༢༠༡༧ ཟླ་ ༡༡ ཚེས་ ༢༡ རེས་གཟའ་མིག་དམར།

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༡༧ ཟླ་ ༡༡ ཚེས་ ༢༠ ཉིན་ཨོ་སི་ཀྲོ་ལི་ཡའི་གྲོས་ཚོགས་འཐུས་མི་སྐུ་ཞབས་ (Senator Mr. Derryn Hinch,Justice Party of Australia) མཆོག་གིས་སྣེ་ཁྲིད་འོག་གྲོས་ཚོགས་འཐུས་མི་སྐུ་ཞབས་ (Kevin Andrews,Formal Defence Minister) མཆོག་དང་། གྲོས་ཚོགས་འཐུས་མི་ལྕམ་སྐུ་ (Senator Ms. Kimberly Kitching ) གྲོས་ཚོགས་འཐུས་མི་ལྕམ་སྐུ་ (Ms. Meryl Jane Swanson,Labour Party of Australia ) བཅས་ལས་གྲུབ་པའི་ཨོ་སི་ཀྲོ་ལི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་སྐུ་ཚབ་ཚོགས་ཆུང་ཞིག་བཞུགས་སྒར་དུ་ཕེབས་པར་དཔལ་ལྡན་ཚོགས་གཞོན་མཆོག་གིས་གཙོས་སྤྱི་འཐུས་རྒྱུན་ལས་རྣམ་པས་མཇལ་འཕྲད་གནང་ཡོད།

          དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༦།༣༠ ཐོག་སྤྱི་འཐུས་ལྷན་ཁང་ནས་ཨོ་སི་ཀྲོ་ལི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་སྐུ་ཚབ་ཚོགས་མི་རྣམས་ལ་རྡ་ས་མེག་གྷན་གསོལ་མགྲོན་ཁང་དུ་འཚམས་འདྲིའི་གསོལ་ཚིགས་ཤིག་འདེགས་འབུལ་ཞུས་གནང་བ་དང་། སྐབས་དེར་དཔལ་ལྡན་ཚོགས་གཞོན་མཆོག་གིས་གཙོས་སྤྱི་འཐུས་རྒྱུན་ལས་རྣམས་ཆེད་ཕེབས་གནང་ཡོད།

          མཇལ་འཕྲད་སྐབས་ཐོག་མར་དཔལ་ལྡན་ཚོགས་གཞོན་ཨཱ་ཅཱརྱ་ཡེ་ཤེས་ཕུན་ཚོགས་མཆོག་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ནས་ཁོང་རྣམས་རྡ་སར་ཕེབས་པར་འཚམས་འདྲི་དང་སྦྲགས། སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ནས་འཛམ་གླིང་ས་ཕྱོགས་གང་སར་ཡོད་པའི་གྲོས་ཚོགས་བོད་དོན་རྒྱབ་སྐྱོར་ཚོགས་མི་རྣམས་བཞུགས་སྒར་དུ་ཕེབས་སྐབས་སྣེ་ལེན་ཞུ་ཡི་ཡོད་པའི་སྐོར་དང་།

ཨོ་སི་ཀྲོ་ལི་ཡའི་གྲོས་ཚོགས་ནང་བོད་དོན་ཐོག་གྲོས་ཆོད་བཞག་པ་སོགས་ད་བར་དངོས་ཡོད་ཀྱི་གྲུབ་འབྲས་ཐོན་པའི་རྒྱབ་སྐྱོར་ཤུགས་ཆེ་གནང་ཡོད་ལུགས། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་རྣམས་འཛམ་གླིང་རྒྱབ་ཁབ་ཁག་ཏུ་གྲོས་ཚོགས་འཐུས་མི་མཇལ་འཕྲད་དང་། བོད་དོན་ཞུ་སྐུལ་གནང་ཆེད་ཀྱི་ལས་རིམ་སོགས་ངོ་སྤྲོད་དང་། བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ་དང་ལས་དོན་བྱེད་ཕྱོགས།   བོད་ཀྱི་འདས་པའི་ལོ་རྒྱུས།    བོད་ཀྱི་གནད་དོན་དེ་ནི་གཙོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་དང་།  བོད་མི་ཚོར་བདེན་རྒྱབ་ཡོད་སྟབས་འཛམ་གླིང་ནང་རྒྱབ་སྐྱོར་ཤུགས་ཆེ་ཐོབ་ནས་ད་ཆ་འཛམ་གླིང་གི་གནད་དོན་ཞིག་ཆགས་ཡོད་སྐོར་སོགས་གསུངས།

དེ་ནས་སྐུ་ཞབས་ Senator Mr. Derryn Hinch མཆོག་ནས་སྤྱི་འཐུས་རྒྱུན་ལས་རྣམ་པས་དགོང་དྲོའི་འཚམས་འདྲིའི་གསོལ་ཚིགས་གནང་བར་ཐུགས་རྗེ་ཆེ་ཞུས་གནང་བ་དང་། རྒྱ་གར་རྒྱལ་ས་ལྡི་ལི་ནས་རྡ་སར་མ་ཕེབས་སྔོན་༸གོང་ས་མཆོག་དང་མཇལ་འཕྲད་གནང་རྒྱུ་བྱུང་བའི་སྐོར་གསུང་བ་དང་སྦྲགས།   བོད་ཀྱི་བརྒྱུད་ནང་ཆོས་དེ་ནི་བཟང་སྤྱོད་ཀྱི་ལྟ་གྲུབ་གཞི་ལ་བཞག་ཡོད་པ་ཞིག་དང་། ད་བར་བོད་ཀྱི་འཐབ་རྩོད་ཐོག་མུ་མཐུད་མདུན་སྐྱོད་ཐུབ་པ་ནི་ཧ་ལས་པའི་ངོ་མཚར་ཅན་ཞིག་ཡིན་སྐོར་དང་།

