོ་ ༢༠༡༤ ནས་ཕྱི་ལོ་ ༢༠༡༧ བར་པར་སྐྲུན་ཞུས་པའི་ཕྱག་དེབ་ཁག་ཞལ་ཕྱེ་མཛད་རྒྱུར་ཇི་ལྟར་སྔོན་ནས་གསོལ་འདེབས་ཞུ་དོན་ལྟར་ཞལ་ཕྱེ་མཛད་རྒྱུའི་བཀའ་བཞེས་བཟང་པོ་སྨིན་སྩལ་ཐོབ་ཡོད། ཅེས་གསུངས།
གཙུག་ལག་སློབ་དཔོན་བློ་བཟང་བསྟན་འཛིན་རིན་པོ་ཆེ།
ཐེངས་འདིར་༸གོང་ས་༸སྐྱབས་མགོན་ཆེན་པོ་མཆོག་གིས་ཞལ་ཕྱེ་མཛད་རྒྱུའི་ཕྱག་དེབ་ཆེ་ཆུང་གྲངས་ ༢༢ ཡོད་ཁོངས་ནས་དམིགས་བསལ་གང་ཡོད་མིན་ཐད་འབུམ་རམས་པ་པདྨ་བསྟན་འཛིན་ལགས་ཀྱིས་གསུང་དོན།
གཙུག་ལག་སློབ་དཔོན་བྱམས་པ་བསམ་གཏན་ལགས།
ཕྱག་དེབ་དེ་དག་ཁྲོད་དམིགས་བསལ་བ་ཞིག་གང་ཡོད་བརྗོད་ན། གཙུག་ལག་སློབ་གཉེར་ཁང་གི་སློབ་དཔོན་ཆེན་པོ་དགེ་བཤེས་ཡེ་ཤེས་ཐབས་མཁས་མཆོག་གིས། རྗེ་ཙོང་ཁ་པ་ཆེན་པོའི་དྲང་ངེས་ལེགས་བཤད་སྙིང་པོའི་ཐོག་ལ་དགེ་ལྡན་པའི་ལུགས་ཀྱི་མཁས་པ་ཁག་གི་འགྲེལ་བ་དང་དཀའ་གནད། དོག་གཅོད་སོགས་མང་པོ་ཞིག་ཡོད་པ་རྣམས་ཕྱོགས་བསྡུས་དང་ཞུ་སྒྲིག་གནང་ཡོད། དེར་ང་ཚོས་དྲང་ངེས་ཀྱི་པོད་ཕྲེང་། ཞེས་ལོགས་སུ་ཡོད་པ་འདི་གསར་གཏོད་གཅིག་ཡིན།
ད་ཐེངས་པོད་ཕྲེང་ ༡༤ རེད། དམིགས་བསལ་དེབ་གཞན་ཞིག་ནི་ཇོན་ཝིན་སེན་བྷེ་ལེ་ཛ་ John Vincent Bellezza ཞེས་པ་ཨུ་རུ་སུའི་མི་རིགས་ཡིན་པ་ཁོང་གིས་གཙོ་བོ་བོད་ཀྱི་འདམ་གཞུང་ས་ཁུལ་དུ་ཕེབས་ནས་པར་ཧ་ཅང་མང་པོ་བརྒྱབ་འདུག དེབ་དེའི་མིང་ལ་ Antiquities Of Zhang Zhung ཞེས་བོད་སྒྱུར་ཞུས་ན། ཞང་ཞུང་གནའ་བཤུལ་དངོས་རྫས། ཞེས་དང་། དེབ་དེའི་ནང་ལྷ་ཁང་དང་དགོན་པ། མཆོད་རྟེན་རྙིང་པ་སོགས་ཡོངས་རྫོགས་པ་བརྒྱབ་པ་མ་ཟད། ས་གནས་ཡུལ་མིའི་སྡོད་ཁང་དང་རང་བྱུང་ཁོར་ཡུག་སོགས་པར་བརྒྱབ་ནས་འགྲེལ་བཤད་ཧ་ཅང་ཞིབ་ཕྲ་ཡོད་པ་ཞིག་རེད།
དེར་བརྟེན་དེབ་དེ་ཡང་ང་ཚོས་ཧ་ཅང་གལ་ཆེན་པོར་བརྩི་བཞིན་ཡོད། དེབ་ཕྲེང་གཉིས་ཡོད། ཞང་ཞུང་ལོ་རྒྱུས་ལ་དཔྱད་པ་གནང་མཁན་ཚོར་ཕན་ཐོགས་ཧ་ཅང་ཡོང་ངེས།
