༢༠༡༧ ཟླ་ ༡༢ ཚེས་ ༡༡ རེས་གཟའ་ཟླ་བ།

༄༅། །ཕྱི་ལོ་ ༢༠༡༧ ཟླ་ ༡༢ ཚེས་ ༡༡ རེས་གཟའ་ཟླ་བའི་ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་༸ཞབས་སོར་འཁོད་མཚམས་ཀར་ཝར་རྫོང་དཔོན་ Karwar Distt སྐུ་ཞབས་ Shri. S.S. Nakul ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མོན་གྷོ་ས་གནས་བོད་མིའི་ས་ཐོ་ལག་འཛིན་ Record of Tenancy Certificate (RTC) སྤྱན་འབུལ་ཞུས་འདུག

སྐབས་དེར་རྫོང་དཔོན་གྱིས་༸གོང་ས་མཆོག་ལ་མོན་གྷོ་ས་གནས་བོད་མིར་ས་ཐོ་ལག་འཛིན་གནང་རྒྱུའི་མཛད་སྒོ་སྟབས་བདེ་ཞིག་རྗེས་སུ་གོ་སྒྲིག་ཞུ་འཆར་ཡོད་པ་དང་།  མཛད་སྒོའི་ཐོག་མོན་གྷོ་ས་གནས་བོད་མི་རྣམས་ལ་མངའ་སྡེའི་གཞུང་གིས་ས་ཐོ་ལག་འཛིན་གནང་རྒྱུ་ཡིན་ཞིང་།  ཐེངས་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ས་གནས་སུ་༸ཞབས་སོར་འཁོད་སྟབས་སྙན་སེང་ཞུས་སྐོར་ལྷ་སྙན་སྒྲོན་འབུལ་ཞུས།  སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་ཀྱང་ཐུགས་དགྱེས་ཚོར་ཆེན་པོས། མངའ་སྡེའི་གཞུང་མང་གཉིས་ནས་ད་བར་བོད་མི་བཙན་བྱོལ་བ་རྣམས་ལ་མཐུན་འགྱུར་རོགས་རམ་གནང་དང་གནང་མུས་ལ་ཐུགས་རྗེ་ཆེ་ཞུས་གནང་མཛད་འདུག

སྤྱིར་ས་ཐོ་ལག་འཛིན་ RTC ཡོད་ཚེ་ས་གནས་བོད་མི་སོ་ནམ་པ་གཙོ་བོར་གྱུར་བའི་མི་མང་རྣམས་ལ་རྒྱ་གར་དབུས་དང་ས་གནས་གཞུང་གི་ཟ་འབྲུའི་ཐོབ་ཐང་དང་གུན་གསབ་ཀྱི་ཐོབ་སྐལ་སོགས་རྒྱ་གར་གྱི་ཡུལ་མི་སྤྱི་འདྲ་སྤྱི་མཚུང་ལྟར་ཐོབ་རྒྱུ་ཡིན་འདུག 

དེ་ཡང་རྒྱ་གར་གཞུང་གིས་དེ་སྔ་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ ཞེས་པ་གཏན་འབེབས་གནང་རྗེས་རིམ་བཞིན་མངའ་སྡེ་ཁག་གཅིག་གི་ནང་སྲིད་བྱུས་དེ་བཞིན་གཏན་འབེབས་གནང་ཡོད་པའི་ཁོངས་ནས་རྒྱ་གར་ལྷོ་ཕྱོགས་བོད་མི་གཞིས་ཆགས་ཆེ་ཤོས་ཡོད་ས་ཀར་ན་ཊ་ཀའི་མངའ་སྡེའི་སྲིད་གཞུང་ནས་ཀྱང་སྲིད་བྱུས་དེ་གཏན་འབེབས་གནང་འདུག  

སྲིད་བྱུས་དེ་འདྲ་ཞིག་མངའ་སྡེའི་གཞུང་ནས་གཏན་འབེབས་གནང་ཆེད་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་བཀའ་འབྲེལ་ལྟར་སྦེར་ལོར་ལྷོ་སྤྱི་དང་མོན་གྷོ་བོད་མིའི་ས་གནས་འགོ་འཛིན་ལས་ཁུངས། དེ་བཞིན་མཉམ་འབྲེལ་སོགས་ཀྱིས་སྔ་ཕྱིར་འབྲེལ་ཡོད་མངའ་སྡེའི་དབང་འཛིན་པ་ཚོ་དང་རྫོང་དཔོན་སོགས་ཐེངས་མང་མཇལ་འཕྲད་ཞུས་ནས་འབད་བརྩོན་དུ་མ་གནང་ཡོད་པ་བཅས།།