༢༠༡༧ ཟླ་ ༡༡ ཚེས་ ༣༠ རེས་གཟའ་ཕུར་བུ།

༄༅། །ཕྱི་ལོ་ ༢༠༡༧ ཟླ་ ༡༡ ཚེས་ ༣༠ ཉིན་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ནས་ལོ་ངོ་ཉི་ཤུ་རྩ་གཉིས་འཁོར་བའི་དུས་དྲན་མཛད་སྒོ་གཟབ་རྒྱས་ཤིག་ཚོགས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠  ཡོལ་ཙམ་ཐོག་སྐུ་མགྲོན་གཙ་ོབོ་གླིང་མཆོག་སྤྲུལ་རིན་པོ་ཆེ་མཆོག་དང་། བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག  ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ངེས་སྟོན་པ་བཀའ་ཟུར་སྐལ་བཟང་ཡེ་ཤེས་མཆོག  ནོར་གླིང་སྤྱི་ཁྱབ་འགན་འཛིན་བདེ་ཆེན་རྣམ་རྒྱལ་ལགས།

ནོར་གླིང་སྡེ་ཁག་སོ་སོའི་འགན་འཛིན་དང་དགེ་རྒན་སོགས་ཚང་འཛོམས་ཀྱི་ཐོག་མར་གླིང་མཆོག་སྤྲུལ་རིན་པོ་ཆེ་མཆོག་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་འགན་བཞེས་གནང་བར་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་ནོར་གླིང་ངེས་སྟོན་པ་བཀའ་ཟུར་སྐལ་བཟང་ཡེ་ཤེས་མཆོག་གིས་དབུས་སྡེ་ཁག་སོ་སོའི་འགན་འཛིན་དང་དགེ་རྒན་རྣམས་ནས་རྟེན་འབྲེལ་མཇལ་དར་ཕུལ་གྲུབ་མཚམས་ནོར་གླིང་སྤྱི་ཁྱབ་འགན་འཛིན་བདེ་ཆེན་རྣམ་རྒྱལ་ལགས་ཀྱིས་ནོར་གླིང་སྤྱི་ཡོངས་ཀྱི་ལོ་འཁོར་ལས་བསྡོམས་དང་ནོར་གླིང་ངེས་སྟོན་པ་བཀའ་ཟུར་སྐལ་བཟང་ཡེ་ཤེས་མཆོག་གིས་གསུང་བཤད་གནང་།

དེ་ནས་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གསུང་བཤད་གནང་དོན། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ནས་མི་ལོ་ངོ་ཉི་ཤུ་རྩ་གཉིས་ཧྲིལ་པོ་འཁོར་བའི་དུས་དྲན་མཛད་སྒོའི་ཐོག་ཆིབས་སྒྱུར་གནང་བའི་སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་དང་། དེ་བཞིན་ནོར་བུ་གླིང་ཁའི་ངེས་སྟོན་པ་བཀའ་བློན་ཁྲི་ཟུར་གཏན་ཞལ་རྣམ་གཉིས། འགན་འཛིན་ལྷན་ཚོགས་ཀྱི་ཚོགས་མི། ནོར་གླིང་འཛིན་སྐྱོང་འགན་འཛིན་གྱིས་གཙོས་ལས་བྱེད་ཡོངས་ལ་ངས་བོད་མིའི་སྒྲིག་འཛུགས་ཆོས་རིག་ལས་ཁུངས་དང་ང་རང་སྒེར་ངོས་ནས་ཚང་མར་སྙིང་ཐག་པ་ནས་འཚམས་འདྲིའི་བཀྲ་ཤིས་བདེ་ལེགས་ཞུ་འདོད་བྱུང་། 

དེ་རིང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དབུ་བརྙེས་ནས་ལོ་ངོ་ཉི་ཤུ་རྩ་གཉིས་འཁོར་བའི་དུས་དྲན་མཛད་སྒོ་དང་། ལོ་ངོ་དེ་དག་རིང་གང་ས་ཅི་ཐད་ཡར་རྒྱས་གོང་འཕེལ་དང་གཟི་བརྗིད་ཅན་ཞིག་ཆགས་ཡོད་སྟབས། ནོར་བུ་གླིང་ཁའི་དབུ་ལས་ཡོངས་ལ་དམིགས་བསལ་གྱི་བསྔགས་བརྗོད་དང་འཚམས་འདྲིའི་བཀྲ་ཤིས་བདེ་ལེགས་ཡོད། དེ་རིང་ངས་སྐད་ཆ་མང་པོ་བཤད་མི་དགོས་པ་གཙོ་འདོན་བྱེད་རྒྱུ་ཡིན། འོན་ཀྱང་ས་བཅད་མ་སྟོང་ཙམ་སླད་དོན་ཚན་ཁ་ཤས་ཤིག་ཞུས་པ་ཡིན་ན།  ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་འདི་ཚོགས་པ་སྤྱི་དང་དེའི་ནང་ནས་འགན་འཛིན་ལྷན་ཚོགས་ཀྱི་ཚོགས་གཙོར་སྐྱབས་རྗེ་གླིང་མཆོག་སྤྲུལ་རིན་པོ་ཆེ་མཆོག་གིས་ཚོགས་གཙོའི་མཚན་བཞེས་གནང་བར་གང་ས་ཅི་ཐད་ནས་ཧ་ཅང་ཡག་པོ་བྱུང་འདུག

