༢༠༡༧ ཟླ་ ༡༠ ཚེས་ ༤ རེས་གཟའ་ལྷག་པ།
༄༅། །ཕྱི་ལོ་ ༢༠༡༧ ཟླ་ ༡༠ ཚེས་ ༤ ནས་ ༦ བར་ཉིན་གྲངས་གསུམ་རིང་དབུས་བོད་ཀྱི་སྨན་རྩིས་མཐོ་སློབ་ཚོགས་ཁང་དུ་བོད་ཀྱི་སྨན་རྩིས་ཁང་གི་ལུས་སེམས་སྲོག་གི་སྡེ་ཚན་གྱི་གོ་སྒྲིག་འོག་ལུས་སེམས་སྲོག་གི་བགྲོ་གླེང་ཚོགས་ཆེན་ཐེངས་ལྔ་པ་དབུ་འབྱེད་ཀྱི་མཛད་སྒོ་ཚོགས་ཡོད།
དེ་ཡང་ཕྱི་ཚེས་ ༤ ཉིན་གྱི་ཕྱེད་ཡོལ་ཆུ་ཚོད་ ༢ ཐོག་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་དང་། ཁྲིམས་ཞིབ་པ་གཞན་རྣམ་གཉིས་མཆོག བཀའ་ཟུར་ཀིརྟི་རིན་པོ་ཆེ་མཆོག སྤྱི་ཁྱབ་རྩིས་ཞིབ་འགན་འཛིན་མགོན་པོ་ཕུན་ཚོགས་ལགས། འོས་བསྡུ་དང་འདེམས་ལྷན་ཚོགས་གཙོ་ཤོ་ཟུར་བསོད་ནམས་ཆོས་འཕེལ་མཆོག བོད་ཀྱི་སྨན་རྩིས་ཁང་གི་ངེས་སྟོན་པ། གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་རྣམ་པ། གདན་ཞུས་གཏམ་བཤད་གནང་མཁན་རྣམ་པ། བོད་ཁྱིམ་སེ་ལ་ཀུའི་ཚན་རིག་སློབ་ཕྲུག་ཁག་གཅིག འབྲེལ་ཡོད་ལས་བྱེད་དང་སྨན་སློབ། ཚོགས་བཅར་བ་བཅས་ཁྱོན་མི་གྲངས་ ༤༠༠ བརྒལ་བ་ལྷན་ཚོགས་ཀྱིས་ཐོག་མར་སྐུ་མགྲོན་གཙོ་བོ་འཕྲོད་བསྟེན་བཀའ་བློན་མཆོག་གིས་སྣང་གསལ་ཞལ་ཕྱེ་གྲུབ་བསྟུན་གཡུ་ཐོག་གསོལ་འདེབས་རྟ་དབྱངས་གསུང་འདོན་དང་སྦྲགས་རྟེན་འབྱུང་གསོལ་ཇ་འབྲས་སིལ་འདེགས་འབུལ་ཞུས།
དེ་ནས་ལུས་སེམས་སྲོག་གི་འགན་འཛིན་དགེ་བཤེས་བསྟན་པ་བཀྲ་ཤིས་ལགས་ཀྱིས་ཕེབས་བསུའི་གསུང་བཤད་གནང་དོན། དེ་རིང་གི་ཚོགས་ཆེན་འདི་ལུས་སེམས་སྲོག་གི་བགྲོ་གླེང་ཚོགས་ཆེན་ཐེངས་ལྔ་པ་ཡིན། འདས་པའི་ཚོགས་ཆེན་ཐེངས་བཞི་ཚོགས་པའི་བརྒྱུད་རིམ་ནང་རིག་གཞུང་འདྲ་མིན་གྱི་ལེགས་བྱང་བརྗེ་རེས་དང་། ཉམས་མྱོང་སྤེལ་རེས། བསམ་ཚུལ་དང་ལྟ་ཚུལ་གླེང་རེས་གནང་སྟེ་གྲུབ་འབྲས་གང་ཙམ་ཐོབ་ཡོད་ཅེས་བརྗོད་ཆོག
བགྲོ་གླེང་རིམ་པའི་ནང་འགྲོ་བ་མིའི་སེམས་ཁམས་བདེ་ཐབས་དང་དེ་འབྲེལ་ཤེས་བྱའི་གོ་རྟོགས་གོང་སྤེལ་གཏོང་རྒྱུ་དམིགས་འབེན་དུ་བཟུང་ནས་ཚོགས་ཡོད་ལ། ཚོགས་ཆེན་རེ་རེའི་སྐབས་ཀྱི་གསུང་བཤད་ཁག་ཕྱོགས་བསྡུས་ཀྱིས་དེབ་ཕྲེང་རྒྱས་བསྡུས་གཉིས་རེ་བོད་ཨིན་གཉིས་ཀའི་ནང་དཔར་འགྲེམ་བྱེད་བཞིན་ཡོད། འདི་ལོར་ཡང་འགྲོ་བ་མིའི་སེམས་ནད་སྔོན་འགོག་བྱེད་ཐབས་ཀྱི་བརྗོད་གཞིའི་ཐོག་བགྲོ་གླེང་ཁག་གཉིས་གོ་སྒྲིག་ཞུ་གི་ཡོད། ཅེས་སོགས་ཀྱི་གསུང་བཤད་གནང་།
