༢༠༡༧ ཟླ་ ༡༡ ཚེས་ ༦ རེས་གཟའ་ཟླ་བ།

༄༅། །ཕྱི་ལོ་ ༢༠༡༧ ཟླ་ ༡༡ ཚེས་ ༥ རེས་གཟའ་ཉི་མའི་སྔ་དྲོ་ཆུ་ཚོད་ ༩ ཐོག་རྡ་ས་བཙུན་དགོན་སྒྲོལ་མ་གླིང་རིགས་ལམ་སློབ་གཉེར་ཁང་དུ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་། དམིགས་བསལ་སྐུ་མགྲོན་བུད་མེད་ལྷན་ཚོགས་ཀྱི་ཚོགས་གཙོ་སྒྲོལ་མ་གཡང་ཅན་ལགས་དབུ་བཞུགས་ཐོག བཙུན་མའི་ཚད་མའི་དགུན་ཆོས་རྒྱས་འཛོམས་ཀྱི་མཛད་སྒོའི་སྐབས་ལོ་རྒྱུས་རང་བཞིན་ལྡན་པའི་དགེ་བཤེས་མའི་དམ་འཇོག་འབུལ་ཟིན་ནས་དགེ་བཤེས་མའི་སློབ་ཐོན་མཛད་སྒོ་ཐེངས་གཉིས་པ་ཚོགས་ཡོད།

སྐབས་དེར་ཐོག་མར་དབུ་མཛད་ལགས་ནས་སངས་རྒྱས་ཆོས་ཚོགས་མ་དང་། པཎ་གྲུབ་བསྟོད་ཆེན་སོགས་གསུང་བསྟུན་སྐུ་མགྲོན་སྐུ་མགྲོན་གཙོ་བོ་མཆོག་ནས་སྣང་གསལ་ཞལ་ཕྱེ་གནང་བ་དང་སྦྲགས། གསོལ་ཇ་འབྲས་སིལ་འདེགས་འབུལ་ཞུས།

དེ་ནས་དགེ་བཤེས་མའི་རྒྱུགས་སྤྲོད་དོ་དམ་ལྷན་ཚོགས་ཀྱི་རྒྱུན་ལས་ཚོགས་མི་དང་བོད་ཀྱི་བཙུན་མའི་ལས་འཆར་གྱི་ངེས་སྟོན་པ་གཞོན་པ། བཙུན་མ་བློ་བཟང་བདེ་ཆེན་ལགས་ཀྱིས་མཛད་རིམ་ངོ་སྤྲོད་གནང་།  དེ་རྗེས་བཙུན་མའི་ཚད་མའི་དགུན་ཆོས་ཚོགས་ཡུལ་བཙུན་དགོན་སྒྲོལ་མ་གླིང་གི་སློབ་སྤྱི་དགེ་བཤེས་ངག་དབང་བསྟན་འཛིན་ལགས་ཀྱིས་གསུང་བཤད་གནང་རྗེས། དགེ་བཤེས་མའི་རྒྱུགས་སྤྲོད་དོ་དམ་ལྷན་ཚོགས་ཀྱི་ཚོགས་གཙོ་དགེ་ལྡན་ཆོས་གླིང་གི་མཁན་པོ་དགེ་བཤེས་ཡོན་ཏན་རྒྱ་མཚོས་གསུང་བཤད་གནང་།

