༢༠༡༧ ཟླ་ ༡༡ ཚེས་ ༢༢ རེས་གཟའ་ལྷག་པ།
༄༅། །ཕྱི་ལོ་ ༢༠༡༧ ཟླ་ ༡༡ ཚེས་ ༢༢ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨོ་ཌི་ཤ་མངའ་སྡེའི་ནང་གི་མཛད་འཕྲིན་ཁག་རེ་ཞིག་ལེགས་པར་གྲུབ་རྗེས་གོང་ཚེས་ཉིན་ནུབ་བྷེང་གྷལ་མངའ་སྡེའི་རྒྱལ་ས་ཀོལ་ཀ་ཊར་༸ཞབས་སོར་བདེ་བར་འཁོད་འདུག
སྐབས་དེར་རྒྱ་གར་ཚོང་པའི་ལྷན་ཚོགས་ Indian Chamber of Commerce ཀྱི་སྐུ་ཚབ་འཐུས་མི་གཉིས་ཆེད་བཅར་ཞུས་ནས་ཕེབས་བསུའི་སྣེ་ལེན་གཟབ་རྒྱས་ཞུས་འདུག ཕྱོགས་མཚུངས་ས་གནས་བོད་མི་ཚོང་པ་མི་གྲངས་ ༡༥༠ བཅས་དང་རྒྱ་གར་ཡུལ་མི་སོགས་ཀྱིས་དགའ་དད་སྤྲོ་གསུམ་སྒོ་ནས་ཕེབས་བསུ་ཞུས་འདུག དེ་རྗེས་བཞུགས་གནས་གསོལ་མགྲོན་ཁང་དུ་༸ཞབས་སོར་བདེ་བར་འཁོད་མཚམས་མགྲོན་ཁང་གི་འབྲེལ་ཡོད་ལས་བྱེད་དང་དེར་ལས་ཀ་བྱེད་མཁན་བོད་མི་གཞོན་སྐྱེས་ཁག་གཅིག་བཅས་ཀྱིས་མཇལ་ཁ་ཞུས་འདུག
དེ་ཡང་སྤྱིར་དེ་རིང་ཁུལ་དེར་མགོན་པོ་གང་ཉིད་མཆོག་༸སྐུ་ངལ་གསོ་གནང་མཛད་རྒྱུ་ཙམ་ལས་དམིགས་བསལ་མཛད་འཆར་གང་ཡང་མེད་སྐོར་འབྲེལ་ཡོད་ནས་གསུངས།
ཕྱི་ཚེས་ ༢༣ ཉིན་༸གོང་ས་མཆོག་གིས་ཁུལ་དེར་རྒྱ་གར་ཚོང་པའི་ལྷན་ཚོགས་ Indian Chamber of Commerce ནས་ཇི་ལྟར་གདན་ཞུའི་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་རྒྱ་གར་གནའ་རབས་ཀྱི་རིག་གནས་སླར་གསོའི་ Revival of Ancient Indian Knowledge སྐོར་བཀའ་སློབ་སྩལ་གནང་མཛད་རྒྱུ་ཡིན་འདུག་པ་བཅས།།
