༢༠༡༧ ཟླ་ ༡༠ ཚེས་ ༡༤ རེས་གཟའ་སྤེན་པ།
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། རྡ་ས་བོད་ཀྱི་དཔེ་མཛོད་ཁང་དུ་མི་རིགས་འདྲེས་མའི་བོད་རིགས་ཚོགས་འདུ་ཐེངས་གསུམ་པ་འཚོགས་བཞིན་པ་དང་བསྟུན། ཕྱི་ལོ་ ༢༠༡༧ ཟླ་ ༡༠ ཚེས་ ༡༡ ཉིན་མི་རིགས་འདྲེས་མའི་བོད་རིགས་ན་གཞོན་ཁག་ཅིག་བོད་མི་མང་སྤྱི་འཐུས་ལྷན་ཁང་དུ་ཕེབས་པར་དཔལ་ལྡན་ཚོགས་གཞོན་ཨཅཱརྱ་ཡེ་ཤེས་ཕུན་ཚོགས་མཆོག་གིས་འཚམས་འདྲི་གནང་འདུག
དེ་རྗེས་གྲོས་ཚོགས་ཀྱི་ཚོགས་ཁང་ནང་དཔལ་ལྡན་ཚོགས་གཞོན་མཆོག་ནས་བོད་མིའི་སྒྲིག་འཛུགས་ཀྱི་སྒྲོམ་གཞི་དང་། བོད་མི་མང་སྤྱི་འཐུས་ལྷན་ཚོགས་ཀྱི་གྲུབ་ཆ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་གནང་ཕྱོགས། དེ་བཞིན་རྒྱལ་སྤྱིའི་ནང་ཡོད་པའི་བོད་དོན་རྒྱབ་སྐྱོར་ཚོགས་པ་དང་། རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པ། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་ལྷན་ཚོགས་སོགས་ཀྱི་སྐོར་ལ་འགྲེལ་བརྗོད་གནང་བ་མ་ཟད། ཁོང་རྣམས་ལ་བོད་ཀྱི་དངོས་ཡོད་ལོ་རྒྱུས་ཤེས་པའི་ཐོག་ནས་ཕྱིར་རང་ཡུལ་དུ་འབྱོར་མཚམས་གནས་ཡུལ་རྒྱལ་ཁབ་སོ་སོའི་གྲོས་ཚོགས་འཐུས་མི་དང་། གཞུང་གི་གནད་ཡོད་འགོ་ཁྲིད་མི་སྣ་སོགས་ལ་བོད་དོན་ཐོག་རྒྱབ་སྐྱོར་གནང་ཆེད་ཞུ་གཏུག་གི་ལས་འགུལ་སྤེལ་ཐབས་གནང་དགོས་པའི་རེ་སྐུལ་ཡང་ཞུས་འདུག
ཕྱོགས་མཚུངས་སྤྱི་འཐུས་བློ་བཟང་ཡེ་ཤེས་ལགས་ཀྱིས་ཁོང་རྣམས་ལ་གསུང་དོན། མིའི་རིགས་དཔྱད་ཞིབ་པ་དང་། གནའ་རྫས་དཔྱད་ཞིབ་པ་ཚོས་ཉམས་ཞིབ་བྱེད་སྐབས་བོད་མི་རིགས་དེ་ལོ་ངོ་སྟོང་ཕྲག་མང་པོའི་སྔོན་ནས་བྱུང་ཡོད་པར་བརྟེན་གཞོན་སྐྱེས་ཚོས་ཀྱང་རང་ཉིད་བོད་མི་ཞིག་ཡིན་བསམ་པའི་སེམས་ནང་སྤོབས་པ་དང་བཅས་བོད་ཀྱི་འཐབ་རྩོད་ཐོག་ནམ་ཡང་སེམས་ཤུགས་མ་ཆག་པར་དཀའ་ལས་རྒྱག་དགོས་པའི་འབོད་སྐུལ་ཡང་ཞུས་ཡོད་པ་བཅས།།
