ཕྱི་ལོ་ ༢༠༡༧ ཟླ་ ༡༠ ཚེས་ ༤ རེས་གཟའ་ལྷག་པ།
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༧ ཟླ་ ༡༠ ཚེས་ ༡ ཉིན་བཅོམ་ལྡན་འདས་དཔལ་འཁོར་ལོ་སྡོམ་པའི་གནས་ཆེན་ཀུ་ལུ་ཏ་དང་འདབས་འདྲེས་ཧི་མ་ཅཱལ་ཀུ་ལུ་རྫོང་ཁོངས་འབུམ་དྷར་ཞེས་པའི་ས་གནས་སུ་དོན་བརྒྱུད་དཔལ་ལྡན་འབྲུག་པའི་བྱེས་ཀྱི་གདན་ས་འབྲུག་བདེ་ཆེན་ཆོས་འཁོར་གླིང་འདི་བཞིན་དཔལ་ལྡན་དབྱར་རྔ་པ་ཆེན་པོའི་རིང་ལུགས་འཛིན་པ་ཡོངས་ཀྱི་ཆུ་འགོ། རྗེ་བླ་མ་རྗེ་བཙུན་ཆོས་ཀྱི་མགོན་པོ་ཞེས་ཀུན་མཁྱེན་ཆེན་པོ་པདྨ་དཀར་པོ་དང་། རྗེ་ལྷ་རྩེ་བ་ངག་དབང་བཟང་པོ་ཟུང་གིས་བླ་མར་བསྟེན་ཅིང་། ཕྱི་ལོའི་དུས་རབས་བཅོ་ལྔ་པའི་ནང་སྒྲུབ་པའི་རྒྱལ་མཚན་འཛིན་ཅིང་དོན་བརྒྱུད་དཔལ་ལྡན་འབྲུག་པའི་གདན་ས་ར་ལུང་དང་གཙོ་བོ་གནས་ཆེན་ཙ་རིའི་རྡོར་འཛིན་དུ་སྐུར་བཞེངས་པའི་འཕྲིན་ལས་ཀྱི་སྣང་བས་ཁྱབ་པ་དེའི་སྐུ་རབས་དགུ་པ་མཐུ་སྟོབས་ཆོས་ཀྱི་དབང་ཕྱུག་མཆོག་གམ་ཡོངས་གྲགས་སུ་༼འབྲུག་པ་ཆོས་མགོན་རིན་པོ་ཆེ་༽ཞེས་གསོལ་བ་གང་གིས་སྐུ་ངལ་ཚད་མེད་ཀྱིས་ཕྱི་ལོ་ ༢༠༠༡ ནས་བྱེས་ཀྱི་གདན་ས་གསར་བཞེངས་ཀྱི་དབུ་བརྩམས་ནས་ལོ་འདིར་གཙུག་ལག་ཁང་གི་ཕྱི་ནང་ཚང་མ་གསར་བཞེངས་ལེགས་གྲུབ་བྱུང་བ་ཞིག་ཡིན་འདུག
ད་ལན་གྱི་མཛད་སྒོའི་སྐུ་མགྲོན་གཙོ་བོ་༸རྒྱལ་བ་མདོ་ཁམས་པ་ཆེན་པོ་ ༸སྐྱབས་རྗེ་ཁམས་སྤྲུལ་རིན་པོ་ཆེ་མཆོག་དབུ་བཞུགས་ཐོག ༸སྐྱབས་རྗེ་ཆོས་མགོན་རིན་པོ་ཆེ་མཆོག་དང་། གྲུ་གུ་ཆོས་རྒྱལ་རིན་པོ་ཆེ་མཆོག ༸སྐྱབས་མགོན་འབྲུག་ཆེན་རིན་པོ་ཆེའི་སྐུ་ཚབ། དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག མཁན་སྤྲུལ་ཆེ་ཁག་དང་། བཀའ་བརྒྱུད་སྤྱི་འཐུས་བསྟན་པ་ཡར་འཕེལ་ལགས། ཆོས་རིག་དྲུང་ཆེ་ལུང་རྟོགས་ལགས། ཀུ་ལུ་ས་གནས་འགོ་འཛིན་བསྟན་འཛིན་སྣང་བ་ལགས། དེ་བཞིན་དགོན་སྡེ་ཁག་གི་སྐུ་ཚབ་བཅས་འདུས་མང་བརྒྱ་ཕྲག་བརྒལ་བ། གཞན་ཡང་རྒྱལ་ཕྱི་ནང་གི་བསྟན་པའི་སྦྱིན་བདག་རྣམ་པ། ཁུ་ནུའི་ཡུལ་གྱི་དད་ལྡན་མི་མང་སུམ་བརྒྱ་ལྷག་བཅས་ལྷན་འཛོམས་ཀྱིས་བྱེས་ཀྱི་གདན་ས་འབྲུག་བདེ་ཆེན་ཆོས་འཁོར་གླིང་གི་གཙུག་ལག་ཁང་སྒོ་འབྱེད་གནང་ཡོད་པ་དང་།
