༢༠༡༧ ཟླ་ ༡༠ ཚེས་ ༤ རེས་གཟའ་ལྷག་པ།

༄༅། །ཕྱི་ལོ་ ༢༠༡༧ ཟླ་ ༡༠ ཚེས་ ༤ ཉིན་གྱི་ཕྱེད་ཡོལ་ཆུ་ཚོད་ ༤ ཐོག་གངས་སྐྱིད་ལས་བྱེད་ཚོགས་ཁང་གསར་པའི་ནང་ཉི་ཧོང་ཏ་ཀ་སུ་ཐེབས་རྩ་ནས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ལ་བོད་མིའི་རྩ་དོན་དང་ཤེས་ཡོན་ལ་རྒྱབ་སྐྱོར་མཚོན་ཆེད་ཏ་ཀ་སུ་གཟེངས་རྟགས་ཞེས་པ་འབུལ་ལམ་ཞུས་ཡོད།  སྐབས་དེར་སྐུ་ཞབས་ཏ་ཀ་སུ་མཆོག་གིས་གསུང་བཤད་གནང་དོན། ང་རང་དེ་རིང་འདིར་ཁྱེད་ཚོ་མཇལ་སྐབས་སེམས་ནང་དགའ་ཚོར་ཧ་ཅང་བྱུང་།  ཁྱེད་ཚོར་དབུ་ཁྲིད་སྲིད་སྐྱོང་བློ་བཟང་སེངྒེ་མཆོག་ལྟ་བུ་ཡོད་པ་འདི་དངོས་གནས་དགའ་སྤོབས་སྐྱེས་འོས་པ་ཞིག་རེད།   སྤྱིར་ཉི་ཧོང་དང་བོད་མི་རིགས་གཉིས་དངོས་པོའི་གནས་ལུགས་ཐོག་བསམ་བློ་གཏོང་སྟངས་སོགས་མཚུངས་ཆོས་མང་པོ་ཡོད།  དེར་བརྟེན་བོད་མི་ཚོ་དཀའ་སྡུག་མྱོང་བཞིན་ཡོད་པ་ཐོག་མར་གོ་ཐོས་བྱུང་སྐབས་ང་རང་ནང་མི་ཞིག་ལ་དཀའ་ངལ་འཕྲད་བཞིན་པའི་ཚོར་བ་བསྐྱེས་བྱུང་།  ང་ཚོས་འཚེ་མེད་ཞི་བའི་ལམ་ནས་མུ་མཐུད་འཐབ་རྩོད་རྒྱུན་སྐྱོང་བྱ་རྒྱུ་ཧ་ཅང་གལ་ཆེན་པོ་རེད། ང་ཚོས་མི་རབས་གཞོན་པ་ཚོར་ཤེས་ཡོན་གྱི་མཐུན་འགྱུར་སྦྱར་ནས་མ་འོངས་རེ་བ་རྒྱག་ས་ཡོད་པ་ཞིག་བཟོ་ཐུབ་དགོས།  ངས་གང་ཐུབ་བོད་དོན་ཐོག་རྒྱབ་སྐྱོར་ཞུ་རྒྱུའི་ཁས་ལེན་ཞུ་རྒྱུ་ཡིན།  ངས་ཕར་རང་ཡུལ་དུ་ལོག་ནས་དངུལ་གང་ཐུབ་བསག་རྒྱུ་དང་། དེའི་ཆེད་འབད་བརྩོན་གང་ཡོད་ཞུ་རྒྱུ་ཡིན། ངའི་རེ་བར་མ་འོངས་མི་རབས་གཞོན་པའི་ཁྲོད་སྲིད་སྐྱོང་བློ་བཟང་སེངྒེ་མཆོག་ལྟ་བུ་མང་ཙམ་འཐོན་རྒྱུར་རེ་བ་ཞུ་རྒྱུ་ཡིན།  ཞེས་གསུང་བཤད་གྲུབ་མཚམས།    དཔལ་ལྡན་སྲིད་སྐྱོང་མཆོག་གིས་གསུང་བཤད་གནང་དོན། མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས། སྲི་ཞུའི་ལས་བྱེད་རྣམ་པ་བཅས་ལ་ངས་བོད་མིའི་སྒྲིག་འཛུགས་ཀྱི་ཚབ་བྱས་ཏེ་སྨན་པ་ཏ་ཀ་སུ་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། གོང་དུ་བཀའ་དྲུང་གིས་གསུང་པ་ནང་བཞིན་རེད།  གཞི་རྩའི་སྨན་པ་ཏ་ཀ་སུ་དེ་སྔ་ནས་བོད་དོན་ལ་རྒྱབ་སྐྱོར་ཡོད་པ་དང་། ཕྱི་ལོ་ ༢༠༡༤ ལོར་རྡ་སར་ཕེབས་ཏེ་བཀའ་ཤག་ནས་ཤེས་ཡོན་ཧ་ཅང་གལ་ཆེན་པོ་ཡིན། ཞེས་འབད་བརྩོན་གནང་བ་དེར་རྒྱབ་སྐྱོར་གནང་མཁན་ཞིག་ཡིན་པ་མ་ཟད། བོད་ཀྱི་རྩ་དོན་ལའང་རྒྱབ་སྐྱོར་གནང་མཁན་ཞིག་རེད།

