༢༠༡༧ ཟླ་ ༡༡ ཚེས་ ༡༨ རེས་གཟའ་སྤེན་པ།
༄༅། །འདི་ལོའི་ཕྱི་ཟླ་ ༡༡ ཚེས་ ༡ ཉིན་ཨ་རིའི་གྲོས་ཚོགས་འོག་མའི་ནང་༸གོང་ས་༸སྐྱབས་མགོན་ཆེན་པོ་མཆོག་དང་བོད་དོན་རྒྱབ་སྐྱོར་གྱི་གྲོས་འཆར་བཏོན་པ་མ་ཟད། ཕྱི་ཟླ་ ༡༡ ཚེས་ ༡༦ ཉིན་སླར་ཡང་ཨ་རིའི་གྲོས་ཚོགས་གོང་མའི་ Senate ནང་གྲོས་འཆར་དེ་མཚུངས་ཤིག་བཏོན་འདུག
དེ་ཡང་གྲོས་འཆར་དེའི་ནང་དེ་སྔ་ཕྱི་ལོ་ ༢༠༠༢ ལོར་གཏན་འབེབས་གནང་བའི་བོད་དོན་རྒྱབ་སྐྱོར་གྱི་སྲིད་བྱུས་དེ་དག་སྲིད་འཛིན་ཌོ་ནལ་ཊམ་མཆོག་གིས་ལག་བསྟར་མཇུག་སྐྱོང་གནང་དགོས་པ་དང་། ལྷག་པར་རྒྱ་ནག་དང་འབྲེལ་བ་གནང་སྐབས་བོད་ཀྱི་གནད་དོན་དེ་གལ་ཆེར་བརྩི་དགོས་པ་དང་། ཨ་རིའི་མི་སེར་བོད་ནང་བསྐྱོད་རྒྱུར་དམ་བསྒྲགས་སུན་གཙེར་གང་ཡང་མེད་པ་ཞིག་དགོས་པ་དང་།
༸གོང་ས་ཏཱ་ལའི་བླ་མ་མཆོག་གམ་ཁོང་གི་སྐུ་ཚབ་དང་ལྷན་གཉིས་སྨན་དབུ་མའི་ལམ་གྱི་སྲིད་བྱུས་གཞི་ལ་གཞག་སྟེ་གྲོས་མོལ་བསྐྱར་གསོ་ཞུ་དགོས་པ་སོགས་རེ་འདུན་ཤུགས་ཆེ་བཏོན་འདུག
གྲོས་འཆར་འདོན་མཁན་གྲོས་ཚོགས་གོང་མའི་གྲོས་ཚོགས་འཐུས་མི་སྐུ་ཞབས་ Ted Cruz མཆོག་དང་། Robert Menendez མཆོག Marco Rubioམཆོག Tammy Baldwin མཆོག Cory Gardner མཆོག Bernie Sanders མཆོག Patrick Leahy མཆོག Dianne Feinstein མཆོག་བཅས་ཡིན་འདུག
གྲོས་འཆར་དེའི་ནང་འཁོད་དོན། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བཙན་གནོན་བྱ་རྒྱུའི་སྲིད་བྱུས་དེ་མཚམས་འཇོག་རྩ་བ་ནས་བྱེད་རྩིས་མེད། རང་སྐྱོང་ལྗོངས་ཟེར་བ་ནི་མིང་ཙམ་ལས་དོན་དངོས་མའོ་ཙེ་ཏུང་གི་རྒྱ་ནག་བཅིང་བཀྲོལ་དམག་མིས་ཕྱི་ལོ་ ༡༩༥༠ ལོར་བོད་ས་བཙན་བཟུང་བྱས་པ་ནས་བཟུང་ལོ་ངོ་བདུན་ཅུ་ཙམ་རིང་ཆབ་སྲིད་དམ་བསྒྲགས་དང་། ཁྲིམས་འགལ་ཐོག་ནས་འཛིན་བཟུང་བྱས་པ། བཙན་ཤེད་ཀྱིས་རྒྱལ་གཅེས་ཆོས་གཅེས་ཟེར་བའི་སློབ་གསོའི་ལས་འགུལ་སྤེལ་བ།