དེ་དང་ཆབས་ཅིག་རིན་པོ་ཆེ་མཆོག་གིས་མཚན་བཞེས་གནང་བར་སྙིང་ཐག་པ་ནས་བཀའ་དྲིན་ཆེ་ཞེས་ཞུ་རྒྱུ་དང་དུས་ཚོད་གནས་སྟངས་ཀྱི་ཆ་ནས་ཚང་མས་མཁྱེན་གསལ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་ནའི་འབབ་དང་། བར་ལམ་ཕྱི་ལོ་ ༢༠༡༡ ནས་བཟུང་ཆབ་སྲིད་དང་འཛིན་སྐྱོང་གི་མཛད་འགན་མང་པོ་ཞིག་ནས་བགྲེས་ཡོལ་དུ་ཕེབས་ཡོད་སྟབས། དེ་སྔ་ཚོགས་གཙོ་སོགས་ཀྱི་མཚན་བཞེས་གནང་བ་དེ་དག་རིམ་པས་འཐེན་གནང་ཡོད་པ་དེ་འདྲའི་ཐོག་ནས་ནོར་གླིང་ལའང་དེ་ལྟར་བྱུང་བ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགུང་ནའི་འབབ་སོགས་ལ་དགོངས་བཞེས་གནང་སྟེ་གླིང་མཆོག་སྤྲུལ་རིན་པོ་ཆེ་མཆོག་ལྟ་བུའི་སྐུ་ཚབ་ལྟ་བུ་གནང་ནས་མཚན་བཞེས་དང་འགན་འཁུར་གནང་རྒྱུ་རང་བཞིན་གྱི་འོས་བབ་ཆེན་པོ་ཞིག་དང་དགོས་གལ་ཆེན་པོ་ཞིག་ཆགས་ཀྱི་ཡོད་སྟབས། དེ་དག་ལ་ང་ཚོས་ངོས་འཛིན་དང་འབྲེལ་གལ་ཆེན་པོ་རྩི་རྒྱུ་དང་། དེ་བཞིན་གླིང་མཆོག་སྤྲུལ་རིན་པོ་ཆེ་མཆོག་གིས་ཀྱང་དེ་ཚོའི་ཐོག་ཐུགས་འཁུར་ཆེ་བཞེས་གནང་རོགས་གནང་ཞེས་ཞུ་རྒྱུ་དང་། མཚན་བཞེས་པ་ཙམ་གྱི་ཕན་ཐོགས་ཆེན་པོ་ཡོང་གི་རེད། དེའི་རིང་ནོར་གླིང་གི་ལས་དོན་ཆེ་ཕྲ་ཡོངས་རྫོགས་སྔར་ལྷག་ཡོང་བའི་ཡིད་ཆེས་དང་རེ་བ་ཞུ་གི་ཡོད།  ལྷག་པར་ནོར་གླིང་ལྟ་བུ་ཡིན་ན། གང་ས་ཅི་ཐད་ནས་ཏག་ཏག་ཡོད་དུས་ཚོགས་གཙོའི་མཚན་གནས་བཞེས་སྐབས་དམིགས་བསལ་གྱི་སྐུ་ངལ་རིགས་དེ་འདྲ་ཕལ་ཆེར་འཕྲད་ཀྱི་མ་རེད། 

གཉིས་པ་ནི། ནོར་གླིང་དབུས་བརྙེས་ནས་ལོ་ ༢༢ འགྲོ་གི་ཡོད། ཚོགས་པ་ཅི་འདྲ་ཞིག་ཡིན་རུང་དཀའ་ངལ་འཕེལ་སྒྲིབ་སྣ་ཚོགས་ཡོང་གི་ཡོད། ནོར་གླིང་ལའང་ཕྲན་བུ་ཏན་ཏན་བྱུང་ཡོད་ངེས་རེད། ད་ལྟའི་ཆར་བསྡོམས་རྒྱག་ནས་ལྟ་བ་ཡིན་ན། ཧ་ལས་པའི་གྲུབ་འབྲས་ཆེན་པོ་དང་བོད་ཀྱི་བསྟན་སྲིད་དང་རིག་གཞུང་ཟེར་ནའང་མིན་འདུག དེ་ཚོའི་ཐོག་ཞབས་ཞུ་ཧ་ལས་པ་སྒྲུབ་བཞིན་ཡོད་པའི་ཚོར་སྣང་བཅོས་མ་མིན་པ་ཞིག་བྱུང་། དེར་བརྟེན་དེ་ཚོའི་ཐོག་ལ་གཙོ་བོ་བཀའ་ཟུར་གཏན་ཞལ་རྣམ་གཉིས་ཀྱིས་དེའི་ཐོག་འགན་འཁུར་ཆེ་བཞེས་གནང་བའི་ཐོག་གཤམ་འོག་ཏུ་ཞབས་ཞུ་བསྒྲུབ་མཁན་ཚོས་ཧུར་ཐག་གནང་བར་བརྟེན་བྱུང་ཡོད། ད་ལྟ་གནས་སྟངས་ཧ་ཅང་ཡག་པོ་འདུག ཚང་མར་བསྔགས་བརྗོད་དང་བཀའ་དྲིན་ཆེ་ཞེས་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་།།