༢༠༡༧ ཟླ་ ༡༠ ཚེས་ ༢ རེས་གཟའ་ཟླ་བ།

༄༅། །ཕྱི་ལོ་ ༢༠༡༧ ཟླ་ ༡༠ ཚེས་ ༢ ཉིན་ཏེ་རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་གྷན་དི་མཆོག་གི་འཁྲུངས་སྐར་དུས་ཆེན་ཡིན་སྟབས།  དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དབུ་བཞུགས་ཐོག་བདག་ཉིད་ཆེན་པོ་གཱན་ངྷི་མཆོག་གི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༨།༣༠ ཐོག་དཔལ་ལྡན་སྲིད་སྐྱོང་མཆོག་གིས་གཙོས་བཀའ་བློན་རྣམ་པ་དང་། ལྷན་ཁང་ཁག་གི་དྲུང་ཆེ་ཆུང་རྣམ་པ། བཀའ་དྲུང་ཡིག་ཚང་གི་སྲི་ཞུའི་ལས་བྱེད་བཅས་བཀའ་ཤག་མདུན་ཐང་དུ་ལྷན་འཛོམས་ཐོག    དཔལ་ལྡན་སྲིད་སྐྱོང་མཆོག་གིས་རྒྱ་གར་རྒྱལ་དར་མཁའ་དབྱིངས་སུ་སྒྲེང་འཛུགས་གནང་རྗེས་ཚོགས་བཅར་བ་ཚང་མས་རྒྱ་གར་རྒྱལ་གླུ་དབྱངས་སུ་གྱེར།

དེ་རྗེས་དཔལ་ལྡན་སྲིད་སྐྱོང་མཆོག་གིས་བདག་ཉིད་ཆེན་པོ་གྷན་དི་མཆོག་གི་སྐུ་པར་ལ་མཇལ་དར་ཕུལ་བ་དང་སྦྲགས་སྣང་གསལ་ཞལ་ཕྱེ་གནང་སྟེ་གསུང་དོན། མེས་པོ་དམ་པའི་འཁྲུངས་སྐར་དེ་བཞིན་རྒྱལ་སྤྱིའི་འཚེ་མེད་ཞི་བའི་ཉིན་མོར་སྲུང་བརྩི་ཞུ་བཞིན་ཡོད་པ་དང་། བོད་མི་ཚོས་ཀྱང་འཚེ་མེད་ཞི་བའི་ལམ་ནས་བོད་ཀྱི་རྩ་དོན་ཆེད་འབད་བརྩོན་བྱས་དང་བྱེད་མུས་ཡིན་པ་དང་།

དེ་བཞིན་བདག་ཉིད་ཆེན་པོ་མཆོག་གིས་ཁོར་ཡུག་སྲུང་སྐྱོབ་དང་། གཙང་སྦྲ་འཕྲོད་བསྟེན། ལྷག་པར་ཤེས་ཡོན་གལ་འགངས་ཆེན་པོར་བརྩིས་གནང་བ་དེར་མིག་དཔེར་བཟུང་ནས་ང་ཚོས་ཀྱང་འབད་བརྩོན་དེ་ལྟར་བྱེད་བཞིན་ཡོད། ཅེས་གསུངས། དེ་རྗེས་བཀའ་ཤག་གི་མཇལ་འཕྲད་ཁང་དུ། དཔལ་ལྡན་སྲིད་སྐྱོང་མཆོག་དབུ་བཞུགས་ཐོག བཀའ་བློན་རྣམ་པ་དང་། དྲུང་ཆེ་དྲུང་འཕར་རྣམས་ལ་རྒྱ་གར་གྱི་མངར་ཟས་འདེགས་འབུལ་ཞུས་ནས་དེ་ཉིན་གྱི་མཛད་སྒོ་སྲུང་བརྩི་ཞུས་འདུག་པ་བཅས།།