འགྲོ་བསྐྱོད་དང་ཆོས་དད་རང་དབང་ལ་དམ་བསྒྲགས་བཀག་བསྡོམ་ཚབས་ཆེ་བྱས་དང་བྱེད་མུས་ཡིན་པ་མ་ཟད། གསར་འགོད་པ་དང་བོད་མི་བཙན་བྱོལ་བ་ཕྱིར་རང་ཡུལ་བོད་དུ་ལོག་འགྲོ་མཁན་ཚོར་རྒྱ་ནག་གཞུང་གིས་དམ་བསྒྲགས་བཀག་སྡོམ་བྱས་པའམ་ཡང་ན་བོད་དུ་འབྱོར་ཐུབ་ཀྱང་ཁོང་ཚོའི་བདེ་འཇགས་ལ་གཞུང་གིས་ཉེན་ཁ་བཟོ་བཞིན་པའི་བྱེད་བབ་དེ་དག་ལས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་མར་ཁེ་སི་དང་ལེ་ཉིན། དེ་བཞིན་མའོ་ཙེ་ཏུང་བཅས་ཀྱི་ལྟ་གྲུབ་འོག ཆོས་ལུགས་དང་མི་རིགས། ལོ་རྒྱུས་ཐ་དད་ཡོད་པའི་མཐའ་མཚམས་ཀྱི་གྲངས་ཉུང་མི་རིགས་སོགས་ལ་བརྩི་བཀུར་བྱ་རྒྱུ་ལྟ་ཞོག་མི་རིགས་ཡོངས་རྫོགས་དབང་སྒྱུར་བྱ་རྒྱུའི་ཚིམ་པ་མེད་པའི་རྔམ་སེམས་མུ་མཐུད་འཆང་བཞིན་ཡོད་པ་གསལ་འདོན་བྱེད་བཞིན་ཡོད། རྔམ་སེམས་དེའི་འོག་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ས་ཁོངས་ནས་གྱོན་གུད་ཆེ་ཤོས་བོད་ལ་རག་ཡོད།
བོད་པའི་བུད་མེད་སྐལ་བཟང་གནམ་མཚོ་ཞུ་བ་ལོ་ན་ ༡༧ སོན་པ་ཁོང་ནང་པ་ལ་བརྒྱུད་བལ་ཡུལ་དུ་བྲོས་བྱོལ་ལ་ཡོང་སྐབས་རྒྱ་མིའི་དམག་མིས་ཁོ་མོར་མེ་མདའ་ཐེངས་གཉིས་བརྒྱབ་ནས་བསད་པ་རེད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གདུག་རྩུབ་བྱ་སྤྱོད་དེ་ལྟ་བུ་ནི་དཔེར་ཧ་ལམ་མ་སྲིད་པ་ཞིག་རེད། མཐོ་ཚད་མི་ཊར་ ༦༠༠༠ བརྒལ་ནས་རང་གི་བྲོས་རོགས་མི་ཟླ་ ༧༢ དང་ལྷན་ནང་མ་ལར་འབྱོར་སྐབས་རྒྱ་མིའི་དམག་མིས་སྐལ་བཟང་གནམ་མཚོ་ལགས་ལ་དང་པོ་མེ་མདའ་ཐེངས་གཅིག་བརྒྱབ་ནས་སྐལ་བཟང་གནམ་མཚོ་སར་རྒྱལ་ཡོད། རྒྱལ་བ་ནས་དལ་གྱིས་ལངས་ཐབས་བྱས་འཕྲལ་སླར་ཡང་མེ་མདའ་གཅིག་བརྒྱབ་ནས་དམར་གསོད་བཏང་བ་རེད། བོད་མི་དེ་དག་ལོ་ངོ་བཅུ་ཕྲག་མང་པོའི་རིང་རང་དབང་གི་དོན་དུ་དཀའ་སྡུག་ཇི་ཙམ་མྱངས་དང་མྱོང་བཞིན་ཡོད་པ་ང་ཚོས་ཚིག་སྐམ་པོའི་ཐོག་ནས་འགྲེལ་བརྗོད་ཐུབ་ཐབས་བྲལ།