ཐོག་མར་ཞོགས་པ་འདུས་མང་ནས་གཙུག་ལག་ཁང་གི་གསེར་སྒོའི་མདུན་དུ་འཕགས་པ་བཀྲ་ཤིས་བརྒྱད་པ་འུར་འདོན་གནང་བ་དང་ ༸སྐྱབས་རྗེ་རྣམ་གཉིས་ནས་སྒོ་འབྱེད་དར་ཚོན་གཅོད་འབྲེག་གིས་ཤིས་བརྗོད་སྨོན་ལམ་གསུང་འདོན་དང་འབྲེལ་བའི་འདུ་ཁང་ནང་གི་མཛད་སྒོ་གྲུབ་རྗེས། འདུ་ཁང་གི་མདུན་དུ་མི་མང་དང་ལྷན་དུ་མཛད་སྒོའི་གདན་གྲལ་ལ་བཞུགས་ཏེ། སྐུ་མགྲོན་ཁག་ནས་མཛད་སྒོའི་ཐོག་གསུང་བཤད་གནང་བ་དང་། དེ་ནས་དཔལ་ལྡན་ཚོགས་གཙོ་མཆོག་གིས་ཐོག་མར་གཙུག་ལག་ཁང་རྟེན་དང་བརྟེན་པ་བཅས་པར་ལེགས་གྲུབ་བྱུང་བར་ཡི་རངས་བསྔགས་བརྗོད་དང་སྦྲགས་གསུང་དོན། གཙོ་བོ་སངས་རྒྱས་ཀྱི་བསྟན་པ་ལུང་རྟོགས་གཉིས་པོ་དེ་ཉིད་ལུང་གི་བསྟན་པ་འཆད་ཉན་གྱིས་འཛིན་དགོས་རྒྱུ་དང་། དེ་ཡང་ཐོས་བསམ་སློབ་གཉེར་ཚུལ་བཞིན་གནང་ཐུབ་ན། སངས་རྒྱས་ཀྱི་བསྟན་པ་ཡུན་རིང་པོ་གནས་པ་ལའང་ཕན་པ་དང་། རང་གིས་ཉམས་ལེན་ཚུལ་བཞིན་བྱེད་པ་ལའང་དེས་ཕན་པ། མི་གཞན་ལ་སངས་རྒྱས་ཀྱི་ཆོས་ངོ་སྤྲོད་གནང་རྒྱུ་ལའང་དེས་ཕན་པས་ཐོས་བསམ་སློབ་གཉེར་ཐོག་དམིགས་བསལ་ཤུགས་རྒྱག་དགོས་རྒྱུའི་སྐོར་དང་།
གཞན་ཡང་དེང་སང་བོད་ནང་རྒྱ་ནག་གཞུང་གིས་ཆོས་ལུགས་རང་དབང་ཐོག་སྲིད་བྱུས་དམ་བསྒྲགས་ཆེ་རུ་གཏོང་བཞིན་ཡོད་པས། དེ་སེམས་འཚབ་བྱེད་གཞི་ཞིག་ཆགས་ཡོད་སྐོར། བཙན་བྱོལ་ནང་ ༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་དང་། ཆོས་བརྒྱུད་ཁག་གི་དབུ་འཁྲིད་བླ་ཆེན་རྣམ་པས་ཐུགས་ཁུར་ཆེ་བཞེས་ཀྱིས་མཛད་འཕྲིན་ལ་བརྟེན་ནས་དེང་སང་ཤར་ནུབ་ཀྱི་ལུང་པ་མང་པོའི་ནང་ནས་ནང་ཆོས་ལ་དོ་སྣང་སྔར་ལྷག་ཆེ་རུ་འགྲོ་བཞིན་ཡོད་པས་དེ་དག་གི་འདོད་མོས་བསྐང་ཐུབ་དགོས་པ། དེ་བཞིན་ཧི་མ་ལ་ཡའི་ཕྱོགས་ལའང་ནང་ཆོས་ཐོག་ཤུགས་སྣོན་འཕར་མ་རྒྱག་དགོས་པ་སོགས་ཀྱི་གསུང་བཤད་གནང་ཡོད། དེ་རྗེས་༸སྐྱབས་རྗེ་ཆོས་མགོན་རིན་པོ་ཆེ་མཆོག་གིས་གསུང་བཤད་གནང་གྲུབ་བསྟུན། མཐར་ཐུགས་རྗེ་ཆེ་ཞུའི་གསུང་བཤད་གནང་བ་བཅས་གཙུག་ལག་ཁང་དབུ་འབྱེད་ཀྱི་མཛད་སྒོ་ལེགས་པར་གྲུབ་པའི་གནས་ཚུལ་དུ། །
