༢༠༡༧ ཟླ་ ༡༢ ཚེས་ ༧ རེས་གཟའ་ཕུར་བུ།

སྔ་དྲོ་ཅནྡི་གར་དུ་༸ཞབས་སོར་འཁོད་མཚམས་བོད་མི་ཚོས་མཇལ་བཅར་ཞུས་པ།

༄༅། །དེ་རིང་སྔ་དྲོ་ཆུ་ཚོད་ ༦།༣༠ ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་ཕོ་བྲང་ནས་སྟོན་འཁོར་དང་བཅས་ཅནྡི་གར་གནམ་ཐང་བརྒྱུད་གྲོང་ཁྱེར་མུམ་བྷེ་རུ་ཆིབས་སྒྱུར་བསྐྱངས་རྗེས་དེ་ཉིན་གྱི་ཕྱེད་ཡོལ་ཆུ་ཚོད་ ༣ ཙམ་ལ་རྒྱ་གར་ལྷོ་ཕྱོགས་མ་ཧཱ་རཱཤཏྲ་མངའ་སྡེའི་རྒྱལ་ས་མུམ་བྷེའི་གནམ་ཐང་དུ་༸ཞབས་སོར་བདེ་བར་འཁོད།  

གྲོང་ཁྱེར་མུམ་བྷེའི་གསོལ་མགྲོན་ཁང་དུ་༸ཞབས་སོར་འཁོད་སྐབས།

གནམ་ཐང་ནས་རླངས་འཁོར་བརྒྱུད་ཆིབས་༸ཞལ་བསྒྱུར་རྗེས་ཆུ་ཚོད་ ༣ དང་སྐར་མ་ ༢༠ ཙམ་ལ་མ་རིའོ་ཊ་གསོལ་མགྲོན་ཁང་དུ་ JW Marriott ༸ཞབས་སོར་བདེ་བར་འཁོད་སྐབས་གསོལ་མགྲོན་ཁང་གི་སྤྱི་ཁྱབ་འགན་འཛིན་སྐུ་ཞབས་ཌེ་མར་ Diemar Kielnhofer ལགས་དང་། མགྲོན་ཁང་གི་ལས་བྱེད། བཀའ་ཟུར་སྐུ་ངོ་བསྟན་པ་ཚེ་རིང་མཆོག་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་འདུག

མུམ་བྷེ་གསོལ་མགྲོན་ཁང་གི་འགན་འཛིན་ནས་ཕེབས་བསུ་ཞུ་སྐབས།

དེ་ཡང་རྒྱ་གར་གྱི་གྲོང་ཁྱེར་མུམ་བྷེའི་ནང་རྟེན་གཞི་བྱས་པའི་ཝ་ན་ཐེབས་རྩའི་ Vana Foundation རིག་པའི་སྣང་གསལ་ Vidyaloke ཞེས་པའི་ཚོགས་པ་དང་སོ་མེ་ཡ་མཐོ་སློབ་གཉིས་ནས་ཇི་ལྟར་སྔོན་ནས་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཕྱི་ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེང་དུས་རྒྱ་གར་སྤྱི་ཚོགས་ཁྲོད་རྒྱ་གར་གྱི་གནའ་རབས་ལེགས་བཤད་སླར་གསོ་ Reviving Indian Wisdom in Contemporary ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བསྩལ་རྒྱུ་ཡིན་པ་བཅས།