ཞེས་གསུང་རྗེས་མཐར་ཁོང་གིས་མཇུག་སྡོམ་གྱི་ཚུལ་དུ་གསུང་དོན། ཨ་རིའི་གྲོས་ཚོགས་གོང་འོག་གཉིས་ཀའི་ནང་ད་བར་བོད་དོན་དང་བོད་མིར་རྒྱབ་སྐྱོར་གྱི་གནད་དོན་ལ་ཐུག་སྐབས་མང་གཙོ་ Democrats དང་སྤྱི་མཐུན་ཚོགས་པ་ Republic གཉིས་ཀས་ལངས་ཕྱོགས་གཅིག་གྱུར་ཐོག་ནས་རྒྱབ་སྐྱོར་གནང་སྲོལ་ཞིག་དུས་ཡུན་རིང་པོའི་གོང་ནས་མུ་མཐུད་ད་བར་་གནས་ཡོད། དེར་བརྟེན་དེ་རིང་ངས་ཕྱག་སྦྲེལ་གྲོས་ཚོགས་འཐུས་མི་གཞན་དང་ལྷན་གྲོས་ཚོགས་གོང་འོག་གཉིས་ཀའི་ནང་ང་ཚོ་ཐུན་མོང་གི་ལངས་ཕྱོགས་ཐོག་མཉམ་རུབ་ཀྱིས་བོད་དོན་རྒྱབ་སྐྱོར་ཞུ་རྒྱུ་ཡིན་ཞེས་བརྡ་ལན་གསལ་པོ་ཞིག་བཏང་ཐུབ་པར་ང་རང་ཧ་ཅང་དགའ་སྤོབས་སྐྱེས་བྱུང་། བོད་ཀྱི་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས། བྱམས་བརྩེ་ནི་མིའི་དགོས་མཁོ་ཡིན་པ་ལས་རྒྱས་སྤྲོད་མིན། བྱམས་བརྩེ་མེད་ན་མི་རྣམས་འཚོ་ཐབས་བྲལ། ཞེས་བཀའ་སློབ་སྩལ་ཡོད། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་མིའི་གཞི་རྩའི་ཐོབ་ཐང་ལ་མུ་མཐུད་བརྩི་མེད་རྡོག་རོལ་གཏོང་བཞིན་ཡོད་ཀྱང་ང་ཚོ་ཨ་རི་བ་ཚོ་བོད་མི་མི་རེ་ངོ་རེའི་རྒྱབ་ཏུ་ལངས་ནས་ཡོད། ང་ཚོས་མུ་མཐུད་རྒྱབ་སྐྱོར་ཞུ་རྒྱུ་ཡིན། ཞེས་གསུངས།
དེ་ཡང་ཐེངས་འདིའི་གྲོས་འཆར་ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ལོ་ ༢༠༠༧ ལོར་ཨ་རིའི་གྲོས་ཚོགས་ཀྱི་གསེར་གྱི་རྟགས་མ་འབུལ་ལམ་ཞུས་པ་ནས་ལོ་བཅུའི་རྗེས་ཕྱིར་ལྟ་བྱེད་སྐབས་རྒྱ་ནག་གཞུང་གིས་
༡ ༽ བོད་མི་དང་ཨ་རིའི་མི་སེར་རྣམས་ལ་བོད་དུ་འགྲོ་བསྐྱོད་བྱ་རྒྱུར་དམ་བསྒྲགས་ཇེ་ཤུགས་ཆེ་རུ་བཏང་བ་དང་།
༢ ༽ བོད་མིའི་ཆོས་ཕྱོགས་ཀྱི་བྱེད་སྒོར་དམ་བསྒྲགས་ཆེ་ཤུགས་ཆེ་རུ་བཏང་བ།
༣ ༽ བོད་བརྒྱུད་ནང་བསྟན་རིག་གཞུང་ལ་དམ་བསྒྲགས་བྱས་པ།