དེ་བཞིན་གསོ་རིག་དང་འབྲེལ་བའི་དེབ། ཙ་ར་ཀའི་བསྡུ་བ། ཞེས་པ་དྲང་སོང་ཙ་ར་ཀས་མཛད་པའི་གཞུང་ཞིག་ཡོད། སྨན་གཞུང་དེ་ལེགས་སྦྱར་སྐད་ནང་བཞུགས་སུ་གསོལ་ཡོད། དེར་ལེའུ་ ༣༠ འདུག
འོན་ཀྱང་བོད་སྐད་ནང་སྔ་མོ་མེད། གཙུག་ལག་སློབ་ཁང་གི་སྨན་གྱི་སྡེ་ཚན་གྱི་གཙུག་ལག་སློབ་དཔོན་བློ་བཟང་བསྟན་འཛིན་ལགས་དང་སྒྲ་སྒྱུར་སྡེ་ཚན་གྱི་བློ་བཟང་ནོར་བུ་ཤཱསྟྲི་ལགས་ཁོང་གཉིས་ནས་བོད་སྒྱུར་ཞུས་པ་རེད། པོད་དང་པོ་ལེའུ་ ༡༥ དེ་ཕྱི་ལོ་ ༢༠༡༣ ལོར་༸གོང་ས་མཆོག་གིས་དབུ་འབྱེད་མཛད་ཟིན་ཡོད། པོད་གཉིས་པ་ལེའུ་ལྷག་མ་ ༡༥ འདི་ཕྱི་ལོ་ ༢༠༡༥ ལོར་ཡོངས་སུ་ལེགས་གྲུབ་བྱུང་བར་བརྟེན་ཐེངས་འདིར་དབུ་འབྱེད་མཛད་གཏན་འཁེལ་ཡོད། འདི་ཡང་བྱས་རྗེས་ཆེན་པོ་ཞིག་རེད། བོད་སྐད་ནང་སྔར་མེད་པའི་གཞུང་ཞིག་བསྒྱུར་བ་ཆགས་ཡོད། སྨན་གཞུང་ནང་སློབ་ཚན་འཕར་མ་ཞིག་ཀྱང་ཆགས་ཡོད།
དེ་བཞིན་དེབ་གཞན་ཁག་གཅིག་ཧིན་དུ་མཐོ་སློབ་ BHU ཀྱི་སློབ་དཔོན་ཚོས་བརྩམས་པའི་ནང་པའི་གཞུང་ཆུང་ཆུང་དེ་འདྲ་འབྲི་རྩོམ་གནང་བ་དེ་དག་ང་ཚོའི་གཙུག་ལག་སློབ་ཁང་འདི་ནས་པར་སྐྲུན་བྱ་རྒྱུར་འདོད་པ་ཧ་ཅང་གནང་བཞིན་ཡོད། གང་ཡིན་བརྗོད་ན་གཙུག་ལག་སློབ་ཁང་འདི་ནས་ཐོན་པའི་ཕྱག་དེབ་ཁག་ལ་གདེང་འཇོགས་ཆེན་པོ་གནང་སྲོལ་ཡོད། དེར་བརྟེན་ཕྱིའི་རྩོམ་པ་པོ་ཚོས་རང་ཉིད་ཀྱིས་བྲིས་པའི་དེབ་དེ་དག་ང་ཚོར་པར་སྐྲུན་གནང་རོགས། ཞེས་འབོད་སྐུལ་བྱེད་བཞིན་པ་ལྟར་ཐེངས་འདིར་དེབ་ཆུང་དེ་རིགས་ཁག་གཅིག་ཀྱང་༸གོང་ས་མཆོག་གིས་དབུ་འབྱེད་མཛད་གཏན་འཁེལ་ཡོད།
