༢༠༡༧ ཟླ་ ༡༡ ཚེས་ ༢༠ རེས་གཟའ་ཟླ་བ།

བསྟི་གནས་ཁང་གི་འགན་འཛིན་མཆོག་དང་དེ་སྔའི་མཇལ་འཕྲད་སྐབས།

༄༅། །རྒྱ་གར་ཨོ་ཌི་ས་མངའ་སྡེའི་ནང་རྟེན་གཞི་བྱས་པའི་ཀ་ལིངྒ་སྤྱི་ཚོགས་ཚན་རིག་བསྟི་གནས་ཁང་ Kalinga Institute of Social Sciences གིས་འགྲོ་བ་མིའི་བཟང་སྤྱོད་ཀྱི་གཟེངས་རྟགས་ཐེངས་ ༡༠ 10th KISS Humanitarian Award བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འབུལ་ལམ་ཞུ་རྒྱུ་ཡིན་འདུག དེ་ཡང་ཀ་ལིངྒ་བརྙན་འཕྲིན་གསར་འགྱུར་ཚན་པས་ Kalingatv.com གནས་ཚུལ་སྤེལ་བ་ལྟར་ན།  གཟེངས་རྟགས་དེ་ཕྱི་ཟླ་ ༡༡ ཚེས་ ༢༡ ཉིན་འབུལ་ལམ་ཞུ་རྒྱུ་མ་ཟད། སྐབས་དེར་༸གོང་ས་མཆོག་གིས་བསྟི་གནས་ཁང་གི་གདོད་མའི་མི་རིགས་ཀྱི་སློབ་ཕྲུག་གྲངས་ ༢༧༠༠༠ བརྒལ་བར་བླང་དོར་བཀའ་སློབ་སྩལ་གནང་མཛད་རྒྱུ་ཡིན་འདུག

སྤྱིར་བསྟི་གནས་ཁང་གི་འགྲོ་བ་མིའི་བཟང་སྤྱོད་ཀྱི་གཟེངས་རྟགས་དེ་ཐོག་མར་ཕྱི་ལོ་ ༢༠༠༨ ལོར་ཐོག་མར་གསར་འཛུགས་གནང་བ་ནས་ད་བར་འཛམ་གླིང་འགྲོ་བ་མིའི་བཟང་སྤྱོད་ཀྱི་འགན་ཁུར་ཐོག་ནས་གཟེངས་སུ་ཐོན་པའི་བྱས་རྗེས་འཇོག་མཁན་ཚོར་འབུལ་སྲོལ་ཡོད་པ་ཞིག་ཡིན་འདུག   གཟེངས་རྟགས་གསར་གཏོད་གནང་མཁན་བསྟི་གནས་ཁང་གི་འགན་འཛིན་སྐུ་ཞབས་ཨ་ཆུཏྱ་ས་མན་ཏ་ Dr. Achyuta Samanta མཆོག་ཡིན་པ་དང་།    ད་བར་གཟེངས་རྟགས་དེ་བཞེས་མཁན་གྲས་མོ་རེ་ཤེ་སི་ Mauritius ཡུལ་གྱི་སྲིད་འཛིན་སྐུ་ཞབས་ཨ་ནི་རོཌ་ཇུག་པོཐ་མཆོག Sir Anerood Jugnauth  དང་། འབྲུག་གི་སྲིད་བློན་འཇིག་མེད་འཕྲིན་ལས་མཆོག་སོགས་ཡོད་འདུག

དེ་ཡང་༸གོང་ས་མཆོག་ཕྱི་ཟླ་ ༡༡ ཚེས་ ༡༩ ཉིན་ལྡི་ལིའི་ནང་གི་མཛད་འཕྲིན་ཁག་རེ་ཞིག་ལེགས་པར་གྲུབ་རྗེས་ཕྱི་ཚེས་ ༢༠ ཉིན་ཨོ་ཌི་སའི་མངའ་སྡེའི་རྒྱལ་ས་བྷུབ་ནེཤྭར་ཕྱོགས་སུ་ཆིབས་༸ཞལ་སྒྱུར་གནང་མཛད་ཡོད་པ་བཅས།།