༢༠༡༧ ཟླ་ ༡༡ ཚེས་ ༢༡ རེས་གཟའ་མིག་དམར།

༄༅། །དཔལ་ལྡན་སྲིད་སྐྱོང་མཆོག་ཁེ་ན་ཌའི་གྲོང་ཁྱེར་ཊོ་རོན་ཊོའི་ནང་གི་ལས་དོན་རྣམས་ཡོངས་སུ་ལེགས་གྲུབ་རྗེས་ཕྱི་ལོ་ ༢༠༡༧ ཟླ་ ༡༡ ཚེས་ ༢༠ ཉིན་གྱི་སྔ་དྲོ་ཁེ་ན་ཌའི་གྲོང་ཁྱེར་ཨོ་ཊ་ཝར་ Ottawa ཕེབས་འབྱོར་བྱུང་འདུག   དེ་ཡང་སྲིད་སྐྱོང་མཆོག་གིས་གྲོང་ཁྱེར་ཨོ་ཊ་བའི་ནང་ཁེ་ན་ཌའི་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་གནང་བ་མ་ཟད། རྒྱལ་ཡོངས་གསར་འགྱུར་བརྙན་འཕྲིན་ལས་ཁང་ CBC ནང་དབང་ཆ་དང་ཆབ་སྲིད།  ཅེས་པའི་གནད་དོན་ཐོག་གླེང་མོལ་དང་ཆེད་དོན་དྲི་བར་ལན་འདེབས་གནང་འདུག   སྐབས་དེར་སྲིད་སྐྱོང་མཆོག་ནས་དབུ་མའི་ལམ་གྱི་སྲིད་བྱུས་སྐོར་ཞིབ་ཕྲ་འགྲེལ་བརྗོད་གནང་བ་དང་སྦྲགས། བོད་མི་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་ཁ་བྲལ་གྱི་རང་བཙན་མ་རྩོད་པར་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་རྩོད་བཞིན་ཡོད་པ་སོགས་གསུངས།

ཕྱེད་ཡོལ་ས་གནས་བོད་མི་ཚོས་དགོང་དྲོའི་གསོལ་སྟོན་ཐོག་ཕེབས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་ཉག་གཅིག་ལ་བརྟེན་ནས་བོད་མི་བཙན་བྱོལ་བ་རྣམས་རང་གི་རྐང་པའི་སྒང་ལང་ཐུབ་པ་དང་།  ད་ཆ་༸གོང་ས་མཆོག་གི་ཐུགས་དགོངས་ལྟར་བོད་མིའི་ཆོས་དང་རིག་གཞུང་། སྐད་ཡིག་སོགས་སྲུང་སྐྱོབ་བྱས་ནས་མི་རབས་རྒན་པ་ཚོས་གཞོན་པ་ཚོར་བརྒྱུད་སྤྲོད་བྱ་དགོས་པ་དང་། ལྷག་པར་བཙན་བྱོལ་བོད་མིའི་སྤྱི་ཚོགས་ཁྲོད་ཆོལ་ཁ་ཆོས་ལུགས་ཀྱི་འཐེན་འཁྱེར་མེད་པར་ཟོང་ཁ་ཆིག་སྒྲིལ་དགོས་གལ་ཆེ་སྐོར་སོགས་གསུངས།

དེ་ཡང་སྲིད་སྐྱོང་མཆོག་གིས་མཇལ་འཕྲད་གནང་བའི་གྲོས་ཚོགས་འཐུས་མི་རྣམས་ནི་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་ར་ནི་མཆོག་ Arif Virani དང་། སོ་ནམ་སྡེ་ཚན་གྱི་ཚོགས་མི་སྐུ་ཞབས་ Paul Degiacomo མཆོག་དང་ Gayle Tuner  མཆོག་བཅས་དང་མཇལ་འཕྲད་གནང་འདུག

ཕྱོགས་མཚུངས་གུ་ཡངས་ཆབ་སྲིད་ཚོགས་པའི་སྤྱི་འབངས་ཆབ་སྲིད་ལས་དོན་གྱི་འགན་འཛིན་ Director of  Public policy  ལྕམ་སྐུ་ལེན་སེ་མར་ཊིན་ Linsay Martens མཆོག་དང་།

PFT  ཆབ་སྲིད་ཚོགས་པའི་ཚོགས་གཞོན་སྐུ་ཞབས་Garnett Genuis མཆོག་བཅས་དང་མཇལ་འཕྲད་གནང་ནས་བཀའ་ཤག་གི་ཕྱག་རྟགས་འབུལ་ལམ་ཞུས་འདུག  ཁུལ་དེའི་ལས་དོན་རྣམས་ཡོངས་སུ་ལེགས་གྲུབ་རྗེས་སྲིད་སྐྱོང་མཆོག་ཨིན་ཇིའི་རྒྱལ་ས་ལོན་ཌོན་དུ་ཕེབས་ཐོན་གནང་རྒྱུ་ཡིན་པ་བཅས།།

 .