དེ་རྗེས་ཆོས་རིག་བཀའ་བློན་མཆོག་གཡུ་ཐོག་ཀརྨ་དགེ་ལེགས་མཆོག་གིས་མཛད་སྒོ་དང་འབྲེལ་བའི་གསུང་བཤད་གནང་དོན། དེ་རིང་སྐབས་གཉིས་པའི་དགེ་བཤེས་མའི་རྒྱུགས་སྤྲོད་མཛད་སྒོ་འདིའི་ཐོག་ལ་ཕེབས་པའི་བཙུན་དགོན་དགེ་ལྡན་ཆོས་གླིང་མཁན་རིན་པོ་ཆེ་རེད།  སྒྲོལ་མ་གླིང་གི་སློབ་སྤྱི་དགེ་བཤེས་ལགས།  དམིགས་བསལ་སྐུ་མགྲོན་བུད་མེད་ཚོགས་པའི་ཚོགས་གཙོ་མཆོག  དེ་བཞིན་དུ་བཙུན་མའི་ལས་འཆར་གྱི་ངེས་སྟོན་པ་གཞོན་པ། དགེ་བཤེས་མའི་རྒྱུགས་སྤྲོད་དོ་དམ་པའི་ཚོགས་གཙོ་དང་ཚོགས་མི། རྒྱུན་ལས་རྣམ་པ།  གཞན་ཡང་དམིགས་བསལ་སྐུ་ཚབ་དང་། སྐུ་མགྲོན་རྣམ་པ། དགེ་བཤེས་དང་དགེ་བཤེས་མ་རྣམ་པ།  བཙུན་མའི་ཚད་མའི་དགུན་ཆོས་ལ་ཆེད་དུ་བཙུན་དགོན་ཁག་ནས་ཕེབས་པའི་བཙུན་མ་རྣམ་པ།  ལྷག་པར་དུ་དེ་རིང་གི་དགེ་བཤེས་མའི་ཕྱག་འཁྱེར་བཞེས་མཁན་ཚོ་དམིགས་བསལ་གྱིས་ཚང་མ་ལ་ཐོག་མར་ངས་བོད་མིའི་སྒྲིག་འཛུགས་ཀྱི་ཆོས་རིགས་ལས་ཁུངས་དང་། སོ་སོ་སྒེར་ངོ་གནས་སྙིང་ཐག་པ་ནས་འཚམས་འདྲི་བཀྲ་ཤིས་བདེ་ལེགས་ཞུ་གི་ཡོད།  དེ་ག་ནང་བཞིན་དེ་རིང་གི་བཙུན་མའི་དགུན་ཆོས་རེད། 

དགེ་བཤེས་མའི་རྒྱུགས་སྤྲོད་ཀྱི་ལས་ཀ་རེད།  དེ་ཚོའི་ཐོག་ལ་ཕྱག་ལས་མང་པོ་ཞེ་དྲགས་ཡོད་པ་རེད།  དེ་ཚོའི་ཐོག་ལ་འགན་བཞེས་མཁན་དང་། ཕྱག་ལས་གནང་མཁན།  དེ་བཞིན་དུ་མཉམ་ཞུགས་གནང་མཁན། རོགས་སྐྱོར་གནང་མཁན།  དེ་ཚོ་ཚང་མ་ལ་དཔེ་མི་སྲིད་པའི་ཡག་པོ་བྱུང་འདུག  ཐུགས་རྗེ་ཆེ་ཞེས་ལེགས་གསོལ་བསྔགས་བརྗོད་ཞུ་འདོད་བྱུང་། དེ་རིང་གི་མཛད་སྒོ་སྟབས་བདེ་ཞིག་ཡིན་ཙང་། ངའི་དེ་གཞུང་འབྲེལ་གཏམ་བཤད་དང་། བང་སྒྲིག་པོ་ཡིག་ཐོག་ལ་བཀོད་བཞག་པ་དེ་འདྲ་མེད།  

དོན་ཚན་གསུམ་གི་ཐོག་ལ་ཞུ་འདོད་བྱུང་། དང་པོ།  དགེ་བཤེས་མའི་རྒྱུགས་སྤྲོད་ཀྱི་ལས་རིམ་དང་པོ་ག་འདྲ་བྱུང་མིན་ངས་འགྲེལ་བརྗོད་མི་དགོས་པ་བྱོས།  སྐབས་གཉིས་པའི་སྐབས་ཕེབས་ཡོད་པ་རེད།  དེའི་སྒང་ལ་གྲུབ་འབྲས་ཡག་པོ་སོན་པའི་ཐོག་ནས་ཕྱག་འཁྱེར་བཞེས་ཐུབ་མཁན་དགེ་བཤེས་མ་དྲུག་བྱུང་ཡོད་པ་རེད།

  ཁོང་རང་ཚོར་སླར་ཡང་འཚམས་འདྲི་ཞུ་བ་དང་ཆབས་གཅིག། ད་ང་ཚོས་དཀའ་ལས་ཞེ་པོ་ཞིག་བརྒྱབ་ནས་དགེ་བཤེས་དང་། དགེ་བཤེས་མ་ཞེས་ལོ་མང་པོར་འགྲིམས་ནས་ཡོང་གི་ཡོད་པ་རེད། དེ་ཐོན་ཚར་བའི་མཇུག་ལ་ལག་འཁྱེར་དེ་བླངས་ནས་འཐིམས་ནས་བསྡད་ན་མཁན་ཚ་བོ་ཆགས་གི་ཡོད་པ་རེད། ཧ་ཅང་གལ་ཆེན་པོ་བརྩིས་ནས་ལོ་མང་པོ་དཀའ་ལས་བརྒྱབ་པའི་གྲུབ་འབྲས་སོན་ཡོང་བའི་སྐབས་སུ་ད་གང་བྱེད་དགོས། ཞེས་པ་འདི་གལ་ཆེ་ཤོས་རེད། འདིའི་ཐོག་ལ་ཆིག་ཁ་ཤས་ཞུས་པའི་དབང་དུ་བཏང་ན། ང་ཚོས་གཏན་འབེབས་བྱས་པའི་དགེ་བཤེས་མའི་རྒྱུགས་སྤྲོད་ཀྱི་ལས་རིམ་འགྲོ་སྟངས་དང་མཐུན་པའི་ཐོག་ནས་ཚར་བ་རེད། 