༤ ༽ བོད་བརྒྱུད་ནང་བསྟན་གྱི་ལྷ་ཁང་དང་དགོན་སྡེ་ཁག་གཏོར་བཤིག་ཚབས་ཆེ་རུ་བཏང་བ།
༥ ༽ བོད་མིའི་རང་དབང་ཐོབ་ཐང་རྩོད་ལེན་པ་རྣམས་བཙོན་འཇུག་མུ་མཐུད་བྱས་པ།
༦ ༽ ཏཱ་ལའི་བླ་མའི་ཡང་སྲིད་སུ་ཡིན་མིན་གྱི་གནད་དོན་ཐག་གཅོད་བྱ་རྒྱུ་ཙམ་མ་ཟད། ༸སྐུའི་ཡང་སྲིད་མུ་མཐུད་དགོས་མིན་གྱི་གནད་དོན་ཐོག་ལའང་ཐག་གཅོད་བྱ་རྒྱུའི་དབང་ཆ་ཡོངས་རྫོགས་རྒྱ་ནག་དབུས་གཞུང་ལ་ཡོད་ཚུལ་སྨྱོན་བཞིན་ཡོད། ཅེས་གནད་དོན་དྲུག་ཁ་གསལ་འཁོད་པ་མ་ཟད།
༸གོང་ས་༸སྐྱབས་མགོན་ཆེན་པོ་མཆོག་གིས་ཀུན་ཁྱབ་འགན་ཁུར་གྱི་ལྟ་གྲུབ་འོག་ནས་འཛམ་གླིང་ནང་བྱམས་བརྩེ་དང་བཟོད་བསྲན། ཆོས་ལུགས་མཐུན་སྒྲིལ་སོགས་མདོར་ན་འགྲོ་བ་མི་རིགས་ཡོངས་རྫོགས་གཅིག་གྱུར་གྱི་འདུ་ཤེས་གོང་མཐོར་གཏོང་ཐབས་མཛད་བཞིན་ཡོད། ཅེས་སོགས་འཁོད་ཡོད།
གྲོས་འཆར་དེའི་ཐོག་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་མེ་ཐིའུ་མེ་ཁ་ཆི་ Matteo Mecacci མཆོག་གིས་གསུང་དོན། ཉེ་ལམ་ཨ་རིའི་སྲིད་འཛིན་ཌོ་ནལ་ཊམ་མཆོག་རྒྱ་ནག་ཏུ་རྒྱལ་དོན་འཚམས་གཟིགས་ཕེབས་སྐབས་འགྲོ་བ་མིའི་ཐོབ་ཐང་དང་བོད་ཀྱི་གནད་དོན་ཐོག་ཧ་ལམ་དོ་སྣང་ཙམ་ཡང་བྱེད་མེད་སྟབས། ད་ཆ་ཨ་རིའི་གྲོས་ཚོགས་ཀྱིས་བོད་དོན་ཐོག་ཆོད་སེམས་བརྟན་པོའི་ཐོག་ནས་རྒྱབ་སྐྱོར་གྱི་རྣམ་པ་འདོན་རྒྱུ་ཧ་ཅང་གལ་ཆེན་པོ་ཆགས་ཡོད།
ཐེངས་འདིར་གྲོས་ཚོགས་གོང་འོག་གཉིས་ཀའི་ནང་ཆབ་སྲིད་ཚོགས་པ་ཐུན་མོང་ནས་གྲོས་འཆར་འདི་འདྲ་ཞིག་འདོན་ཐུབ་པ་དེས་ལོ་ངོ་བཅུ་ཕྲག་རིང་ནས་ཨ་རིའི་མང་ཚོགས་རྣམས་ཀྱིས་༸གོང་ས་ཏཱ་ལའི་བླ་མ་མཆོག་དང་བོད་མིར་ཁ་ཞེ་གཉིས་མེད་ཀྱི་རྒྱབ་སྐྱོར་མུ་མཐུད་ཞུ་བཞིན་ཡོད་པ་གསལ་འདོན་གནང་བ་མ་ཟད། བོད་མིའི་ཐོབ་ཐང་ལ་བརྩི་མེད་རྡོག་རོལ་གཏོང་མཁན་ནི་རྒྱ་ནག་གཞུང་ཡིན་པ་རྒྱལ་སྤྱིའི་སྤྱི་ཚོགས་ཀྱིས་དུས་ཐོག་དྲན་སྐུལ་བཏང་བ་ཞིག་ཆགས་ཡོད། ཅེས་གསུངས།།