དེ་རྗེས་སྐུ་མགྲོན་གཙོ་བོ་མཆོག་གིས་དཔེ་དེབ་ཁག་གཅིག་དབུ་འབྱེད་གནང་སྟེ་ཚོགས་བཅར་བ་ཡོངས་ལ་འཚམས་འདྲི་དང་ཆབས་ཅིག་གསུང་བཤད་གནང་དོན། ཐེངས་འདིར་ཉི་ཧོང་གི་མཁས་དབང་ཞིག་བཞུགས་སྒར་དུ་ཕེབས་ནས་ཁོང་གི་མཚན་ཐོག་ནས་ཏ་ཀ་སུ་གཟེངས་རྟགས་ཞེས་པ་དཔལ་ལྡན་སྲིད་སྐྱོང་མཆོག་ལ་འབུལ་རྒྱུའི་མཛད་སྒོ་ཞིག་དང་། རྒྱལ་སྤྱིའི་བོད་དོན་ལས་འགུལ་ཁང་གྱི་སྐུ་ཚབ་རྣམ་པ་འདིར་ཕེབས་ཡོད་པ། དེ་བཞིན་ཕྱི་རྒྱལ་ཁག་ལ་ཡོད་པའི་བོད་རྒྱ་འབྲེལ་མཐུད་ཀྱི་སྐུ་མགྲོན་རྣམ་པ་རིམ་བཞིན་གདན་འདྲེན་ཞུས་པ་སོགས་ལ་བརྟེན་དཔལ་ལྡན་སྲིད་སྐྱོང་མཆོག་དེ་རིང་ཚོགས་འདུར་བཅར་མ་ཐུབ་པའི་གནས་སྟངས་ཤིག་ཆགས་སོང་། དེའི་ཐོག་ལ་བཟོད་སྲན་ཞུ་རོགས་ཞུ་རྒྱུ་ཡིན།
དེ་རིང་ལུས་སེམས་སྲོག་གི་བགྲོ་གླེང་ཚོགས་འདུའི་ཐོག་ལ་རང་ཉིད་ཡིན་ནའང་བཅར་ཐེངས་གཉིས་པ་ཆགས་བཞིན་འདུག དེ་སྔ་བགྲོ་གླེང་ཐེངས་བཞི་པའི་ཐོག་ལ་བཅར་བའི་སྐབས་སྙན་གསེང་ཞུ་རྒྱུ་བྱུང་།
སེམས་ཁམས་འཕྲུག་པའི་ནད་གཞི་ Mental Disorder དེར་རྒྱལ་སྤྱིའི་ནང་ཉིན་རེ་དང་ཟླ་རེ། དེ་བཞིན་ལོ་རེའི་ནང་དོ་སྣང་ཇེ་ཆེར་འགྲོ་བཞིན་ཡོད་སྟབས་དེར་ང་ཚོས་དོ་སྣང་སྣང་དགོས་པ་གནད་འགག་ཆགས་ཀྱི་ཡོད་ས་རེད། དེར་བརྟེན་ད་ལྟའི་གནས་བབ་ལ་དཔེར་ན། འཛམ་གླིང་འཕྲོད་བསྟེན་ལྷན་ཚོགས་ཐོག་ནས་ལྟ་སྟངས་ཞུས་པ་ཡིན་ན། ཁོ་རང་ཚོའི་སྙན་ཐོའི་ནང་མི་ས་ཡ་ལྔ་བཅུ་ཙམ་ལ་སེམས་ཁམས་ཐོག་ནས་ནད་གཞི་འདྲ་མིན་འཕོག་པའི་གནས་སྟངས་འཁོད་འདུག
མི་བཅུ་འདས་གྲོངས་སུ་འགྲོ་གི་ཡོད་ན། དེའི་ནང་ནས་མི་ལྔ་ཙམ་སེམས་ཁམས་རྐྱེན་པས་ཚེ་མ་རྫོགས་སྔོན་ནས་འཆི་འགྲོ་བཞིན་པའི་གནས་སྟངས་དེ་འདྲ་ཡོང་བཞིན་ཡོད་པ་འཁོད་འདུག དེར་བརྟེན་སེམས་ཁམས་འཕྲོད་བསྟེན་འདི་ཡག་པོ་ཞིག་མེད་པའི་རྐྱེན་གྱིས་སྤྱི་ཚོགས་ནང་དཀའ་ལས་འཕར་མ་ཞིག་འཕྲད་བཞིན་ཡོད།
དཔལ་འབྱོར་དང་བདེ་འཇགས། སྤྱི་ཡོངས་ཀྱི་འཕྲོད་བསྟེན་གནས་བབ་ཡིན་ནའང་རེད། དེ་འདྲའི་ཐོག་ལ་དཀའ་ངལ་མང་པོ་ཞིག་བཟོ་གི་ཡོད་པ་དེ་སྔ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་ཡོད། ང་ཚོའི་སྤྱི་ཚོགས་ནང་འཕྲོད་བསྟེན་ཐོག་སྔོན་འགོག་དགོས་རྒྱུ་གནད་འགག་ཆེན་པོ་རེད། ཅེས་གསུང་པ་ལྟར་ལུས་སེམས་སྲོག་གི་སྡེ་ཚན་གྱི་སེམས་ཁམས་འཕྲོད་བསྟེན་གྱི་ནད་རིགས་སྔོན་འགོག་རང་གི་ཐོག་དགོངས་པ་བཞེས་ཏེ་བགྲོ་གླེང་ཚོགས་འདུ་འཚོགས་བཞིན་ཡོད། ཅེས་སོགས་ཀྱི་གསུང་བཤད་གནང་ཡོད་པ་བཅས།།