ང་རང་ཉི་ཧོང་དུ་ཐེངས་འགའ་ཤས་འགྲོ་སྐབས་ཁོང་དང་མཇལ་བྱུང་།  ནམ་མཇལ་སྐབས་སུའང་ཁོང་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དད་གུས་ཧ་ཅང་ཞུས་པ་མ་ཟད།   བོད་དོན་ཐོག་ཁ་ཞེ་གཉིས་མེད་ཀྱི་སྒོ་ནས་རྒྱབ་སྐྱོར་དང་བོད་མིའི་སྒྲིག་འཛུགས་ལའང་རྒྱབ་སྐྱོར་ཡོད་པ་དུས་རྟག་ཏུ་གསུང་བཞིན་འདུག

༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་དང་ཐང་ཀ་བཤམས་པ་ནས་བཟུང་རྒྱ་རིགས་ཚོ་དང་འབྲེལ་བ་ཧ་ལམ་ཆད་ཀྱང་ཁོང་ལ་ཁྱད་པར་གང་ཡང་མིན་འདུག ཅེས་གསུང་བཞིན་འདུག  ཁོང་སྨན་པ་ཧ་ཅང་སྙན་གྲགས་ཆེན་པོ་ཡིན་པར་བརྟེན། རྒྱ་ནག་གཞུང་གིས་ཁོང་ལ་མཐོང་ཕྱོགས་བྱུང་བ་དེས་ཁོང་སྒེར་ལ་ཁྱད་པར་རྩ་བ་ནས་མིན་འདུག  ཅེས་གསུང་པ་དང་སྦྲགས།  ཁོང་གིས་༸གོང་ས་མཆོག་གི་སྐུ་པར་ནམ་ཡང་མར་ཕབ་རྒྱུ་མིན་སྐོར་གསུངས།   ཁོང་གིས་ང་ལ་ཐུག་མཁན་སུ་ཡིན་ནའང་༸གོང་ས་མཆོག་གི་སྐུ་པར་མཇལ་ནས་འགྲོ་དགོས་རེད། ཅེས་༸གོང་ས་མཆོག་ལ་ཧ་ལས་པའི་དད་གུས་ཆེན་པོ་ཞུ་མཁན་ཞིག་རེད་འདུག 

བོད་མིའི་སྒྲིག་འཛུགས་དང་བོད་ཀྱི་རྩ་དོན་ལ་རྒྱབ་སྐྱོར་སླད་ཏ་ཀ་སུ་གཟེངས་རྟགས་འདི་འབུལ་གྱི་ཡིན་ཞེས་ལན་འབྱོར་བར་ཁ་ཞེ་གཉིས་མེད་ཐོག་ནས་བཙན་བྱོལ་བོད་མིའི་ཤེས་ཡོན་ལ་ཕན་པ་དང་བོད་མིའི་སྒྲིག་འཛུགས་ལ་ཕན་པའི་ཕྱག་རོགས་གནང་བ་མ་ཟད། བོད་མིའི་སྒྲིག་འཛུགས་ལ་ཏ་ཀ་སུ་གཟེངས་རྟགས་ཐེངས་དང་པོ་འབུལ་གྱི་ཡིན་ཞེས་བརྗོད་སྐབས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་ང་རང་སྲིད་སྐྱོང་ལས་ཐོག་ཡིན་སྟབས་གཞུང་འབྲེལ་གཟེངས་རྟགས་དང་གསོལ་རས་གང་ཐོབ་པ་ཡིན་ནའང་བཀའ་ཤག་ནང་སྒྲིག་གཤོམ་བྱས་ནས་འཇོག་རྒྱུ་རེད་མ་གཏོགས་ང་རང་སྒེར་གྱི་ཆགས་ཀྱི་མེད། 