ཕྱོགས་མཚུངས་ལ་དྭགས་མཚན་ཉིད་སློབ་གྲྭའི་སློབ་སྤྱི་འབུམ་རམས་པ་བཀྲ་ཤིས་དཔལ་འབྱོར་ལགས་ལེགས་སྦྱར་མཐོ་སློབ་ Sanskrit University ཏུ་ཉམས་ཞིབ་གནང་རིང་བྲིས་པའི་ཕྱག་དེབ་གཅིག་ཀྱང་ཡོད། ལེགས་སྦྱར་སྐད་ནས་ཁོང་གིས་ཧིན་སྐད་དུ་ཕབ་སྒྱུར་གནང་བ་ཞིག་རེད་འདུག དེའི་མཚན་བྱང་ནི། ཐེག་ཆེན་གྱི་སྒྲུབ་པ་དང་སྐུའི་རྣམ་གཞག ཞེས་འཁོད། ཕྱི་ལོ་ ༢༠༡༥ ལོར་པར་སྐྲུན་ཐུབ་པ་བྱུང་། དེབ་ཧ་ཅང་ཡག་པོ་འདུག ལྷག་པར་རྒྱ་གར་བ་ཚོར་ཕན་ཐོགས་ཆེན་པོ་ཡོང་བ་འདུག
དེ་ནས་ཕྱག་དེབ་གཅིག་ནི་དཔལ་ལྡན་ཟླ་བ་གྲགས་པའི་དབུ་མ་འཇུག་པ་སེམས་བསྐྱེད་ ༦ རང་འགྲེལ་དང་བཅས་པ་བོད་ཡིག་ནས་ངས་ཧིན་སྐད་ནང་བསྒྱུར་བ་ཡིན། དབུ་མ་འཇུག་པའི་རྩ་བ་ལེགས་སྦྱར་སྐད་ནང་ཡོད་པ་དེ་བོད་ནས་རྒྱ་ནག་དང་། རྒྱ་ནག་ནས་ཕྱི་རྒྱལ་ཨོ་སི་ཊི་ཡའི་ Austria ནང་འབྱོར་འདུག དེར་བརྟེན་ལེགས་སྦྱར་སྐད་ཐོག་བསྐྱར་གསོ་དགོས་དོན་མེད་སྟབས་ངས་ཧིན་སྐད་ནང་ཕབ་སྒྱུར་ཞུས་པ་ཡིན། དབུ་མ་པའི་ལྟ་བའི་དཀའ་གནད་ཧ་ཅང་རྒྱས་པོ་ཡོད། ལྷག་པར་ཕྱག་དེབ་དེར་གླེང་བརྗོད་ལ་མཚོན་ན་དབུ་མའི་སྐོར་ཧ་ཅང་རྒྱས་པོ་བྲིས་ཡོད། ལོ་མང་དཀའ་ལས་བརྒྱབ་རྗེས་ན་ནིང་ལོར་པར་དུ་བཀོད་ཐུབ་པ་བྱུང་།
གཞན་ཡང་གཙུག་ལག་སློབ་ཁང་གི་རྒྱལ་རབས་སློབ་དཔོན་བྱམས་པ་བསམ་གཏན་ལགས་ཀྱིས་བྲིས་གནང་བའི་དཀར་ཆགས་སྐོར་ཕྱག་དེབ་གཅིག་ཡོད། དེའི་མཚན་བྱང་དུ། ༼བཅོམ་ལྡན་འདས་བདེ་བར་གཤེགས་པ་ཤཱཀྱ་ཐུབ་པའི་བཀའ་དང་། དེའི་དགོངས་འགྲེལ་གྱི་བསྟན་བཅོས་བོད་ཀྱི་སྐད་དུ་འགྱུར་རོ་འཚལ་གྱི་ཆོས་ཕུང་བསྡུ་སྒྲིག་དང་གླེགས་བམ་དུ་བྲིས་བཞེངས་རྒྱུན་སྤེལ་ཇི་ལྟར་མཛད་པའི་བཀའ་བསྟན་ལོ་རྒྱུས་འོད་སྣང་གསར་པ།༽ ཞེས་བརྗོད།
དེ་བཞིན་བེ་རི་དགེ་བཤེས་འཇིགས་མེད་དབང་རྒྱལ་ལགས་ཀྱིས་བརྩམས་པའི་གྲངས་ཀྱི་མངོན་བརྗོད་གསལ་བའི་སྒྲོན་མེ། ཞེས་པ་དང་། སྨྲ་བའི་སྒོ་མཚོན་ཆ་ལྟ་བུའི་འབྲུ་འགྲེལ་ཅུང་ཟད་གསལ་བར་བྱེད་པ། ཞེས་པ་དེ་གཉིས་ཡིན། ཞེས་གསལ་བཤད་གནང་བ་བཅས།།
