༢༠༡༧ ཟླ་ ༡༡ ཚེས་ ༧ རེས་གཟའ་མིག་དམར།
ཤྲི་ལངྐའི་སྲིད་འཛིན་མཆོག་དང་ལྷན།
༄༅། །ཤྲི་ལངྐའི་ Sri Lanka གཞུང་གིས་འགན་ཁུར་རྐང་བཞེས་ཐོག་ཉི་ཧོང་ནང་པའི་ཆོས་ཚོགས་ནེན་བྷུན་ཤུ་ཤུ་ Nenbusushu ཞེས་པའི་གོ་སྒྲིག་འོག་ཤྲི་ལངྐའི་ནང་འཛམ་གླིང་ནང་པའི་ཚོགས་ཆེན་ཐེངས་བདུན་པ་ 7th world Buddhist summit ཚོགས་ཡོད་པ་དང་། སྐབས་དེར་རུ་སོག་སྐུ་ཚབ་དོན་གཅོད་ཏེ་ལོ་རིན་པོ་ཆེ་མཆོག་མཉམ་ཞུགས་གནང་འདུག ཚོགས་བཅར་བ་རྒྱལ་ཁབ་ཁག་ ༤༧ ནས་སྐུ་ཚབ་འཐུས་མི་དང་ཆོས་ལུགས་དབུ་ཁྲིད་སོགས་ཕེབས་འདུག
དབུ་འབྱེད་མཛད་སྒོའི་ཐོག་ཤྲི་ལངྐའི་སྲིད་འཛིན་སྐུ་ཞབས་མེཏྲི་པཱལ་སི་རི་སེ་ན་ Mr Maithripala Sirisena མཆོག་དང་། སྲིད་བློན་སྐུ་ཞབས་ར་ནིལ་བྷིཀྲ་མ་སེངྒེ་ Ranil Wickremesinghe མཆོག་སོགས་ཆེད་ཕེབས་ཀྱིས་གསུང་བཤད་གནང་འདུག
ཕྱི་ཚེས་ ༣ ནས་ ༤ བཅས་ཉིན་གྲངས་གཉིས་རིང་སྐུ་ཚབ་འཐུས་མི་རྣམ་པས་སོ་སོའི་རྒྱལ་ཁབ་ནང་དུ་ནང་པའི་བསྟན་པ་འཛིན་སྐྱོང་སྤེལ་གསུམ་གྱི་འཕེལ་རིམ་དང་དཀའ་ངལ་ཇི་འཕྲད་སྐོར་ལས་བསྡོམས་སྒྲོགས་སྦྱང་གནང་འདུག སྐབས་དེར་རིན་པོ་ཆེ་མཆོག་གིས་ཀྱང་བོད་དུ་ནང་ཆོས་ཐོག་མར་རྒྱ་གར་ནས་དར་ཚུལ་དང་། བོད་ནས་སོག་ཡུལ་དང་ཨུ་རུ་སུ་བཅས་ནང་དར་འཕེལ་བྱུང་སྟངས་སྐོར་ཞིབ་ཕྲ་གསུང་དོན། དུས་རབས་ ༢༠ ནང་ཨུ་རུ་སུ་དང་སོག་ཡུལ་གཉིས་དམར་ཤོག་རིང་ལུགས་ཀྱི་སྲིད་དབང་འོག་དཀའ་སྡུག་ཧ་ཅང་མྱངས་ཡོད་ཅིང་། དམར་ཤོག་གི་སྲིད་དབང་སྐབས་ཡུལ་གྲུ་དེ་དག་ནང་དུ་ནང་པའི་དགོན་པ་མང་པོ་གཏོར་བཤིག་བཏང་བ་མ་ཟད། དགེ་འདུན་པ་སྟོང་ཕྲག་བརྒལ་བ་བཙན་དབང་འོག་སྐྱ་སར་ཕབ་པ་དང་། མང་པོ་ཞིག་བཙོན་འཇུག་འོག་མནར་གཅོད་ཕོག་ཡོད་པར་བརྟེན། ཕྱིས་སུ་དམར་ཤོག་ཚོགས་པ་སྦོ་ལུག་རྗེས་ཡུལ་གྲུ་དེ་དག་ནང་དུ་བསྟན་པའི་མེ་རོ་རིམ་བཞིན་སླར་གསོ་བྱ་རྒྱུའི་བསྐལ་བཟང་གི་དུས་ཤིག་ད་ལྟ་གནས་མུས་ཡིན། འོན་ཀྱང་བོད་མི་ནང་པའི་ཆོས་གྲོགས་མང་པོ་ཞིག་ད་ལྟ་བོད་ནང་རྒྱ་ནག་དམར་པོའི་སྲིད་གཞུང་འོག་དཀའ་སྡུག་ཧ་ཅང་མྱངས་དང་མྱོང་བཞིན་པ་རྣམས་ང་ཚོས་ནམ་ཡང་བརྗེད་མི་རུང་།