རྩ་བའི་ང་སྒེར་གྱི་མིང་འབོད་ཀྱི་ཡོད་ནའང་སྲིད་སྐྱོང་གི་འགན་འཁྱེར་བའི་ཐོག་ནས་གཟེངས་རྟགས་འབུལ་ཡོང་སྐབས་བཀའ་ཤག་དང་བོད་མིའི་སྒྲིག་འཛུགས་ཀྱི་ཆགས་པ་རེད།  དེར་བརྟེན་ཁོང་གིས་བོད་མིའི་སྒྲིག་འཛུགས་ལ་གཟེངས་རྟགས་འདི་ཕུལ་བར་ཐུགས་རྗེ་ཆེ་ཞུ་རྒྱུ་ཡིན། 

སྤྱིར་སྲིད་སྐྱོང་གང་ཟག་གཅིག་གིས་གང་ཡང་བྱེད་རྒྱུ་མེད། གཙོ་བོ་ཕྱག་རོགས་བཀའ་བློན་རྣམ་པས་དུས་རྟག་ཏུ་མཉམ་རུབ་ཀྱིས་འགན་འཁུར་བའི་ཐོག་ནས་འགྲོ་བཞིན་ཡོད། འདིའི་ནང་ནས་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་ཚང་མས་འགན་འཁུར་བ་དང་། ལྷག་པར་རང་དབང་ཅན་གྱི་སྡེ་ཚན་ཁག་གཉིས། ང་ཚོར་གཟི་བརྗིད་ལྡན་པའི་མང་གཙོའི་ཀ་བ་གསུམ་ཡོད་པ་དང་། ལྷན་ཁང་ཚང་མས་འགན་འཁུར་བའི་ཐོག་ནས་ཕྱག་ལས་གནང་གི་ཡོད་པ་དང་།

མང་གཙོའི་ལམ་ལུགས་ཐོག་ནས་འགྲོ་ཡི་ཡོད་པ། ༸གོང་ས་མཆོག་གི་ཐུགས་ཀྱི་འཆར་སྣང་དང་དགོངས་བཞེད་ལྟར་ཡང་དག་པའི་མང་གཙོ་ལག་བསྟར་བྱེད་པ་འདི་འཛམ་གླིང་སྤྱི་ཡོངས་ལ་ངོམས་སུ་ཆོག་པ་ཆགས་ཡོད། ལྷག་པར་བོད་མི་ས་ཡ་དྲུག་ཡོད་པ་ནས་འདིར་སྐྱབས་བཅོལ་བ་རྣམས་འཛམ་གླིང་ནང་ཡོད་པའི་སྐྱབས་བཅོལ་བ་གཞན་དང་བསྡུར་བ་ཡིན་ན།  ཕལ་ཆེར་བོད་མིའི་སྒྲིག་འཛུགས་འདི་ཚགས་ཆུད་ཤོས་རེད་ཅེས་ཞུ་ཆོག་གི་རེད་བསམ་གྱི་འདུག

ང་ཚོས་མཁས་དབང་དང་གནད་ཡོད་མི་སྣ་མང་པོ་ཐུག་གི་ཡོད་སྟབས། ཁོང་ཚོ་ཚང་མས་བོད་མིའི་སྒྲིག་འཛུགས་འདི་ཚགས་ཚུད་པོ་ཡོད་པ། མང་གཙོའི་ཀ་བ་གསུམ་གྱིས་གཙོས་རང་དབང་ཅན་གྱི་སྡེ་ཚན་ཁག་ཡོད་སྐོར་གསུང་མཁན་མང་པོ་ཡོང་གི་འདུག དེར་བརྟེན་ང་ཚོ་ཚང་མ་དགའ་སྤོབས་བྱེད་དགོས་པ་ཞིག་རེད་འདུག 