རྒྱ་ནག་གཞུང་གིས་བོད་ནང་རྒྱ་ནག་གི་མི་འབོར་ཕོན་ཆེ་གནས་སྤོ་བྱས་ནས་བོད་མི་རྣམས་རང་ཡུལ་དུ་གྲངས་ཉུང་མི་རིགས་བཟོ་བཞིན་པའི་སྲིད་བྱུས་འཛིན་པ་དེས་བོད་མིའི་ཆོས་དང་།རིག་གཞུང་སོགས་ལ་ཉེན་ཁ་ཆེན་པོ་འཕྲད་བཞིན་ཡོད་པའི་སྐོར་དང་།    ཐེངས་འདིར་སྐུ་མགྲོན་རྣམས་རྡ་ས་མེག་གྷན་དུ་རྟེན་གཞི་བྱས་པའི་ཕྱི་དྲིལ་བོད་ཀྱི་འགྲེམས་སྟོན་ཁང་དུ་གཟིགས་སྐོར་ཕེབས་སྐབས་འགྲེམས་སྟོན་གྱི་པར་རིས་ཐོག་ནས་བོད་ཀྱི་ལོ་རྒྱུས་གང་ཙམ་གོ་རྟོགས་ཐུབ་ཡོད་སྐོར་གསུངས།   འགྲེམས་སྟོན་ཁང་གི་མཆན་ཐོ་འགོད་སའི་དེབ་ནང་ཁོང་གིས་ད་བར་༸གོང་ས་མཆོག་ཐེངས་བཞི་ཙམ་མཇལ་བ་དང་། འབྱུང་འགྱུར་ལོ་ ༡༥ ནང་བོད་ནང་མཇལ་རྒྱུ་ཡོང་བའི་རེ་བ་ཡོད་ཅེས་བྲིས་ཡོད་སྐོར་གསུངས།

དེ་བཞིན་སྐུ་ཞབས་ Kevin Andrews མཆོག་གིས་བོད་ཀྱི་འཐབ་རྩོད་ནི་རང་དབང་དང་། ཞི་བདེ། འཛམ་གླིང་ནང་འདྲ་མཉམ་གནས་རྒྱུ་བཅས་ཀྱི་གནད་དོན་ཞིག་ཡིན་པས་ངས་རྒྱབ་སྐྱོར་ཞུ་ཡི་ཡོད་ཅེས་དང་། བོད་མིའི་སྒྲིག་འཛུགས་ནས་བོད་མི་ས་ཡ་དྲུག་གི་མགྲིན་ཚབ་བྱས་ཏེ་བོད་མིའི་མངོན་འདོད་བསྒྲུབ་བཞིན་པར་ཡི་རངས་བསྔགས་བརྗོད་དང་། ཁོང་རྣམས་འདིར་ཕེབས་ཏེ་བོད་ཀྱི་འཐབ་རྩོད་ཐོག་སྔར་ལྷག་ཤེས་རྟོགས་ཐུབ་ཐབས་ཆེད་ཐེངས་འདིར་གོ་སྐབས་ཐོབ་པར་ཧ་ཅང་དགའ་པོ་བྱུང་ཞེས་དང་། འབྱུང་འགྱུར་བོད་མིའི་མངོན་འདོོད་བསྒྲུབ་ཐུབ་པའི་རེ་བ་དང་། སྨོན་ལམ་ཞུ་རྒྱུ་ཡིན་ཞེས་གསུངས།

དེ་ནས་ཆུ་ཚོད་གཉིས་ཙམ་རིང་སྤྱི་འཐུས་རྒྱུན་ལས་རྣམས་དང་བོད་ཀྱི་གནད་དོན་ཐོག་གོ་བསྡུར་ལྷུག་པོ་གནང་རྗེས།  དཔལ་ལྡན་ཚོགས་གཞོན་མཆོག་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ནས་ཨོ་སི་ཀྲོ་ལི་ཡའི་གྲོས་ཚོགས་འཐུས་མི་རྣམས་ལ་ཕྱག་རྟགས་ཕུལ་གནང་ཡོད།

ཕྱི་ཚེས་ ༢༡ ཉིན་གྱི་ཕྱི་དྲོ་ཆུ་ཚོད་ ༣།༠༠ ཐོག་ཨོ་སི་ཀྲོ་ལི་ཡའི་གྲོས་ཚོགས་འཐུས་མི་རྣམས་བོད་མི་མང་སྤྱི་འཐུས་ལྷན་ཁང་དུ་འཚམས་གཟིགས་སུ་ཕེབས་གནང་བ་བཅས་ཀྱི་གནས་ཚུལ་དུ།།