༢༠༡༧ ཟླ་ ༡༢ ཚེས་ ༡༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༧ ཟླ་ ༡༢ ཚེས་ ༡༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་སུ་རྟེན་གཞི་བྱས་པའི་དཔལ་ལྡན་འབྲས་དཀར་སྤུངས་པའི་བླ་སྤྱིའི་ཚོགས་ཁང་བྱིན་ཅན་ནང་དུ་སྔ་དྲོ་ཆུ་ཚོད་ ༨ །༠༠ ནས་དབུ་འཛུགས་ཀྱིས་འབྲས་སྤུངས་སྒོ་མང་གྲྭ་ཚང་གི་རབ་བྱུང་ཞལ་གྲངས་ ༣༠ དང་བློ་གསལ་གླིང་གྲྭ་ཚང་གི་རབ་བྱུང་ཞལ་གྲངས་ ༣༠ དེ་བཞིན་བོད་ནས་གསར་དུ་ཕེབས་པ་རབ་བྱུང་ ༣ བཅས་ཁྱོན་རབ་བྱུང་ ༦༣ ལ་བསྙེན་རྫོགས་ཀྱི་སྡོམ་པ་འབོག་ཆོག་མཛད་འདུག
དེ་ཡང་སྡོམ་པ་འབོག་ཆོག་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས་མཁན་པོ་མཛད་ཅིང་། ལས་སློབ་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ་མཆོག་ཡིན་པ་དང་། གསང་སྟོན་པ་སྒོ་མང་གྲྭ་ཚང་གི་མཁན་པོས་གནང་འདུག ལས་སློབ་ཁོངས་སུ་འབྲས་སྤུངས་ཁྲི་པ་མཆོག་དང་ཀུན་བདེ་གླིང་རིན་པོ་ཆེ་སོགས་བླ་སྤྲུལ་ཁག་ཅིག་ཀྱང་ཡོད་འདུག
སྤྱིར་ཐེངས་འདིར་༸གོང་ས་མཆོག་གི་༸སྐུ་མདུན་ནས་བསྙེན་རྫོགས་ཀྱི་སྡོམ་པ་ཞུ་མཁན་འབྲས་སྤུངས་བློ་གསལ་གླིང་ཁོངས་ནས་རབ་བྱུང་ཞལ་གྲངས་ ༣༠༤ དང་སྒོ་མང་གྲྭ་ཚང་ནས་ ༡༠༠ ཙམ། ལྷག་པར་བོད་ནས་གསར་དུ་ཕེབས་པ་ ༢༠ ཙམ་ཡོད་སྐོར་སྐུ་བཅར་དགེ་བཤེས་ལྷ་རམས་པ་ཡང་སྟེང་རིན་པོ་ཆེས་གསར་འགོད་པ་ཚོར་གསུངས།
དེ་ཡང་མཛད་འཆར་ལྟར་ན་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ཚེས་ ༡༦ དང་ ༡༧ བཅས་སུ་བྱེས་ཀྱི་གདན་ས་ཆེན་པོ་དགའ་ལྡན་རྣམ་པར་རྒྱལ་བའི་གླིང་དུ་ཉིན་རེར་རབ་བྱུང་ཞལ་གྲངས་ ༦༠ རེ་བྱས་ནས་ཁྱོན་ཉིན་གཉིས་རིང་རབ་བྱུང་ཞལ་གྲངས་ ༡༢༠ ལ་དགེ་སློང་གི་སྡོམ་པ་འབོག་ཆོག་སྩལ་གནང་མཛད་འཆར་ཡོད་པ་མ་ཟད། འཕྲོས་རྣམས་འདི་ལོ་ཕྱི་ཟླ་དང་པོའི་ཟླ་མཇུག་ཏུ་གནས་མཆོག་རྡོ་རྗེ་གདན་དུ་ཆིབས་སྒྱུར་སྐབས་སྙེན་རྫོགས་ཀྱི་སྡོམ་པ་འབོག་ཆོག་མཛད་འཆར་ཡོད་འདུག
དེ་རིང་ཕྱི་ཚེས་ ༡༤ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་འབྲས་སྤུངས་མཁས་མང་བློ་གསལ་བྱེ་བའི་གླིང་གྲྭ་ཚང་གི་སྒོམ་སྒྲུབ་དང་ཚན་རིག་ལྟེ་གནས་ཁང་གསར་པ་དབུ་འབྱེད་རབ་གནས་བཀའ་དྲིན་སྩལ་གནང་མཛད་ཡོད་པ་བཅས།།
