༢༠༡༧ ཟླ་ ༡༠ ཚེས་ ༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༧ ཟླ་ ༡༠ ཚེས་ ༢ ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཉེ་འཁྲིས་སུ་རྟེན་གཞི་བྱས་པའི་བཙུན་དགོན་སྒྲོལ་མ་གླིང་དུ་བཙུན་མའི་ལས་འཆར་དབུ་བརྙེས་ནས་ལོ་ངོ་ ༣༠ འཁོར་བའི་དུས་དྲན་མཛད་སྒོ་གཟབ་རྒྱས་ངང་སྲུང་བརྩི་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་དང་། བོད་ཀྱི་བཙུན་མའི་ལས་འཆར་གྱི་ངེས་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག དམིགས་བསལ་སྐུ་མགྲོན་དགེ་བཤེས་མ་ཞལ་གྲངས་ཉི་ཤུ་དང་། སློབ་དཔོན་བཅོ་ལྔ། ཕྱོགས་བཞུགས་སྤྱི་འཐུས་ཁག་གཅིག གཞུང་འབྲེལ་མིན་པའི་ཚོགས་སྡེ་ཁག་གི་འགན་འཛིན་རྣམ་པ། ཕྱི་རྒྱལ་རོགས་ཚོགས་ཁག་གི་སྐུ་མགྲོན་རྣམ་པ། རྒྱ་གར་སྐུ་མགྲོན་མི་སྣ་ཁག་གཅིག མཁན་ལས་ཟུར་གྱི་སྐུ་ཚབ་རྣམ་པ་དང་། ཕྱོགས་མཐའ་ཁག་ནས་ཕེབས་པའི་བཙུན་མ། དེ་བཞིན་ཕྱི་ནང་གི་གསར་འགོད་པ་སོགས་ཚང་འཛོམས་ཀྱི་ཐོག་མར་བཙུན་དགོན་སྒྲོལ་མ་གླིང་གི་དབུ་མཛད་ཀྱིས་ཞལ་འདོན་དང་ཤིས་བརྗོད་གསུང་འདོན་དང་སྦྲགས་གསོལ་ཇ་འབྲས་སིལ་འདེགས་འབུལ་ཞུས།
དེ་ནས་བཙུན་དགོན་སྒྲོལ་མ་གླིང་གི་སློབ་སྤྱིས་འཇང་དགུན་ཆོས་ཀྱི་སྒྲིག་གཞི་གསལ་བསྒྲགས་དང་འབྲེལ་གསུང་བཤད་གནང་གྲུབ་མཚམས་བོད་ཀྱི་བཙུན་མའི་ལས་འཆར་གྱི་འགན་འཛིན་གཞོན་པ་བཙུན་མ་བློ་བཟང་བདེ་ཆེན་ལགས་ཀྱིས་འཇང་དགུན་ཆོས་ཀྱི་བྱུང་རིམ་སོགས་ངོ་སྤྲོད་གནང་།
དེ་རྗེས་བོད་ཀྱི་བཙུན་མའི་ལས་འཆར་གྱི་ངེས་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་གིས་བཙུན་མའི་ལས་འཆར་གྱི་བྱུང་རིམ་དང་འབྲེལ་བོད་ཀྱི་བཙུན་མའི་ལས་འཆར་ཐོག་མར་བོད་ཀྱི་བུད་མེད་ཚོགས་པ་བརྒྱུད་ནས་བྱུང་བ་ཞིག་དང་། སྐབས་དེེར་ང་ཚོའི་སྤྱི་ཚོགས་ཀྱི་གནས་སྟངས་སྐྱོ་པོ་ཡིན་ནའང་བཙུན་མ་ཡོངས་ཀྱི་འཚོ་བའི་མཐུན་རྐྱེན་དང་སློབ་སྦྱོང་སོགས་ཀྱི་ཐད་བོད་ཀྱི་བུད་མེད་ཚོགས་པའི་ལས་བྱེད་རྣམས་ནས་བཙུན་མ་ཡོངས་ལ་ཐུགས་འཁུར་ཆེ་བཞེས་ཀྱིས་རིས་སུ་མ་མཆིས་པའི་བཙུན་མ་མང་པོར་ཕྱག་རོགས་གནང་བ་མ་ཟད། བོད་མིའི་སྒྲིག་འཛུགས་བཀའ་ཤག་དང་ཆོས་རིག་ལས་ཁུངས་ནས་རྒྱབ་སྐྱོར་ཡོད་པའི་ཐོག་ཕྱག་རོགས་དང་མཐུན་རྐྱེན་གནང་བའི་སྐོར་སོགས་ཀྱི་གསུང་བཤད་གནང་།
དེ་རྗེས་བཙུན་མའི་ལས་འཆར་གྱི་ངེས་སྟོན་པ་བཀའ་ཟུར་རིན་ཆེན་མཁའ་འགྲོ་མཆོག་གིས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་དང་ཤེས་རིག་བཀའ་བློན་དངོས་གྲུབ་ཚེ་རིང་མཆོག དེ་བཞིན་ཆོས་རིག་ལས་ཁུངས་ཀྱི་སྐུ་ཚབ་ཟུང་དྲུང་ཐུབ་བསྟན་ཚེ་རིང་ལགས་བཅས་ལ་ཐུགས་རྗེ་ལེགས་འབུལ་མཚོན་ཆེད་རྗེ་བཙུན་སྒྲོལ་མའི་སྐུ་འདྲ་རེ་ཕུལ།
