༢༠༡༧ ཟླ་ ༡༡ ཚེས་ ༥ རེས་གཟའ་ཉི་མ།

༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན།  སྐབས་ ༡༦ པའི་བོད་མི་མང་སྤྱི་འཐུས་རྣམས་བོད་མིའི་འདུ་སྡོད་གཞིས་ཆགས་ཁག་ལ་ཕྱོགས་བསྐྱོད་ཕེབས་རྒྱུའི་ས་བགོས་ཡོད་པ་ལྟར། སྤྱི་འཐུས་སྒྲོལ་མ་ཚེ་རིང་ལགས་ཕྱི་ལོ་ ༢༠༡༧ ཟླ་ ༡༠ ཚེས་ ༧ ནས་ ༢༥ བར་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ནང་རྟེན་གཞི་བྱས་པའི་བོད་མིའི་གཞིས་ཆགས་མེའོ་ཆོས་འཕེལ་གླིང་དང་། ཏི་ཛུ་དར་རྒྱས་གླིང་། ཀྲུ་ཀྲིང་བཅས་དང་། དེ་བཞིན་ན་ག་ལན་ཌི་མངའ་སྡེའི་ནང་བོད་མིའི་ཚོང་ལས་གཉེར་ས་ཀོ་ཧི་མ་དང་། རྡི་མ་པུར་བཅས་ལ་ཕྱོགས་བསྐྱོད་ལེགས་པར་གྲུབ་སྟེ་ཕྱི་ཚེས་ ༢༥ ཉིན་བཞུགས་སྒར་རྡ་སར་ཕྱིར་ཕེབས་གནང་ཡོད།

དེ་ཡང་སྤྱི་འཐུས་མཆོག་ཕྱི་ཚེས་ ༩ ཉིན་གྱི་ཕྱི་དྲོ་རྡི་མ་པུར་མེ་འཁོར་བབས་ཚུགས་སུ་འབྱོར་འཕྲལ་མེའོ་ས་གནས་རྒས་གསོ་ཁང་གི་འགན་འཛིན་དང་རྡི་མ་པུར་རང་བདེན་ཚོགས་ཆུང་གི་ཚོགས་གཙོ་སོགས་ཀྱི་སྣེ་ལེན་ཕེབས་བསུ་ཞུས།

དེ་རྗེས་ཀོ་ཧི་མར་བོད་མིའི་སུད་ཚོང་གཉེར་སར་འབྱོར་སྐབས་སུད་ཚོང་སྡེ་ཚན་གྱི་ཚོགས་གཙོ་ཚེ་རིང་ལགས་སོགས་ཀྱིས་སྣེ་ལེན་གཟབ་རྒྱས་ཞུས་པ་མ་ཟད། གོང་འཁོད་གཞིས་ཆགས་ཁག་ཏུ་ཕེབས་སྐབས་ཀྱང་ས་གནས་འགོ་འཛིན་དང་། ས་འཐུས་ཚོགས་གཙོ། ས་གནས་རང་བདེན་ཚོགས་གཙོ། མཉམ་འབྲེལ་ཚོགས་གཙོ་ཡིས་གཙོས་ས་གནས་ཀྱི་གནད་ཡོད་མི་སྣ་དང་མི་མང་བཅས་ནས་སྣེ་ལེན་ཕེབས་བསུ་ཞུས་གནང་ཡོད་འདུག

ཕྱི་ཚེས་ ༡༠ ཉིན་ནས་ས་གནས་ཁག་གི་ལས་རིམ་དབུ་འཛུགས་ཀྱིས་ཐོག་མར་ཀོ་ཧི་མ་དང་། རྡི་མ་པུར་ས་གནས་གཉིས་ཀྱི་བོད་མི་སུད་ཚོང་བ་རྣམས་སོ་སོར་མཇལ་འཕྲད་ཀྱིས་གསུང་བཤད་གནང་བ་དང་། དེ་ནས་ལས་རིམ་ལྟར། མེའོ་ཆོས་འཕེལ་གླིང་གཞིས་ཆགས་དང་། ཏེ་ཛུ་དར་རྒྱས་གླིང་གཞིས་ཆགས། དེ་བཞིན་ཀྲུ་ཀྲིང་བཅས་སོ་སོའི་ས་གནས་འགོ་འཛིན་ལས་ཁུངས་དང་མཉམ་འབྲེལ།  སློབ་གྲྭ་དང་སྨན་རྩིས་ཁང་། དེ་བཞིན་འཕྲོད་བསྟེན་སྨན་ཁང་། བུ་བཅོལ་ཁང་། དགོན་པ། ཀྲུ་ཀྲིང་ནང་འཆི་མེད་གཡང་སངས་ཚོགས་པས་ཡན་ལག་སྨན་རྩིས་ཁང་ལ་གནང་བའི་ས་ཆ་དང་ལས་ཤག   རྡིབ་རུ་གྷར་བོད་མིའི་སུད་ཚོང་ཁྲོམ་ས་སོགས་ལ་གཟིགས་བསྐོར་དང་། མི་མང་དང་སློབ་ཕྲུག་ཐུག་པ་སྟེ་ས་གནས་ཁག་གི་གནས་སྟངས་རྒྱུས་ལོན་གནང་ཡོད།

