༢༠༡༧ ཟླ་ ༡༡ ཚེས་ ༡༧ རེས་གཟའ་པ་སངས།

༄༅། །ཕྱི་ལོ་ ༢༠༡༧ ཟླ་ ༡༡ ཚེས་ ༡༧ ཉིན་གྱི་སྔ་དྲོ་ཆུ་ཚོད་ ༡༡ ཡོལ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་རྒྱལ་ས་ལྡི་ལི་དང་།  ཨོ་ཌི་ས་མངའ་སྡེའི་རྒྱལ་ས་བྷུབ་ནེཤྭར།  ནུབ་བྷེང་གལ་གྱི་རྒྱལ་ས་ཀོལ་ཀ་ཊ་བཅས་སུ་མཛད་འཕྲིན་རྒྱ་ཆེ་བསྐྱང་སླད་བཞུགས་སྒར་གཟིམ་ཆུང་ཕོ་བྲང་ནས་ཆིབས་སྒྱུར་བཀའ་དྲིན་བསྐྱངས།

དེ་ཡང་མགོན་པོ་གང་ཉིད་མཆོག་རྡ་སའི་ཉེ་འགྲམ་ག་གྷལ་གནམ་ཐང་བརྒྱུད་རྒྱ་གར་གྱི་རྒྱལ་ས་ལྡི་ལིར་ཆིབས་སྒྱུར་བསྐྱང་ནས་ཕྱི་ཚེས་ ༡༨ ཉིན་ཁུལ་དེར་གཞུང་གི་སློབ་གྲྭའི་ Salwan Public School དགེ་ལས་སློབ་ཕྲུག་རྣམས་ལ་བཀའ་སློབ་སྩལ་གནང་མཛད་རྒྱུ་མ་ཟད། ཕྱི་ཚེས་ ༡༩ ཉིན་སི་མ་ཡེལ་བསྟི་གནས་ཁང་  Smile Foundation ཞེས་པ་དེར་བཀའ་སློབ་སྩལ་རྒྱུ་ཡིན་འདུག

དེ་རྗེས་ཕྱི་ཚེས་ ༢༡ ཉིན་ལྡི་ལི་ནས་མཁའ་ལམ་བརྒྱུད་ཨོ་ཌི་སའི་ Orissa རྒྱལ་ས་བྷུབ་ནེཤྭར་ Bhubaneswar ཆིབས་སྒྱུར་གྱིས་ཁུལ་དེར་རྟེན་གཞི་བྱས་པའི་སྤྱི་ཚོགས་ཚན་རིག་བསྟི་གནས་ཁང་གྲགས་ཅན་ Kalinga Institute of Social Sciences (KISS) དུ་ཆིབས་སྒྱུར་བཀའ་དྲིན་བསྐྱང་ནས་དགེ་ལས་སློབ་ཕྲུག་ཁྲི་ཕྲག་བརྒལ་བར་བཀའ་སློབ་སྩལ་རྒྱུ་དང་།

ཕྱི་ཚེས་ ༢༣ ཉིན་༸གོང་ས་མཆོག་ནུབ་བྷེང་གལ་གྱི་རྒྱལ་ས་ཀོལ་ཀ་ཊར་ Kolkata རྒྱ་གར་ཚོང་པའི་ལྷན་ཚོགས་ Indian Chamber of Commerce ནས་ཇི་ལྟར་གདན་ཞུའི་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་རྒྱ་གར་གནའ་རབས་ཀྱི་རིག་གནས་སླར་གསོའི་ Revival of Ancient Indian Knowledge སྐོར་བཀའ་སློབ་སྩལ་གནང་མཛད་རྗེས་ཕྱི་ལོ་༢༠༡༧ ཟླ་བ་ ༡༡ ཚེས་༢༦ རེས་གཟའ་ཉི་མའི་ཉིན་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ས་ལྡི་ལི་ནས་མཁའ་ལམ་བརྒྱུད་བཞུགས་སྒར་དུ་ཆིབས་༸ཞལ་སྒྱུར་གནང་མཛད་རྒྱུ་ཡིན་འདུག་པ་བཅས།།