༢༠༡༧ ཟླ་ ༡༡ ཚེས་ ༧ རེས་གཟའ་མིག་དམར།

༄༅། །ཕྱི་ལོ་  ༢༠༡༧  ཟླ་   ༡༡  ཚེས་ ༧  ཉིན་དཔལ་ལྡན་བཀའ་དྲུང་ཡིག་ཚང་ནས་གསལ་བསྒྲགས་སྤེལ་བའི་ནང་ཤེས་རིག་བཀའ་བློན་དངོས་གྲུབ་ཚེ་རིང་མཆོག་ཨ་རི་སྐུ་ཚབ་དོན་གཅོད་དུ་བསྐོ་གཞག་གནང་བ་དང་འབྲེལ་འདི་གའི་གསར་འགོད་པས་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༢།༡༥ ཙམ་ལ་བཀའ་དྲུང་ཡིག་ཚང་ལ་བཅར་ནས་བཀའ་དྲུང་རྫོང་ཁ་སྟོབས་རྒྱལ་ཚེ་རིང་ལགས་ལ་ཤེས་རིག་བཀའ་བློན་མཆོག་ཨ་རིའི་སྐུ་ཚབ་དོན་གཅོད་ལ་བཏང་གནང་བའི་རྒྱུ་མཚན་གང་ཡིན་ནམ་ཞེས་པར། 

ཁོང་གིས།   དེ་རིང་སྔ་དྲོ་བོད་མིའི་སྒྲིག་འཛུགས་ནས་གསལ་བསྒྲགས་གནང་བ་གཞིར་བཟུང་བྱས་ནས་ད་ལྟའི་ཤེས་རིག་བཀའ་བློན་དངོས་གྲུབ་ཚེ་རིང་མཆོག་བྱང་ཨ་རི་སྐུ་ཚབ་དོན་གཅོད་ལ་བསྐོ་བཞག་གནང་ཡོད་པ་རེད། ཁྱེད་རང་གིས་དྲི་བ་བཀའ་བློན་དངོས་གྲུབ་ཚེ་རིང་མཆོག་ཕར་བཏང་དགོས་པའི་རྒྱུ་མཚན་གང་ཡིན་ནམ་གསུངས་པ་རེད། འདི་བཀའ་ཤག་གིས་ཐག་གཅོད་རེད་ཅེས་ཞུ་རྒྱུ་ཡིན།   དེ་མིན་རྒྱུ་མཚན་དམིགས་བསལ་ང་ལ་ཞུ་རྒྱུ་མེད།   མ་འོངས་པར་དོན་གཅོད་ལས་ཐོག་སྤེན་པ་ཚེ་རིང་ལགས་གང་དུ་གཏང་མིན་སྐོར་ལན་འདེབས་གནང་དོན།

དེ་བཀའ་ཤག་གིས་ཐག་གཅོད་རེད།  ཨ་རི་སྐུ་ཚབ་དོན་གཅོད་འཕོ་འགྱུར་གཏོང་དགོས་པ་བཀའ་ཤག་ནས་དགོས་གལ་གཟིགས་ཏེ་ཐག་གཅོད་གནང་བ་ཞིག་རེད། དེ་འདྲ་ཡིན་དུས་མ་འོངས་པར་ང་ཚོ་དཔེར་ན། སྤྱིར་བཏང་སྐུ་ཚབ་དོན་གཅོད་དེ་ལས་བྱེད་ཀྱི་ཁོངས་ནས་ཕྱིན་པ་ཞིག་ཡིན་ན།  གནས་སྤོ་དང་བཀོད་སྒྲིག་ཡོང་གི་ཡོད་པ་རེད། དེ་མིན་པའི་གནས་སྟངས་ཁག་བཀའ་ཤག་གིས་ཐག་གཅོད་ཡིན་སྟབས་ང་ལ་དམིགས་བསལ་ཞིབ་ཕྲ་ཞུ་རྒྱུ་མེད།  རྐང་གཙོ་བོ་གནད་དོན་དེ་དག་བཀའ་ཤག་གིས་ཐག་གཅོད་གནང་རྒྱུའི་སྐུ་དབང་ཞིག་ཆགས་ཡོད། ཅེས་ལན་འདེབས་གནང་།

ཕྱོགས་མཚུངས་ཤེས་རིག་བཀའ་བློན་མཆོག་གི་ཚབ་ལ་བཀའ་བློན་གསར་པ་སུ་བསྐོ་བཞག་གནང་རྒྱུའི་འཆར་གཞི་ཡོད་མེད་ཀྱི་དྲི་བར་བཀའ་དྲུང་ནས།  ཤེས་རིག་བཀའ་བློན་དངོས་གྲུབ་ཚེ་རིང་མཆོག་ཕར་ཕེབས་པའི་ཚབ་ཏུ་ད་ལྟ་བཀའ་ཤག་ནས་དམིགས་བསལ་ཐག་གཅོད་བྱུང་མེད།  རིམ་པའི་ཐག་གཅོད་གནང་མཚམས་གསལ་པོ་ཆགས་རྒྱུ་རེད། ཅེས་ལན་འདེབས་གནང་ཡོད་པ་བཅས།།