རྒྱ་ནག་གཞུང་གིས་བོད་ནང་གི་བོད་མི་ནང་པ་ཚོར་ནང་ཆོས་ཉམས་ལེན་དང་ཁྱབ་སྤེལ་བྱ་རྒྱུའི་ཐོབ་ཐང་རྩ་བ་ནས་སྤྲོད་ཀྱི་མེད་པའི་ཁར་བོད་བརྒྱུད་ནང་བསྟན་གྱི་སློབ་གཉེར་བསྟི་གནས་ཁང་ཆེ་ཤོས་སུ་གྲགས་པ་གསེར་རྟ་བླ་རུང་སྒར་གཏོར་བཤིག་བཏང་དང་གཏོང་བཞིན་ཡོད། དམར་ཤོག་རིང་ལུགས་འོག་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་བཏང་སྟེ། དཀའ་སྡུག་མྱོང་བཞིན་པ་རྣམས་ང་ཚོས་ནམ་ཡང་བརྗེད་མི་རུང་། ངས་ནང་པའི་ཆོས་གྲོགས་ཕོ་མོ་ཚོར་བོད་མི་དང་བོད་དོན་ལ་རྒྱབ་སྐྱོར་གནང་རོགས་ཞུ་རྒྱུ་ཡིན། ཞེས་གསུངས།
སྐབས་དེར་ཀེན་ཡ་ Kenya ནང་པའི་ཆོས་ཚོགས་ཀྱི་སྐུ་ཚབ་འཐུས་མི་སྐུ་ཞབས་བྷན་ཏེ་ཝི་མ་ལ་མཆོག་གིས་རྒྱ་ནག་གཞུང་གིས་བོད་ནང་དུ་ནང་པའི་དགོན་པར་དམ་བསྒྲགས་བྱེད་བཞིན་དུ་རྒྱ་ནག་སྐམ་སའི་ནང་དུ་ནང་པའི་ལྷ་ཁང་སོགས་ཧ་ཅང་མང་པོ་རྒྱག་བཞིན་པ་གཉིས་འགལ་འདུ་ཡིན་སྐོར་གསུང་པར་རིན་པོ་ཆེ་མཆོག་གིས། དེ་ནི་གཙོ་བོ་རྒྱ་ནག་གཞུང་གིས་ཡུལ་སྐོར་སྤྲོ་འཆམ་བརྒྱུད་དཔལ་འབྱོར་ཁེ་ཕན་ཁོ་ནའི་ཆེད་ཡིན་པ་ལས། ཅི་སྟེ་སངས་རྒྱས་ཀྱི་བསྟན་པ་ཁོ་ནའི་སླད་དོན་དམ་རྒྱ་ནག་གཞུང་ལ་སེམས་ཁུར་ཡོད་ཚེ་བོད་ནང་དགོན་སྡེ་ཁག་དང་གྲྭ་བཙུན་རྣམས་ལ་དམ་བསྒྲགས་བྱེད་དགོས་དོན་གང་ཡིན། ཞེས་ལན་འདེབས་གསལ་བཤད་གནང་འདུག
བོད་དོན་ཐོག་རིན་པོ་ཆེ་མཆོག་གིས་ཤུགས་ཆེན་པོ་གསུང་པར་བརྟེན་ཚོགས་འདུ་གྲོལ་རྗེས་སྐུ་ཚབ་འཐུས་མི་མང་པོ་ཞིག་ཁོང་གི་དྲུང་དུ་བཅར་ནས་བོད་དོན་སྐོར་ཚོགས་ཆེན་ཐོག་གསུང་པར་བསྔགས་བརྗོད་ཤུགས་ཆེ་ཞུས་འདུག ཡུལ་དེའི་སྲིད་འཛིན་མཆོག་གིས་སྐུ་ཚབ་འཐུས་མི་རྣམས་ལ་གསོལ་སྟོན་འབུལ་ལམ་ཞུ་སྐབས་ཏེ་ལོ་རིན་པོ་ཆེ་མཆོག་གིས་བོད་ལུགས་སྟོན་པའི་སྐུ་བརྙན་ཞིག་སྲིད་འཛིན་མཆོག་ལ་ཕྱག་རྟགས་སུ་ཕུལ་ཡོད་པ་བཅས།།
