༢༠༡༧ ཟླ་ ༡༡ ཚེས་ ༢༠ རེས་གཟའ་ཟླ་བ།

༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྡི་ལིའི་ཁུལ་གྱི་མཛད་འཆར་ཁག་རེ་ཞིག་མཇུག་སྒྲིལ་ནས་གནམ་ཐང་དུ་༸ཞབས་སོར་འཁོད་མཚམས།  བཞུགས་སྒར་དུ་འཚམས་གཟིགས་སུ་ཕེབས་མཁན་ཨོ་གླིང་གྲོས་ཚོགས་ཀྱི་འཐུས་མི་བཞི་ལས་གྲུབ་པའི་སྐུ་ཚབ་ཚོགས་ཆུང་ལ་མཇལ་ཁ་དང་བཀའ་སློབ་སྩལ་འདུག

དེ་རྗེས་མཁའ་ལམ་བརྒྱུད་བྷུབ་ནེཤྭར་ Bhubaneswar་ གྲོང་ཁྱེར་གྱི་བྷི་ཇུ་པཌ་ནེཀ་གནམ་ཐང་དུ་༸ཞབས་སོར་བདེ་བར་འཁོད་སྐབས་མངའ་སྡེའི་བློན་ཆེན་སྐུ་ཞབས་སུརྱ་ན་ར་ཡན་པཏྲ་ Surya Naryana Patra མཆོག་གིས་གཞུང་འབྲེལ་གྱི་ཕེབས་བསུའི་སྣེ་ལེན་རྒྱ་ཆེ་ཞུས་འདུག་པ་མ་ཟད།  མངའ་སྡེའི་ཡུལ་སྐོར་སྤྲོ་འཆམ་བློན་ཆེན་སྐུ་ཞབས་ཨ་ཤོཀ་པན་ཌ་ Ashok Panda མཆོག་དང་དྲུང་ཆེ་ལྕམ་སྐུ་མོ་ན་ཤརྨ་ Mrs Mona Sharma མཆོག  དེ་བཞིན་གདན་ཞུ་གོ་སྒྲིག་ཞུ་མཁན་ཀ་ལིངྒ་སྤྱི་ཚོགས་ཚན་རིག་བསྟི་གནས་ཁང་ Kalinga Institute of Social Sciences གི་འགན་འཛིན་སྐུ་ཞབས་ཨ་ཆུཏྱ་ས་མན་ཏ་ Prof Achyuta Samanta མཆོག  དེ་བཞིན་ཨོ་རི་ས་ཕུན་ཚོགས་གླིང་གི་ས་གནས་འགོ་འཛིན་དང་། ལྷུན་པོ་རིན་པོ་ཆེ་མཆོག་བཅས་ཀྱང་ཕེབས་བསུར་བཅར་འདུག

གནམ་ཐང་གི་ཕྱི་རོལ་དུ་བོད་མི་གཙོ་བོར་གྱུར་བའི་དད་ལྡན་སེར་སྐྱ་མཆོག་དམན་ཀུན་གྱིས་དགའ་དད་སྤྲོ་གསུམ་གྱི་སྒོ་ནས་ཕེབས་བསུའི་སྣེ་ལེན་གཟབ་རྒྱས་ཞུས་འདུག  དེ་རྗེས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ན་ཝིན་པཌ་ནེཀ་མཆོག་གི་བཞུགས་གནས་སུ་༸ཞབས་སོར་འཁོད་མཚམས་མངའ་སྡེའི་སྤྱི་ཁྱབ་བློན་ཆེན་མཆོག་གིས་༸གོང་ས་མཆོག་ལ་འཚམས་འདྲི་གཟབ་རྒྱས་ཞུས་པ་མ་ཟད། དབུ་ཁྲིད་རྣམ་གཉིས་འཁྱུག་ཙམ་རིང་མཇལ་མོལ་མཛད།

སྐབས་དེར་གསར་འགོད་པ་རྣམས་ཀྱི་དྲི་བ་དང་འབྲེལ་༸གོང་ས་མཆོག་གིས་སྐུ་ཞབས་ན་ཝིན་པཌ་པེཀ་མཆོག་ནི་མངའ་སྡེའི་སྤྱི་ཁྱབ་བློན་ཆེན་ཁྲོད་དུས་ཡུན་རིང་ཤོས་དབུ་ཁྲིད་གནང་མཁན་ཞིག་ཡིན་སྐོར་དང་།  མངའ་གཞུང་ནས་བོད་མི་བཙན་བྱོལ་བ་རྣམས་ལ་ད་བར་མཐུན་འགྱུར་རོགས་རམ་རྒྱ་ཆེ་གནང་བར་ཐུགས་རྗེ་ཆེ་གསུང་གྲུབ་བསྟུན་བཞུགས་གནས་གསོལ་མགྲོན་ཁང་དུ་ཆིབས་༸ཞལ་སྒྱུར་གནང་མཛད་ཡོད་པ་བཅས།།