དེ་རྗེས་སྐུ་མགྲོ་གཙོ་བོ་དཔལ་ལྡན་སྲིད་སྲིད་སྐྱོང་མཆོག་གིས་དགེ་བཤེས་མ་ཉི་ཤུ་དང་སློབ་དཔོན་བཅོ་ལྔ་ལ་གཟེངས་བསྟོད་བྱ་དགའ་དང་། གཞན་ཡང་དམིགས་བསལ་སྐུ་མགྲོན་རྣམ་པ་དང་། འགན་འཛིན་ལྷན་ཚོགས་ཀྱི་ཚོགས་མི་རྣམ་པ། རོགས་ཚོགས་ཁག་དང་རྒྱ་གར་གྱི་དཔོན་རིགས། ཡུལ་མིའི་གྲོགས་པོ་རྣམ་པ་དང་འབྲེལ་ཡོད་ལས་བྱེད་རྣམས་ལ་ཐུགས་རྗེ་ལེགས་འབུལ་མཚོན་ཆེད་རྗེ་བཙུན་སྒྲོལ་མའི་སྐུ་རེ་གནང་རྗེས་དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། ང་སྒྲོལ་མ་གླིང་བཙུན་དགོན་དུ་ལོ་བདུན་རྗེས་ལ་བཅར་བ་ཡིན། དེ་སྔ་བཀའ་བློན་ཁྲི་པའི་བགྲོ་གླེང་སྐབས་ལ་ཚོགས་ཁང་འདིར་བཅར་རྒྱུ་བྱུང་། དེ་རིང་ནི་མེས་པོ་དམ་པ་གྷན་དིི་མཆོག་གི་འཁྲུངས་སྐར་ཉིན་མོ་ཡིན་སྟབས། ནམ་རྒྱུན་ཡིན་ན་གཞུང་འབྲེལ་མཛད་སྒོ་སྔ་དྲོ་ཆུ་ཚོད་ ༩ ཐོག་ཚོགས་ཀྱི་ཡོད་ནའང་། དེ་རིང་བཙུན་མའི་ལས་འཆར་དབུ་བརྙེས་པའི་མཛད་སྒོའི་ཐོག་བཅར་སླད་ཆུ་ཚོད་ ༨།༣༠ ཐོག་གྷན་དིིའི་འཁྲུངས་སྐར་ཆུ་ཚོད་ཕྱེད་ཀ་སྔོན་དུ་ཚོགས་ནས་ཆེད་མངགས་འདིར་བཅར་བ་ཡིན། གང་ལ་ཞེ་ན། བདུན་ཕྲག་གཅིག་སྔོན་ནས་མགྲོན་ཤོག་འབྱོར་བྱུང་།
འོན་ཀྱང་གཞུང་འབྲེལ་མཛད་སྒོ་དེ་དུས་རྒྱུན་དུ་སྲུང་བརྩི་ཞུ་བཞིན་ཡོད། ཆོས་རིག་བཀའ་བློན་མཆོག་ནི་བོན་པོའི་དབུ་བླ་སྨན་རི་ཁྲི་འཛིན་སོ་གསུམ་པ་མཆོག་དགོངས་པ་བོན་དབྱིངས་སུ་ཐིམས་ནས་སྐུ་གདུང་ཞུགས་འབུལ་མཛད་སྒོར་བཅར་དགོས་བྱུང་བ་མ་ཟད། ཆོས་རིག་དྲུང་ཆེ་ཡིན་ནའང་མ་ནཱ་ལི་གཡས་གཡོན་དུ་དགོན་པ་ཞིག་དབུ་འབྱེད་གནང་རྒྱུའི་མཛད་སྒོའི་སྐུ་མགྲོན་དུ་མགྲོན་བརྡ་འབྱོར་ནས་ཟླ་ཤས་སོང་ཡོད་པར་བརྟེན་འབྲེལ་ཡོད་ཆོས་རིག་ལས་ཁུངས་ཀྱི་བཀའ་བློན་དང་དྲུང་ཆེ་འདིར་ཕེབས་མ་ཐུབ་པའི་རྒྱུ་མཚན་འདི་འདྲ་རེད་ཅེས་ཞུ་རྒྱུ་ཡིན།
ཐོག་མར་༧གོང་ས་མཆོག་གིས་བཀའ་སློབ་ལམ་སྟོན་སྩོལ་སྐབས་བཙུན་མའི་ལས་འཆར་དང་བཙུན་དགོན་དགོས་ཀྱི་ཡོད་པ། དགེ་བཤེས་མའི་བསླབ་པ་སློབ་གཉེར་བྱེད་དགོས་རྒྱུ་གལ་ཆེན་པོ་ཡིན་སྐོར་སོགས་ཀྱི་བཀའ་སློབ་རིམ་པར་སྩལ་བའི་བཀའ་དྲིན་ལ་བརྟེན་ནས་དེ་རིང་བཙུན་མའི་ལས་འཆར་འདི་ལོ་ངོ་སུམ་ཅུ་འཁོར་བའི་མཛད་སྒོ་ཚོགས་ཐུབ་པ་མ་ཟད། གྲུབ་འབྲས་ཡིན་ནའང་ཚང་མས་གཟིགས་རྒྱུ་ཡོད་པ། ཧ་ཅང་ཡག་པོ་བྱུང་ཐུབ་པ་འདི་ཉིད་གཙོ་བོ་མགོན་པོ་གང་ཉིད་མཆོག་གི་ཐུགས་རྗེ་བཀའ་དྲིན་ཡིན་པ་ཧ་ཅང་གསལ་པོ་རེད། ཅེས་སོགས་ཀྱི་གསུང་བཤད་གནང་རྗེས་བཙུན་མ་བདེ་ལེགས་དབང་མོ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་།
དེ་རྗེས་སྐུ་མགྲོན་རྣམས་ལ་ཉིན་གུང་གསོལ་ཚིགས་དང་གཞས་སྣ་གཟིགས་འབུལ་ཞུས་ཡོད་པ་བཅས།།