རྩ་བའི་སློབ་གཉེར་ལ་ཚར་རྒྱུ་མེད་ནའང་། འབོད་སྐུལ་དང་འབྲེལ་བསམ་ཚུལ་འདྲ་ཞུས་པ་ཡིན་ན། དགེ་བཤེས་མ་ཐོན་མཁན་རྣམ་པ་ཚོ། དང་པོ་དགེ་བཤེས་མ་ཐོན་ཟིན་རྗེས་དུས་ཆོད་དང་གང་ས་ཅི་ཐད་ནས་རང་དབང་ཆེ་རུ་འགྲོ་གི་ཡོད་སྟབས། དཔེ་ཆར་ཐག་ཉེ་རུ་ཕྱིན་ནས་དེ་སྔ་བལྟས་མ་ཐུབ་པ་རྣམས་ལྟ་རྒྱུ་དང་། ད་དུང་མུ་མཐུད་སློབ་གཉེར་བྱེད་ནས་དཔེ་ཆ་དེ་དག་ཞིབ་ཚགས་པོ་གཟིགས་དགོས་རྒྱུ་ཧ་ཅང་གལ་ཆེན་པོ་རེད། ལྷག་པར་དཔེ་ཆ་ཡང་ཡང་གཟིགས་པའི་སྐབས་སུ་དེ་སྔ་རྩོད་པ་རྩོད་པའི་སྐབས་སུ་གང་ཙམ་འདར་ཤ་བཅད་ནས་ངེས་པ་འདྲ་རྙེད་ངེས་རེད། སོ་སོ་ལྷོད་ལྷོད་ངང་གུ་ཡངས་པོ་ཐོག་ཞིབ་འཇུག་བྱས་ནས་དཔེ་ཆ་འདྲ་མིན་ལྟ་དུས་དེ་སྔ་མི་འདྲ་བ་སོ་སོར་ངེས་པ་རྙེད་ཐུབ་པ་དེ་འདྲ་ཏན་ཏན་ཡོང་གི་ཡོད་ས་རེད། དེེར་བརྟེན་ཕྱག་དཔེ་མུ་མཐུད་གཟིགས་དགོས་རྒྱུ་གལ་ཆེན་པོ་རེད། 

གཉིས་པ་དེ་ལས་གལ་ཆེ་བ་ནི། ཕྱག་དཔེ་གཟིགས་རྗེས་བསྟན་པར་བྱ་བ་བྱེད་དགོས། བསྟན་པར་བྱ་བ་བྱེད་དུས་ལམ་སང་ཕྱི་རྒྱལ་ཡུལ་གྲུ་ཁག་ཏུ་བྱ་བ་བྱེད་རྒྱུ་ཡིན་པ་ལྟ་བུ་མིན་པར། སྔོན་ལ་ང་ཚོས་ཧ་ཅང་དཀའ་ལས་བརྒྱབ་ནས་བཙན་བྱོལ་ནང་ཡོད་པ་དེ་དག་རྒྱུན་འཛིན་དགོས་རྒྱུ་ཧ་ཅང་གལ་ཆེན་པོ་རེད། དེ་དག་ཧྲ་ཏག་ཏག་བྱུང་བ་ཡིན་ན། དེ་ནས་འོད་ཟེར་ལྟ་བུ་ག་ཚོད་འཕྲོ་འཕྲོ་ཡོང་གི་རེད། ཅེས་སོགས་ཀྱི་གསུང་བཤད་གནང་རྗེས་བོད་ཀྱི་བཙུན་མའི་ལས་འཆར་གྱི་ངེས་སྟོན་པ་གཞོན་པ། བཙུན་མ་བློ་བཟང་བདེ་ཆེན་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ་ཡོད་པ་བཅས།།