དེ་རིང་ཏ་ཀ་སུ་གཟེངས་རྟགས་འདི་ང་སྲིད་སྐྱོང་མིང་ཐོག་ནས་བོད་མིའི་སྒྲིག་འཛུགས་ཀྱི་སྲི་ཞུའི་ལས་བྱེད་ཚང་མས་དུས་རྟག་ཏུ་ཕྱར་གྲུ་མཉམ་འདེགས་གནང་སྟེ་འགན་ཁུར་བཞེས་པའི་གཟི་བརྗིད་དང་། འཇོན་ཐང་དང་གྲུབ་འབྲས་སྨིན་པ་ཞིག་ལ་ངོས་འཛིན་པའི་ཐོག་ནས་ད་ལན་ཏ་ཀ་སུ་གཟེངས་རྟགས་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན།  ཏ་ཀ་སུ་གཟེངས་རྟགས་དང་འབྲེལ་ཉི་ཧོང་སྒོར་ས་ཡ་བཅུ་ཡང་ (ཨ་སྒོར་འབུམ་གཅིག་མན་ཙམ་) ཡོད་ས་རེད། དེ་ཁོ་རང་གིས་བོད་མིའི་སྒྲིག་འཛུགས་ཀྱི་རྩ་དོན་འཐབ་རྩོད་དང་ཤེས་ཡོན་ལ་རྒྱབ་སྐྱོར་གནང་ཆེད་ཡིན་ཞེས་བརྗོད་སྐབས།  ཤེས་རིག་ལས་ཁུངས་ལ་འབུལ་རྒྱུ་རེད།  དེ་འདྲ་བྱས་ན་ཁོང་རང་ཉིད་ཀྱིས་དུས་རྟག་ཏུ་ཤེས་ཡོན་ཡར་རྒྱས་གཏང་དགོས་རེད་ཅེས་དགོངས་པ་བཞེས་མཁན་ཞིག་ཡིན་སྟབས། ཤེས་ཡོན་བརྒྱུད་ནས་ང་ཚོའི་མ་འོངས་སོན་རྩ་ཚོ་སོ་སོའི་རྐང་པའི་ཐོག་ལངས་ཐུབ་རྒྱུ་དང་། རྩ་དོན་རྩོད་མཁན་གྱི་འགོ་ཁྲིད་ཆགས་ཐུབ་རྒྱུའི་རེ་བ་བྱས་ནས་ཤེས་རིག་ལས་ཁུངས་ལ་ཕུལ་ཐུབ་ན་ཡག་ཤོས་རེད་འདུག 

དེ་རིང་ཏ་ཀ་སུ་དང་ཁོང་གི་ཕྱག་རོགས་ཆེད་དུ་མངགས་ནས་ཉི་ཧོང་ནས་ཁ་སང་རྡ་སར་དམིགས་ཡུལ་དེ་རང་གི་ཆེད་དུ་ཕེབས་འདུག དེ་ནས་ཕྱིར་ཕེབས་མཁན་རེད།  དེ་ནས་ཕར་ཕེབས་མཚམས་མུ་མཐུད་བོད་དོན་རྒྱབ་སྐྱོར་གནང་གི་ཡིན་ཞེས་གོང་དུ་གསུངས་པ་ལྟར།   ཁོང་ལྟ་བུ་ཉི་ཧོང་ནང་དུ་མི་སྣ་ག་ཚོད་མང་པོ་ཡོད་པ་ཡིན་ནའང་ང་ཚོས་དགའ་བསུ་ཞུ་རྒྱུ་ཡིན།   ཁོང་གི་ཕྱག་རོགས་གཞན་དང་ངོ་ཤེས་ཚང་མར་བོད་དོན་སྐོར་གསུང་རོགས་གནང་ཞེས་ངས་འབོད་སྐུལ་ཞུ་རྒྱུ་ཡིན།  རྒྱབ་སྐྱོར་ཡིན་ནའང་གང་ཐུབ་ཅི་ཐུབ་གནང་རོགས་གནང་ཞུ་རྒྱུ་ཡིན། ཞེས་གསུང་བཤད་གནང་རྗེས་བཀའ་དྲུང་སྟོབས་རྒྱལ་ཚེ་རིང་ལགས་ཀྱིས་ཐུགས་རྗེ་ཆེ་ཞུས་ཏེ་གསོལ་ཇ་འདེགས་འབུལ་ཞུས་ནས་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས། །