ཕྱོགས་མཚུངས་ཀྲུ་ཀྲིང་ནང་ཆགས་པའི་ངེས་གསང་མདོ་སྔགས་བྱང་ཆུབ་དར་རྒྱས་གླིང་དགོན་གྱི་འགྲེམས་སྟོན་ཁང་གི་གནའ་རྫས་རྙིང་པ་ཁག་དང་འདབ་སྦྲེལ་བྱིན་ཅན་སྐུ་གསུང་ཐུགས་རྟེན་བཞུགས་གསོལ་ཁག་ལ་མཆོད་མཇལ་ཞུས་པ་དང་སྦྲགས། དགོན་དེའི་མཁན་པོས་རྡིབ་རུ་གྷར་གྱི་གཡས་གཡོན་དུ་མཐུན་འགྱུར་གནང་བའི་བོད་རིགས་མི་མང་རྣམས་སྨན་གཏུག་སྐབས་སྡོད་སའི་སྡོད་ཁྱིམ་དང་ཐབ་ཚང་སོགས་ལ་གཟིགས་སྐོར་གནང་ཡོད་འདུག

མཚམས་གཟིགས་སྐབས་སློབ་ཕྲུག་དང་མང་ཚོགས་ཀྱི་བསམ་ཚུལ་བསྡུ་ལེན་དང་། བཞུགས་མོལ་ཚོགས་འདུ་ཐེངས་ ༡ ཚོགས་པ།   སློབ་ཕྲུག་དང་མི་མང་འདུ་འཛོམས་ཐོག་སྤྱི་འཐུས་ནས་གསུང་བཤད་ཐེངས་ ༡༨ གནང་ཡོད་པ་དང་།  གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་དང་། མང་གཙོའི་སྒྲིག་འཛུགས་ཐོག་གཞུང་མང་གཉིས་ལ་འགན་དབང་ཇི་ཡོད། བོད་ནང་གི་ཛ་དྲག་གནས་སྟངས།   བོད་དོན་དང་འབྲེལ་བའི་རྒྱལ་སྤྱིའི་ཆབ་སྲིད་ཀྱི་གནས་བབ།  སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པའི་ལས་རིམ་སྐོར་བཅས་ཀྱི་ཐོག་གསུང་བཤད་དང་དྲི་བར་ལན་འདེབས་གསལ་བཤད་གནང་ཡོད།

ལྷག་པར་ཀྲུ་ཀྲིང་ས་འགོ་ཁྱབ་ཁོངས་གྲོང་གསེབ་ཀོ་པུ་དང་། བོ་ན། དགེ་གླིང་གྲོང་། ནོར་བུ་གླིང་། ཉེ་རིང་། མང་གྷོ་ཊ། ཡོར་གཏོང། སྙུག་ཁང་། བི་ཧ་རི་ལེན། པད་ཀོང་། ཨེལ་སི་ལེན། པི་ཨཡེ་ལེན། ལ་ལིང་བཅས་ལ་རེ་རེ་བཞིན་ཕེབས་ཏེ་གཟིགས་བསྐོར་དང་མི་མང་ཚོ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལུང་འདྲེན་གྱིས་ནང་པ་སངས་རྒྱས་པའི་ཆོས་ཀྱི་སྙིང་པོ་ཤེས་ཆེད་བོད་ཡིག་དང་བོད་སྐད་ལ་དོ་སྣང་དགོས་པའི་ལམ་སྟོན་གནང་བ་མ་ཟད། མ་འོངས་པར་སྤྱི་འཐུས་ཕྱོོགས་ཕེབས་སྐབས་སྐད་བསྒྱུར་མི་དགོས་པར་ཐད་ཀར་གོ་ཐུབ་པའི་གནས་བབས་ཡོང་ཐུབ་པའི་ལམ་སྟོན་གནང་བར་མང་ཚོགས་ནས་སྦྱང་བརྩོན་བྱ་རྒྱུའི་ཁས་ལེན་གནང་ཡོད།

ཕྱོགས་མཚུངས་ངེས་གསང་མདོ་སྔགས་བྱང་ཆུབ་དར་རྒྱས་གླིང་དགོན་ཀྱི་སློབ་དཔོན་གྱི་རེ་སྐུལ་ལྟར། དགོན་པའི་སློབ་ཕྲུག་རྣམས་ལ་ཤེས་ཡོན་གྱི་གལ་གནད་སྐོར་དང་།  སློབ་གྲྭའི་དགེ་ལས་སློབ་ཕྲུག་ཚོར་རང་ཉིད་ཁྱིམ་ཚང་གི་རང་མགོ་ཐོན་ཙམ་མིན་པར་བོད་མི་རིགས་ཀྱི་འཐབ་རྩོད་ཆེད་ན་གཞོན་ཤེས་འཇོན་བཟང་སྤྱོད་ལྡན་པ་ཞིག་ཡོང་ཆེད་དགེ་ལས་རྣམས་ནས་བྱམས་བརྩེའི་ལམ་སྟོན་འོག་སློབ་མ་རྣམས་གཅེས་སྐྱོང་བྱེད་དགོས་སྐོར་ལམ་སྟོན་གནང་།

དེ་བཞིན་སློབ་ཕྲུག་དང་མི་མང་ཁོངས་སོ་སོ་ནས་དཀའ་སེལ་མཇུག་སྐྱོང་དགོས་རིགས་སྙན་ཞུ་དང་། ཉམ་ཐག་གི་གནས་ཚུལ་རྒྱུས་ལོན་དང་དཀའ་སེལ་མཇུག་སྐྱོང་། དགོན་སྡེ་ཁག་དང་། སློབ་གྲྭ། མི་མང་སོགས་ཀྱི་གནས་སྟངས་ཐོག་གཟིགས་ཞིབ་གནང་ཆེད་ཁྱོན་ཉིན་གྲངས་ ༡༩ རིང་གི་གཞུང་འབྲེལ་ཕྱོགས་བསྐྱོད་ཀྱི་ལས་དོན་ཡོངས་སུ་གྲུབ་པ་གནང་ཡོད་པ་བཅས།།